58
A Dikmi Rawl Ulhnak
Bawipa in, “Ring zet in au uh! Nan aw neih tawp in au uh! Israel ka minung pawl kha an sual zia sim uh! Nitin tein bia ih ka daan thlun ah le a dikmi tuah ah an ruat aw. Anmah thluasuah dingah le daan òha pe dingah in dil a si,” a ti.
Misenpi pawl in, “ Bawipa in, in hmu lo a si ahcun ziangahso rawl kan ulh rero? Zianghman ih a siar lo a si ah ziangahso rawl lo in kan tuar duh rero?” tiah an sut.
Bawipa in an hnenah, “A hman tein kan ti ahcun, rawl ulhnak cu nanmah ih duhmi hawlnak ah le nan hnaòuantu pawl hremnak ah nan hmang a si. Mi thihnai suahter nan òih lo; nan sual aw ih nan to aw. Hibangtuk nan rawl ulhnak ruangah nan thlacamnak ka ngai dingah maw si nan ruat? Rawl nan ulh tikah zonzaih nan pe aw; hrampi kung bangin nan lu cu nan kuun; nan ih-nak ah buri puan le vutcam nan phah. Cumi maw rawl kan ul nan ti? Cumi parah ka lung a awi dingah nan ruat maw si?
“Kei ih ka duhmi rawl ulhnak cu hibangtuk a si. Thir cikcin bangih nan mi hremnak le kawn vekih mi a delhtu a hmanlo in mi nan tuahnak pawl hi hlon òheh uhla nan hrem mi pawl hi luat thlang hai seh. Nan tirawl cu rilrawngmi thawn òawm aw uhla nan inn tla cu inn nei lo mifarah hrangah ong uh. Hnipuan hruk ding nei lomi hnenah hnipuan pek uhla nan sungkhat bawm ding tla el hlah uh!
“Cutikah ka tleunak cu nan parah zinglam nisuak bangin a tlang dingih nan hma tla cu zamrang zet in a dam ding. Nan hnenah ka um ringring dingih ka lo run ding. Nan hnenih ka um ruangah nan him ding. Thla nan cam tikah ka lo let ding; in kawh tikah ka lo sawn ding.
“Mi nan hremnak hi nan hlon òheh ih mi nan hmuhsuamnak le nan òong òha lo pawl nan cemter lawng si lo in, 10 rilrawngmi an pum nan puarter ih mitlasam pawl an òulmi nan pek a si ahcun a lo kulhtu khawthimnak hi sun nitleu ah a cang ding. 11 Cule ka lo hruai ringring dingih leilungtlun ih thilòha in ka lo kimter ding. Ka lo damter dingih ka lo cakter ding. Tidai a tam zetmi hmuan bangtuk nan si ding; a kang dah lomi ticawm bangtuk nan si ding. 12 A siat òhehmi le hnawmpen ih a cangzo mi cu nan minung pawl in a hram hlun parah an saksal ding a si. A kiak cia mi remsaltu le a siat òheh zomi inn pawl a sak saltu tiah ciin ringringmi nan si ding,” tiah a ti.
Nizarh Ni Ulh Man
13  Bawipa in, “Sabbath ni cu nizarh ah nan tuah ih nanmah ih duhnak hawl ni ah nan hmanglo ih, cuih ni ah khualtlawng lo in, hnaòuan lo in le duhdah ih òong lo in um tahrat in hi ka ni cu nan thianghlimter ih nan sunloih a si ahcun, 14 Keimah in rennak sung ihsin a suakmi lungawinak cu nan co ding. Leilung pumpuluk ah upat mi ah ka lo tuah ding. Nan pu Jakob hnenih ka pekmi ram cu lungawi aipuang zet in nan luah ding. Bawipa keimah in ka sim zo a si,” tiah a ti.