9
Abimelek
1 Gideonk Gideon cu Jerub-baal ti tla in an ko. ih fapa Abimelek cu a nu lamih sungkhat pawl an umnak Shekhem khua ah a va feh.
2 A nu ih sungkhat pawl hnen ahcun, “Hi khuasung mi pawl hi “Gideon fapa minung sawm sarih ih uk nan duh maw? Asilole minung pakhat ih uk nan duh sawn maw?” tiah sut hnik uh. Keimah cu nanmah ih thi le sa rori ka si tla hi hngilh hlah uh,” tiah ti.
3 A nu ih sungkhat pawl cun khuasung mi hnenah a ti vek cun an sim. An sungkhat a si ruangah khuasung mi pawl cun Abimelek sawn an hril.
4 Cule Baal-berith biakinn sungih ngun tangka sawm sarih an pek; Abimelek in a cuih tangka cun amah thluntu dingah zianghman ih òhahnem lo, mi hlothlau pawl minung sawm sarih a sang.
5 Cule a pa ih khua Ofrah ah a feh ih a pa Gideon sungsuak rori, a unau sawm sarih cu lungto pakhat parah a that òheh. Asinan an nauta bik Jotham cu a rak relh ruangah a luat.
6 Cun Shekhem khua le Bethmillo ih khuasung mi pawl cu an khawm aw ih Shekhem khua ih sasua kungah an feh hnuah Abimelek cu siangpahrang ah an canter.
7 A cuih thu cu Jotham in a theih tikah a feh ih Gerizim Tlang zim ah a ding ih a aw neih patawp in, “Maw Shekhem khuasung mi pawl, i rak thei hram uhla, Pathian khalin lo thei hram seh.
8 Khuahlan lai ah thingkung pawl in anmah ih hrangah siangpahrang an rak hril. An zate in olif thingkung cu “Kan siangpahrang si aw,” an ti.
9 Cutikah olif thingkung in, “Zanthing dang pawl uktu men ah khawzing le minung upatnak ih hmanmi ka hriak hi ka tan siang ding maw si?” a ti.
10 Cun thingkung pawl cun theikung hnenah, “Nang kan siangpahrang si aw,” an ti.
11 Asinan theikung in hitiin a let, “Nanmah pawl uk ding men ah ka rah thaw zet hi ka taan siang ding maw si?” a ti.
12 Cule thingkung pawl in sabit hri hnenah, “Nang tal kan siangpahrang ah cang aw,” an ti.
13 Cutikah sabit hri in hitiin a ti, “Nanmah pawl uk ding men ah khawzing le milai pawl lungawitertu ka sabitti kha ka tan siang ding maw si?” a ti thotho.
14 Cuih hnuah zanthing pawl in hlingbur hnenah, “Nang tal kan siangpahrang ra cang aw,” tiah an ti.
15 Cutikah, “Nan siangpahrang ih in duh ngaingai a si ahcun ra uhla ka thladem ah ra cawl uh. Nan ra cawl lo asile hlingbur sung ihsin meisa a hung suak dingih Lebanon ih a ummi sidar zanthing pawl kha a kang ral thluh ding a si,” tiah hlingbur cun a ti.
16 “Nan thinlung takte le thinlung thiangte in Abimelek hi siangpahrang ah nan cangter a si maw? Gideon le a innsang parah thil dik kan tuah tiin nan ruat maw? Hnaòuan òha a òuan man a ngah tlakmi a ngah tiin nan zum maw?
17 Ciing òha uh; ziangtlukin so ka pa in nan hrangah ral a do! Midian mi pawl ih kut sung ihsin nan luatnak dingah amah ih nunnak hman a ruat lo a si kha!
18 Sikhalsehla tuih sun ah nannih cun a innsang pawl cu an ci in mih nan tum. A fapa sawm sarih cu nikhat ah lungto pakhat parah nan that; cuih tlunah a salnu thawn an hrinmi a fapa Abimelek sawn cu nan sungkhat a si ruang men ah Shekhem siangpahrang ah nan tuah.
