24
Shekhem Ah Joshua In Thu A Sim
1 Shekhem ah Israel mi pawl cu an zate in Joshua in a ko òheh. Upa pawl, hotu pawl, thureltu pawl le bawi pawl an zate in a ko ih Pathian hmai ahcun an ra suak ciar.
2 Cule Joshua in an hnenah, “Israel ih Pathian Bawipa cun nan hnenah hitiin a ti: “Hlanlaipi ah nan pupa pawl cu Eufrates Tiva ih khatlam ralah an rak um ih khawzing dangdang an rak biak. A cuih nan pupa lakih pakhat cu Abraham le Nahor ih pa Terah a si.Ref 24:2 Sem 11:27;
3 Cun Eufrates tiva ral ihsin Abraham cu ka lak ih Kanaan ram khuazakip ah ka hruai. Tefa tampi tla ka pek. A fapa Isaak ka pek ih,Ref 24:3 Sem 12:1-9; 21:1-3;
4 Isaak hnenah Jakob le Esau tla ka pek. Cule Seir timi tlangpar ram cu a co dingah Esau ka pek ih Jakob le a faale pawl cu Izipt ram ah an vung feh.Ref 24:4 Sem 25:24-26; 36:8; 46:1-7;
5 Cun Moses le Aaron ka ko ih Izipt ram ah siatnak tampi ka thlenter. Cuih hnuah nan zate in ka lo hruaisuak.Ref 24:5 Suah 3:1-12:42;
6 Nan pu le nan pa pawl cu Izipt ram ihsin ka hruai suak ih Tipi Sen an thleng. Izipt mi pawl in an rangleng le rang ralkap pawl thawn an rak dawi.
7 Mangbang vansang in Israel mi pawl in ka hnenih an au tikah anmah le Izipt mi pawl karlak ah khawthim ka ret. Izipt mi pawl tlunah tipi ka ratter ih tidai in a khuh thluh hai. Izipt mi pawl tlunih ka thil tuahmi cu nan mit in nan hmu.Ref 24:6, 7 Suah 14:1-31;
“Hramlak nelrawn ah caan reipi nan um.
8 Cule Jordan tiva ihsin nisuahnak lamih a ummi Amor mi ram ah ka lo thlenpi. An lo do nain nehnak cu nan hnenah ka lo pek. An ram nan lak ih nan fehnak kipah anmah cu ka siatsuah vivo.Ref 24:8 Mipum 21:21-35;
9 Cule Zippor ih fapa Moab siangpahrang Balak in Israel mi cu a lo do. Cuih tlunah Beor ih fapa Balaam hnenah nanmah cam dingah thu a cah.
10 Sikhalsehla Balaam ih thu cu ka ngai lo; thluasuahnak sawn a lo pek hai ih cutiin Balak ih huham sung ihsin ka lo luatter hai a si.Ref 24:9, 10 Mipum. 22:1-24:25;
11 Cun Jordan tiva nan tan ih Jerikho khua nan thleng. Cutikah Jerikho khua mi lawng si lo in Amor mi, Periz mi, Kanaan mi, Hit mi, Girgash mi, Hiv mi le Jebus mi pawl in an lo do. Asinan an zate ih tlunah nehnak ka lo pek.Ref 24:11 Jos 3:14-17; 6:1-21;
12 Lungphan thinlaunakj Lungphan thinlaunak timi hi khuaingal ti tla in leh a theih. nan hmaiah ka thlah ih cumi in Amor siangpahrang pahnih cu a dawi hai a si; nan ralnam le nan li cahnak zianghman a tel lo.Ref 24:12 Suah 23:28; Daan 7:20;
13 Nan òuan dah lomi loram ka lo pe ih nan sak dah lomi khuapi pawl ah nan um; nan ciin dah lomi sabit hri ihsin sabit nan ei ih nan phun dah lomi Olif kuang ihsin tanluan rah nan ei a si,” a ti.Ref 24:13 Daan 6:10, 11;
14 “Curuangah Bawipa cu òihzahnak thawn biak uhla amah ih hna cu rin tlak zet le thinlung tak tein òuan uh. Nan pupa pawl in Mesopotamia ram le Izipt ram ih an rak biakmi khawzing dangdang pawl cu hnong thlang uhla Bawipa cu rian uh.
