42
Bawipa Ih Siahhlawh
1 Bawipa in,
“Ka siahhlawh cu hinah a um;
Amah cu ka cakter mi le ka hrilmi a si,
A parah ka lung a awi.Ref 42.1 Mat 3:17; 17:5; Mar 1:11; Luk 3:22; 9:35;
Ka thlarau in ka khahter zo ih
miphun hmuahhmuah hnenah
thuding a thlengter ding.
2 A au lo dingih a aw tla a sang lo ding;
Lamzin khalah ring zetzet in
thu a sim lo ding.
3 A sawn ih a kiak zikmi phaikung
a khiak lo ding,
A mit zikmi mei-inn khal a hmit lo ding.
Mi hmuahhmuah hnenah kumkhua in
thuding a thlengter ding.
4 A bei a dong lo dingih a thin tla
a nau lo ding;
Leilungtlun ah thuding a lengter ding.
Lamhlapi ram pawl in a thuzirhmi cu
an hngakhlap ding,” tiah a ti.Ref 42.1-4 Mat 12:18-21;
5 Pathian in van tla khi a semsuah ih a pharh;
Leilung le nunnak a neimi
thil hmuahhmuah a tuah.Ref 42.5 Tirh 17:24, 25;
Bawipa Pathian in, a siahhlawh
minung hnenah nunnak thaw a pek.
6 “ Bawipa keimah in
ka lo ko ih huham ka lo pek,
Leilungtlun ah thuding a lennak dingah.
Nangmah sungin mi hmuahhmuah thawn
thukamnak ka tuah ding.Ref 42.6 Isa 49:6; Luk 2:32; Tirh 13:47; 26:23;
Nangmah sungin miphun tampi hnenah
tleunak ka thlenter ding.
7 Mitcaw pawl ih mit cu na vangter dingih,
A thimmi thawnginn sungih
a tomi pawl cu na luatter ding.
8 “Keimah lawng hi
Bawipa na Pathian ka si.
Ka huham cu khawvang dang
ka hlawm lo ding,
Ka sunlawinak khal milem pawl
ka òhen lo ding.
9 A ra thleng ding tiih ka rak sim cia mi cu
an thleng ngaingai zo.
Atu ahcun thil thar ka lo sim ding,
An thlen hlan ihsin ka lo sim cia ding,” a ti.
Thangòhatnak Hla
10 Bawipa ih hnenah hla thar sak uh;
Leilung pumpi in amah thangòhatnak
hla sak uh.
Tifinriat parih a fehtu pawl in
Amah cu thangòhat uh;
Tifinriat sungih a ummi pawl khalin
thangòhat uh.
Lamhlapi ram ah a ummi khalin
thangòhat cio uh.
11 Nelrawn le nelrawn khua pawl in
Pathian cu cawimawi hai seh.
Kedar mi pawl khalin cawimawi hai seh!
Sela khua ih a ummi in tlangsang parih sin
lungawi in au ciamco hai seh!
12 Lamhlapi ih a ummi pawl in
Bawipa ih hnenah thangòhatnak le
sunlawinak pe hai seh!
13 Bawipa cu micak bik bangin a feh;
Raldo dingah a timtuah ih
a hngakhlap zet a si.
Raldo dingah a au ih neh dingah a au ciamco.
A ral pawl hnenah a huham a hmuh.
Bawipa In A Minung A Bawm Ding
14 Pathian in, “Tikcu reipi dai tein ka um zo;
Ka minung pawl ka sawn lo.
Atu cun ka thok thlang ding;
Nau nei ding nunau bangin ka hruum ka ai.
15 Tlangmual le tlangsang pawl
ka siatsuah ding;
Hrampi le thingkung pawl
ka carter òheh ding.
Tiva horkuam pawl cu nelrawn ah
ka tuah dingih,
Ticawm pawl ka kaangter òheh ding.
16 “Ka minung mitcaw pawl ka hruai ding;
An feh dah lonak lamzin ihsin.
An khawthimnak cu tleunak ah
ka thleng ding;
An hmaiih zin bingbo cu ka ngilter òheh ding.
Hi pawl cu ka tuah tengteng ding.
17 Milem a rinsantu pawl le
cui milem pawl ka pathian a titu cu
an ning a zak dingih
mual an pho ding a si,” a ti.
Israel Ih Thu Theih Lo zia
18 Bawipa in,
“Nannih hnaset pawl, òha tein ngai hnik uh!
Nannih mitcaw pawl, naihten zoh hnik uh!
19 Ka siahhlawh hnakih mit a caw sawn
an um pei maw?
Palai ka thlahmi hnakih hnaset sawn
an um pei maw?
20 Maw Israel, na hmuh mi le
na tonmi hi a tam zet zo;
Asinan na hrangah zianghman santlai an si lo.
Theihnak ah hna na nei;
Asinan na theih fel ngaingai mi
ziangso a um?” tiah a ti.
21 Bawipa cu mi run ding
a hiar zettu Pathian a si;
Curuangah a daan le a thuzirhmi kha
a sunloih ih,
A minung pawl khalin upat hai seh ti a duh.
22 Sikhalsehla a minung pawl cu
mi in an ram;
Leilung kua sungah an khum ih,
Thawnginn hlatpi ah an thup hai a si.
Thilri rammi le lonmi an si;
Anmah humtu dingah zohman an um lo.
23 Hi thuhla hi a theitu zotal nan um maw?
Tuihnu cun òha tein
nan ngai thlang lo ding maw?
24 Israel hi mi ramtu pawl kut ih
a petu hi zoso a si?
Bawipa amah a si;
Kan dodal ih a parah sualnak
kan tuahmi Bawipa a si.
A duhnak vekin kan nung thei lo;
A thupekmi vekin kan thlun thei fawn lo.
25 Curuangah a thinhennak in tuarter ih,
Raldo harsatnak in tongter a si.
A thinhennak cun meisa bangin
Israel ram pumpi a kang;
Sikhalsehla ziang a cang rero
ti kan thei dah lo;
Hi hmuahhmuah ihsin
zianghman kan zir ngahmi a um cuang lo.