18
Beel Tuahtu Inn Ah Jeremiah A Feh
Bawipa in Jeremiah hnenah, “Beel tuahtu inn ah vung feh awla cunah thu ka lo sim ding,” tiah i ti. Curuangah ka vung feh ih beel tuahtu pa cu a beel tuahnak lengkual thawn hna a òuan rero lai ka hmu. Beel a tuah tikah tlak a hlum ih a tuahmi a òhat lo ahcun beel dang a duhmi ah a tuahsal.
Cutikah Bawipa in ka hnenah, “Beel tuahtu in tlak in a duhduh a tuah vekin Israel mi nan parah tuah theinak ka nei ve lo maw si? Tlak cu beel tuahtu kut sungih a um vekin nannih khal ka kut sungah nan um. Veikhat khat ah miphun pakhat asilole uknak pakhat ka phawisuak ding, ka khuai òheh dingih ka siatsuah ding ka ti hnuah, cuih miphun cu a thilsual tuahnak ihsin a kirsal a si ahcun ka tuah ding ka timi cu ka tuahsuak lo ding. Sikhalsehla vei khatkhat ah miphun pakhat asilole uknak pakhat ka dinter dingih ka òhansoter ding ka ti hnuah, 10 cuih miphun in ka thu a thlun lo ih sualnak a tuah a si ahcun ka tuah ding ka timi cu ka tuahsuak lo ding. 11 Atu ah Judah mi le Jerusalem mi pawl kha sim aw: An hrangih a òha lomi tuah dingah tumtahnak ka nei ih anmah hrem dingah tim ka tuah rero lai a si. An nunnak sualral hi baang thlang hai seh; an nun zia le an thil tuahmi pawl hi òhin hai seh. 12 Annih cun, ‘Ziangahso kan òhin ding? Kan duh vekin mi lungruh le miòha lo kan si ko pei cu,’ an ti ding,” tiah a ti.
Misenpi In Bawipa An Hnong
13  Bawipa in, “Hibangtuk hi,
khui ram talah a cang dah maw?
Miphun hmuahhmuah sut hnik uh.
Israel mi pawl in thil poimawh an tuah a si.
14 Lebanon ram lungto tlangsangpipi
parah vur tla lo in a um dah maw?
A dai zetmi tlangsang ihsin tiva luangmi
ziangtik talah an kang dah maw?
15 Sikhalsehla ka minung pawl cun in hngilh,
Milem hnenah rimhmui an ur a si.
An fehnak ding lamzin ah an feh ih an bah,
Lamzin hlun an thlun nawn lo;
Sial lomi lamzin sawn an zawh.
16 Hi ram cu tuksumza ah an canter,
Kumkhua ih hmuhsuam dingah.
A kiangih a fehtu le a hmutu pawl,
an mang a bang ding.
An khawruah har in an lu an thing ding.
17 Ka minung pawl cu an ral hmaiah,
ka òhekdarh òheh ding;
Nisuahnak lam thlipi ih
vunnel a sem hlo bangin.
Ka dung ka tun hai ding;
Vansiat malmaknak a thlen tikah
ka bawm hai lo ding,” a ti.
Jeremiah An Phiar
18 Cule misenpi pawl in, “Jeremiah hi ziangtital in kan phiar pei. In zirhtu dingah puithiam pawl le thuron dingah mifim pawl le Pathian thu phuangtu dingah profet pawl an um ringring ko ding. Asinan a parah thu kan tuah pei ih a thusimmi kan ngai nawn lo pei,” tiah an ti.
19 Curuangah hitiin thla ka cam, “Maw Bawipa, ka òongmi hi ngai hram awla ka ral pawl ih an simmi hi run thei hram aw. 20 Òhatnak cu òhatlonak ih rulh ding maw a si? Asinan ka tlaknak dingah khur an lai zo. Na hnenah ra in na thinheng ih na tuahsiat hai lonak dingah ka lo dilnak ka òong na thei ko. 21 Asinan maw Bawipa, an faate pawl cu rawl lo in thi hai seh, ral kut in thi ko hai seh. Nunau pawl khal an pasal le an faate pawl in thihsan òheh hai seh. An pasal pawl cu nat in thi hai sehla an tlangval pawl tla raldonak ah thi òheh hai seh. 22 Rinlopi in an inn ram dingah miburpi thlah awla thinphang in au ciamco hai seh. Keimah tlaknak ah khur an lai ih keimah awk dingah thang an kam zo. 23 Sikhalsehla maw Bawipa, in phiarnak le thah in tumnak cu na thei òheh ko. An òhatlonak cu ngaidam hlah aw; an sualnak khal thlah sak hlah aw. Na mithmuh ah sawnter hai awla na thinheng lai ah siatsuah òheh hai aw,” ka ti.