7
Akhan Ih Sualnak
1 Lak lo dingih khammi hmuahhmuah zianghman nan dai lo pei, tiih Bawipa ih thupekmi cu Israel mi pawl in an thlun lo. Thilri a latu cu Akhan a si. Akhan cu Karmi ih fapa a si, Karmi cu Zabdi ih fapa a si. Zabdi cu Zerah hrin a si ih Zerah cu Judah miphun a si. Akhan in thilri a lak ruangah Israel mi parah Bawipa cu a thin a heng ngaingai.
2 Joshua in Israel mi hrekkhat Jerikho ihsin Ai ah khua le ram zoh dingin a thlah. Ai khua cu Bethel ihsin nisuahnak lam, Bethaven khua kiangteih a ummi khua a si. Cuhrangah an feh ih Ai khua cu an va thlingthla.
3 An rakir ih Joshua hnenah, “Kan zate ih feh a òul lo ding. Ai khua va nam ding ahcun minung thawnghnih thawngthum tluk thlah awla a tawk ko ding. Mi hmuahhmuah ih do dingah a tlak lo. Mi malte an si,” tiah an ra simsal.
4 Curuangah Israel ralkap thawngthum tluk an feh. Asinan Ai khua ih ralkap pawl in an rak neh ih an tlan thluh.
5 Israel ralkap cu sawmthum le paruk an thi. An khawsuah ihsin Shebarim an timi lungto laknak tiang Ai khua ralkap pawl in Israel ralkap pawl cu an dawi ih an tlannak tlangtluan ah ral in an that phah vivo. Cuhrangah Israel mi pawl cu an thin a phang, an òih ngaingai ih an tha a nau sualso.
6 Cutikah Joshua cu a riahsia in a hnipuan a thlek ih Bawipa ih Thukam Kuang hmaiah leilung ah a bok. Israel mi hruaitu pawl khal an riahsia in an lu parah leivut an phulh aw ih Joshua hnen ahcun zanlam tiang an bok ve.
7 Cule Joshua in Bawipa ih hnenah, “Maw Bawipa ka Pathian, zianghrangah so Jordan tiva ral ahhin in rak thlenpi? Amor mi pawl ih kut sung tla dingah le siatsuah hloral thluhta dingah maw in ti? Ziangahso Jordan khatlam ral ahkhan kan rak um sawn lo?
8 Maw Bawipa, Israel mi pawl ralih an dawi rero hnu ahcun ziangso ka òong ngam nawn ding?
9 In dawinak thuhla Kanaan mi le midang tla in an theih tikah in kulh thluh dingih kan ci in hmit thluh ding. Na hmin thantersalnak dingah ziangso na tuah ding?” tiah a ti.
10 Cutikah Bawipa in Joshua hnenah, “Tho aw; ziangahso na bok ringring?
11 Israel mi pawl an sual zo. Thlun ding tiih kan kam awkmi an thlun lo a si. Lak lo ding tiih khammi thilri an lak. An ruk ih an pheh ih an thilri lakah an thup.
12 Curuangah Israel mi in nan ral nan do thei lonak a si. Ral donak ihsin nan zam ih atu cu siatsuah thluh ding nan si thlang. Nan rukmi thilri nan siatsuah thluh lo ahcun nan hnenah ka um nawn lo ding.
13 Tho aw; na minung pawl an sual thianfai awla keimah i tong hai seh. Thaisun ah i tong hai seh, òha tein sim aw; ziangahtile keimah Israel ih Pathian in an hnenih ka òong duhmi cu hitiin a si: “Maw Israel, lak lo ding ka timi thilri nan lak. A cuih thilri nan hlon thluh hlan lo cu nan ral pawl nan neh thei lo ding.
14 Curuangah zinglam ah a hnam a hnam in nan suak pei. Bawipa ih hrilmi hnam sung ihsin a hrin a hrin in nan suak pei. Bawipa in a hril pei ih Bawipa ih hrilmi hrin sung ihsin sungkhat sungkhat in nan suak pei. Cule Bawipa ih hrilmi sungkhat sung ihsin minung pakhat, pakhat in nan suak pei.
15 Lak lo ding tiih khammi thilri a latu cu a innsang le a neihmi hmuahhmuah thawn meisa in ur a si pei. Ka thukam a thlun lo ruangah Israel miphun parah ningzakza thil òha lo tumpi a thlenter a si,” na ti pei,” tiah a ti.
16 Joshua cu zingpit tein a tho ih Israel mi pawl cu a hnam a hnam in a ratter. Cuih hnam pawl sung ihsin Judah miphun pawl thursuak an si.
17 Judah miphun sung ihsin a hrin a hrin in a suahter ih Zerah hrin an thursuak. Zerah hrin pawl cu innsang, innsang in a suahter lala ih Zabdi ih innsang an thursuak.
18 Cule Zabdi innsang sung ihsin minung pakhat, pakhat in a suahter ih Akhan cu mawh an phurhter. Akhan cu Karmi ih fapa a si ih Zabdi ih tupa a si.
19 Cutikah Joshua in Akhan cu, “Ka fapa, Israel ih Pathian Bawipa ih hmaiah hin thutak sim awla na sualnak phuang aw. Na tuahmi cu i sim hnik. Zianghman phehmi nei lo tein sim thluh aw,” tiah a ti.
20 Cule Akhan cun, “A si, Israel ih Pathian Bawipa ih hmaiah ka sual zo. Ka tuahmi cu himi a si.
21 Kan lonmi thilri sungah khan Babilon puan mawite pakhat, pawngnga tluk a ritmi ngun tum le, pawngkhat tluk a ritmi sui tum ka hmu ih ka duh zet ruangah ka lak a si. Ka buuk sungah ka phum ih nan hmu ko ding; a hnuaita bik ah ngun tum cu ka ret,” tiah a ti.
22 Cutikah Joshua in mi hrekkhat pawl a thlah ih Akhan ih buk ahcun zamrang in an va tlan ih a buk sungah a phummi thil pawl cu an va hmu; ngun tum cu a hnuaita bik ah an hmu ngaingai.
23 An va phorh ih Joshua le Israel mi pawl hnenah an rak keng ih Bawipa ih hmai ahcun an ret.
24 Cule Joshua le Israel mi pawl cun Akhan le a ngun tum, a sui tum le Babilon puan mawi le, a fapa pawl, a fanu pawl, a caw, a rang, a tuu le a neihmi hmuahhmuah an lak ih Harsatnak Phairawn timi ah an fehpi.
25 Cutawkah cun Joshua in, “Zianghrangah so kan parah ningzah harsatnak na thlenter? Bawipa in na parah harsatnak a thlenter ve ding,” a ti ih an zate in Akhan cu lungto in an deng ciamco ih a thi. A innsang pawl le a neihmi hmuahhmuah khal an deng that ih meisa in an ur thluh.
26 Cutawk Akhan ih thihnak ahcun lungto an pengkhawm ih tuih sun tiangin a cuih lungpen cu a um lai. Curuangah a cuih hmun cu Akhor, Harsatnak Phairawn, tiah an tita.
Cuih hnuah Bawipa ih thinhennak cu a reh.