19 A òha ko; tuih sun ih Gideon le a innsang parih nan tuahmi hi thinlung takte le thinlung thiangte ih nan tuahmi a si ahcun Abimelek parah nan thinlung kim ko uh; amah Abimelek khal nan parah a lungawi ko seh.
20 Asinan, cuti a si lo ahcun, Abimelek in meisa suahter sehla Shekhem le Bethmillo minung pawl cu kang that thluh seh. Shekhem le Bethmillo mi pawl hnen khalin meisa suak sehla Abimelek cu kang that hram seh,” tiah a au ciamco.
21 Cuih hnuah Jotham cu a tlan hlo. A unau Abimelek a òih ruangah a feh ih Beer ah a va um.
22 Abimelek in Israel cu kum thum sung a uk.
23 Cule Shekhem khua mi le Abimelek hua aw dingah Pathian in remawk lonak thinlung a pek ih khuasung mi le Abimelek cu an ral aw.
24 Hiti a sinak cu Gideon ih fapa sawm sarih pawl a thattu Abimelek par le mi that dingih Abimelek a forhfialtu Shekhem khuasung mi pawl ih parah phulak dingah Pathian ih tuahmi a si.
25 Abimelek bawh dingah Shekhem khua mi pawl in tlang parah mi an thlah. An thlahmi pawl cun a cuih lamzin a zawhtu hmuahhmuah cu an ram ih Abimelek khalin a cuih thu cu a thei.
26 Culai ah Ebed ih fapa Gaal cu a unau pawl thawn Shekhem khua ah an thleng ih Shekhem khuasung mi pawl cun Gaal cu an rinsan zet.
27 Curuangah an lo ah an feh ih an sabit rah an lo ih sabitti an tuah ih puai an tuah ciamco. Cule an khawzing biakinn ah an feh ih an ei an in hnuah Abimelek cu òongsia in an cam an riam.
28 Gaal in, “Ziangahso Abimelek cu kan rian rero? Shekhem khua mi pawl cu ziangce so kan si? Amah cu ziangso a si lem? Gideon ih fapa a si ko lo maw? Amah thu ih a nungmi cu Zebul lawng a si ko lo maw? Ziang hrangah so Abimelek cu kan rian rero ding? Nan cithlahtu Hamor ih minung pawl rian sawnta hmen uh.
29 Aw, hi miphun ih hotu si ningla ka va duh so! Abimelek hnenah, “Na ralkap pawl thawn ra suak uhla kan tawng aw hnik pei cu!” ka ti dingih Abimelek cu a van a duaimai ding nain!” tiah a ti.
30 Cutiih Gaal ih òongka cu Shekhem khua uktu Zebul in a theih tikah a thin a heng ngaingai.
31 Curuangah Arumah ah Abimelek hnen ahcun mi a thlah ih, “Ebed ih fapa Gaal le a unau pawl cu Shekhem ah an ra ih khuasung mi pawl nangmah dodal dingin an ra forh rero a si.
32 Curuangah na ralkap pawl thawn a zanzan in ra pok uhla hramlak in bawh uh.
33 Cule thaizing nisuak ah tho in rinlopi ah Shekhem khua cu nam uh. Gaal le a ralkap pawl in an lo do tikah nasa zet in do uh,” tiah a cah.
34 Curuangah Abimelek le a ralkap pawl cu a zanzan in an pok ih bur li in Shekhem khua kiangkap ah an thup aw.
35 Gaal cu khuasung ihsin a feh ih hnarpawn ah a va ding. Cule Abimelek le a ralkap pawl cu an thuhawknak ihsin an suak.
36 Abimelek le a ralkap pawl cu Gaal in a hmuh tikah Zebul hnenah, “Zoh hnik, tlang par ihsin mi an run khi!” a ti.
Cutikah Zebul cun, “Khikhi cu tlang parih phenthlam an si ih, minung ah na neih men a si ko lo maw,” tiah a ti.
37 Cule Gaal cun, “Zoh hnik aw, tlangkawn ihsin minung an run khi; a hrek cu Pol Sasuakung timi lamzin ihsin an run khi!” tiah a ti thotho.