15 Bawipa nan ren duh lo a si ahcun tuih sun ahhin hril uh; Mesopotamia ram nan pupa pawl ih an rak biakmi khawzing pawl maw nan biak sawn ding; asilole atu ih nan umnak ram Amor miphun pawl ih khawzing pawl deuh so nan biak ding, hril uh. Kei le ka innsang cun Bawipa kan biak ding a si,” tiah a ti.
16 Cutikah Israel mi pawl cun, “ Bawipa tlansan tahrat in khawzing dangdang biak ding cu kan tum dah lo ding.
17 Bawipa kan Pathian in kan pupa pawl siseh, kanmah siseh, Izipt ramsung saltannak ihsin in suah ih thil mangbangza a tuahmi pawl cu kan hmu zo. Miphun tampi lakah kan feh ih kan fehnak kipah amah in him tein, in kilkhawi.
18 Hmailam kan feh vivo tikah Bawipa amah thotho in hi ram sungih a ummi miphun le Amor mi pawl cu a dawi thluh a si. Curuangah kannih khal Bawipa kan biak ve ding. Amah cu kan Pathian a si,” tiah an ti.
19 Joshua in an hnenah, “ Bawipa cu nan rian thei lem pei maw? Ziangahtile amah cu a thianghlimmi Pathian a si ih thiik nei Pathian a si. Nan mawhnak le nan sualnak khal a lo ngaithiam lo ding.
20 Bawipa tlansan tahrat in ramdang khawzing nan biak a si ahcun nan parah caan reipi rak òha zo hmansehla amah in a lo ral dingih a lo hrem ding; a lo siatsuah òheh hai ding a si,” tiah a ti.
21 Cutikah Israel mi pawl in Joshua hnenah, “A si lo, Bawipa lawnglawng kan rian ding a si,” tiah an ti.
22 Cule Joshua in, “Amah ih hnaòuan tum in Bawipa nan hrilnak thu a theitu cu nanmah lala nan si,” tiah a ti. Annih in, “A si, kanmah hi thutheitu kan si,” an ti.
23 Cun Joshua in, “Cuti asile nan lakih a ummi ramdang pathian lem pawl cu hlon thluh thlang uhla Israel ih Pathian Bawipa ih hnenah nan thinlung cu pe thluh uh,” tiah a ti.
24 Israel misenpi in, “ Bawipa kan Pathian kan bia dingih amah ih thupekmi kan thlun ding,” tiah an ti.
25 Curuangah Joshua in cuihsun ah thukamnak cu Israel mi hrangah a tuah ih Shekhem ahcun daan le an thlun dingmi pawl a pek.
26 A cuih daan pawl cu Joshua in Pathian ih pekmi Daan cabu sungah a ngan. Cule Joshua in lungto tumpi a lak ih Pathian hmun thianghlim ih sasua kung hnuai ah a phun.
27 Cun an hnenah, “Hi lungphun hi zoh hnik uh! Kan karlak ah kan thu in theihpitu a si ding. Bawipa in kan hnenih a simmi thu hmuahhmuah cu hi lungphun in a thei thluh. Curuangah nan Pathian dodal tahrat ih ral nan thawh lonak dingah kan thu in theihpitu lungphun a si ding,” tiah a ti.
28 Cule misenpi cu Joshua in a òiakter ih anmah ih comi ram ciar ah an tlung.
Joshua Le Eleazer An Thi
(Thuò 2:6-10)
29 Cuih hnuah Nun ih fapa Joshua, Bawipa ih siahhlawh cu kum za le kum hra a kim ah a thi.
30 Gaash tlang ihsin saklam, Efraim tlangram ih a ummi amah ih ramsung Timnath Serah ah an phum.Ref 24:30 Jos 19:49, 50;
31 Joshua a nun sung hmuahhmuah ah Israel mi cun Bawipa an biak ih a thih hnu khalah Israel hrangih Bawipa ih thil timi a thei thluhtu Israel hotu pawl an nun sung cu Bawipa an biak thotho.
32 Izipt ram ihsin Israel mi pawl in an kenmi Josef ruh pawl cu Shekhem ah an phum. Cuih an phumnak hmun cu Shekhem ih pa Hamor tesinfa hnen ihsin Jakob in ngun tangka zakhat in a leimi a si. Josef tesinfa pawl in ro ih an comi a si.Ref 24:32 Sem 33:19; 50:24-25; Suah 13:19;
33 Aaron ih fapa Eleazar a thi ih Efraim tlangram ih a ummi a fapa Finehas an pekmi Gibeah khua ah an phum.