3
Israel Mi In Jordan Tiva An Tan
1 Zingpitte ah Joshua cu a tho ih amah le Israel mi hmuahhmuah an riahnak Shittim ihsin an pok ih Jordan tiva ah an feh. An tan hlanah tiva kapah cun an riak.
2 Ni thum hnuah Israel hruaitu pawl cu miburpi riahnak hmun ciar ah an feh ih,
3 “ Bawipa nan Pathian ih pekmi Thukam Kuang kha Levi puithiam pawl in an zawn ih an fehpi nan hmuh tikah nan umnak ciar ihsin pok uhla thlun uh.
4 Hi lam nan thlen dah lo ruangah fehnak tla nan thei lo pang ding. Sikhalsehla Thukam Kuang cu naih tuk hlah uh; peng hrek tluk hlat in thlun uh,” tiah mi zapi hnenah an sim.
5 Cule Israel mi pawl hnenah Joshua in, “Tithianghlim aw uh. Ziangahtile thai sun ah nanmah lakah Bawipa in mangbangza a tuah ding a si,” tiah a sim.
6 Cule puithiam pawl hnenah Joshua in, “Thukam Kuang cu la uhla senpi hmaiah feh uh,” a ti ih a ti vek cun an feh.
7 Cutikah Bawipa in Joshua hnenah, “Tuih sun ih ka tuahmi ruangah hin Israel mi pawl in nangmah cu an lo cawisang dingih an lo upat ding; Moses hnenih ka rak um bangtukin na hnenih ka um hi an thei ding.
8 Thukam Kuang a phurtu puithiam pawl hnenah, “Jordan tivakap nan thlen ih nan tan tikah ti sungah cun ding uh,” tiah thu pek aw,” tiah a ti.
9 Cule Joshua in Israel senpi pawl cu, “I rak naih uhla, Bawipa nan Pathian ih òongkam cu ngai hnik uh.
10 Nanmah lakah a nungmi Pathian a um zia cu tuih sun ah nan thei ding. Hmailam ih nan nor deuhdeuh tikah Kanaan mi, Hit mi, Hiv mi, Periz mi, Girgash mi, Amor mi le Jebus mi pawl cu Amah in a dawisuak thluh ding.
11 Leilung pumpi ih Bawipa ih Thukam Kuang cun nan hmaiah Jordan tiva a tan ding.
12 Curuangah minung hleihnih, Israel phunkhat ihsin minung pakhat ciar, hril uh.
13 Leilung pumpuluk uktu Bawipa ih Thukam Kuang a zawntu puithiam pawl ti sungih an ke an vun thlak ve tein Jordan tiva a luang reromi cu a cat ding; saklam ihsin a rung luangmi tidai cu hmunkhat ah a li luailo ding,” tiah a ti.
14 Jordan Tiva tan dingah Israel mi pawl cu an riahnak ihsin an pok. Cule Thukam Kuang a zawntu puithiam pawl hmaisabik ah an feh.
15 Rawl lak caan a si ih Jordan tiva cu a lian zet. Tiva kap an thlen ih tidai sungih an ke an vun thlak ve tein,
16 Jordan tiva cu a cat; luang lo in a cawl; a li luailo ih Zarethan khuapi kiangih a ummi Adam khua tiangin tidai cu a hung li. Arabah Tipi, Tipi Thi timi sungih a vung luang mi tidai cu a cat thla rori. Cule Israel mi pawl cun Jerikho khua ralden zawn in an tan.
17 Leilung ro par ihsin Israel mi pawl cu an feh ih an zate ih an tan thluh hlan lo Bawipa ih Thukam Kuang a zawntu puithiam pawl cu Jordan tiva laifang leilung ro parah an ding ringring.