38 Cutikah Zebul cun Gaal hnenah, “Na porh awk rero sikhawh ziangtinso? Ziangahso Abimelek cu kan rian duh rero ding, a titu cu nangmah na sisi. Himi pawl cu hnihsuahsainak ih na hmanmi pawl an si ko lo maw! Va feh awla va do hnik hmen!” tiah a ti.
39 Gaal in Shekhem khuasung mi pawl cu a hruai ih Abimelek cu an va do.
40 Asinan Abimelek in a neh ih Gaal cu a zamhlo. A ralkap pawl tampi an thi ih an khua hnarpawn tiang an ruak cu a ril teptep.
41 Abimelek cu Arumah ah a kirsal; cule Gaal le a unau pawl cu Shekhem khua ah um thei lo dingin Zebul in a dawi.
42 A thai sun ah Shekhem khuasung mi pawl cu hramlak ah an feh ih a cuih thu cu Abimelek in a thei.
43 Abimelek cun a ralkap pawl a ko khawm ih hmun thum ah a òhen hnuah hramlak in an rak bawh. Khuasung ihsin an suah kha Abimelek in a hmu ih an bawhnak ihsin a suak ih a do.
44 Abimelek le a homi ralkap bu khat pawl cu zamrang tein hmaiah an nor ih khua kotka sangka ah an òang. A dang ralkap bu hnih pawl in an ral pawl cu an do ciamco ih hramlak ahcun an that òheh.
45 Cule Abimelek in khuasung mi pawl cu sun nihlawh a do. Cuih khua cu a lak ih khuasung mi pawl a that òheh. An khuapi a balsiat thluh ih leilung cu ci a phulh ruangah ci in a khuh thluh.l Ci in a khuh thluh timi cu leilung a siatsuah òheh tican a si.
46 A cuih thu cu Shekhem khua ralhruang ih a ummi khuasung upa pawl in an theih tikah Baal-berith khawzing biakinn ruhkulh sungah an relh.
47 Cutawkih an relh cu Abimelek in a thei.
48 Curuangah a ralkap pawl thawn Zalmon tlang parah an kai. Hreitlung a lak ih thinghnge a tan ih a liang in a put. A ralkap pawl khal amah vekih tuah thluh dingin thu a pek.
49 Cutiin thinghnge cu an khawm fingfing ih Abimelek cu an thlun ih ruhkulh kap ahcun an pen. Meisa in an ur ih Shekhem ruhkulh sungih a ummi hmuahhmuah cu an thi thluh. A thi mi cu nunau mipa an zate in thawngkhat tluk an si.
50 Cuih hnuah Abimelek cu Thebez khua ah a feh ih a kulh thluh hnuah cuih khua cu a lak.
51 An khuasung ahcun a fek zetmi ralhruang a um ih a sungah cun nunau siseh, mipa siseh, an hotu pawl tiangin an relh thluh. A sunglam in sangka an hren ih inn diphun ah an kai.
52 Cule Abimelek in ralhruang cu a ra do. Ralhruang cu meisa in ur dingah sangka a rak naih.
53 Culaifang ah nunau pakhat in tlunlam in fang rialnak lungphengpi in a lu ah a vun thlak ih a luruh a kuai.Ref 9:53 2 Sam 11:21;
54 Cutikah Abimelek cun a hriamnam kengtu tlangvalpa cu zamrang tein a ko ih, “Na ralnam zuuk awla i that aw. Nunau kut in a thi a si, tiih an rel ding ka duh lo,” tiah a ti. Curuangah tlangvalpa cun Abimelek cu a dawt ih a thi.
55 Cule Israel ralkap pawl in Abimelek a thih an hmuh tikah an inn ciar ah an tlung thluh.
56 Cuticun a unau sawm sarih a that ih a pa parih thil sual a tuahmi ruangah Pathian in Abimelek cu a thungrul ve a si.
57 Cuvek thotho in an nun sualnak ruangah Shekhem khua mi pawl khal Pathian in a thungrul ve. Gideon ih fapa Jotham in a camsiat vekin an parah a kim òheh a si.