36
Assiria Mi In Jerusalem Sim An Tum
(2 Siang 18:13-27; 2 San 32:1-19)
1 Siangpahrang Hezekiah in Judah ram a uknak kum hleili kum ah Assiria ram siangpahrang Sennakherib in ralhruang in kulhmi Judah ram khua pawl a do ih tampi a la.
2 Cuih hnuah a kutthuai ih bawi upa bik cu ralkap tampi thawn Judah siangpahrang Hezekiah cu remnak tuahter dingah Lakhish ihsin Jerusalem ah a thlah. Cui a thlahmi bawi cu puan taktu pawl hnaòuannak lamzin, tlunta tili ihsin tidai an laknak tihriat kiangah a um.
3 Cutikah Judah mi upa pathum in an va tong: Siangpahrang inn hnaòuantu pawl hotu Hilkiah ih fapa Eliakim, zung cazipi Shebna le cazin kaitu Asaf fapa Joah an si.
4 Assiria ralbawipa cun, “Ziangahso siangpahrang Hezekiah hi amah le amah zum aw zet in a um? tihi kan siangpahrang in a thei duh.
5 Òong menmen hin ralkap lam cahnak le thiamnak hi a ai awh thei ding tiah nan ruat maw si? Keimah do dingah hin zo in, in bawm ding tiah so nan ruat?
6 Ka thei ko, Izipt in, in bawm ding tiah nan zum. Sikhalsehla Izipt rinsan cu ziang a bang nan thei maw? Kianghrol ah phaipheng kuang hman vek a si-a kiak ih na kut a lo at. Izipt siangpahrang an rinsan tikah cun cubangtuk a si ringring ko.
7 “Asilole Bawipa nan Pathian nan rinsan a si maw? Hezekiah in biakòheng pakhat lawngah Pathian nan biak ding tiah Judah le Jerusalem mi pawl thu a pekih a dang biakinn le biakòheng pawl hmuahhmuah a bal òhehmi kha nan Pathian biakinn le biakòheng pawl sokhaw an si!
8 Asile kan siangpahrang hmin in thu ka lo tiam pei! Rang thawnghnih ka lo pe ding, a totu dingah minung cuzat na hmu thei ding maw?
9 Kan Assiria ralkap bawi lakih ralbawi nauta bik hman nan tluk lo sokhaw! Cui tlunah Izipt in rangleng le rangpar ralkap pawl in kuat ding nan hei ti lai sapbai!
10 Nan ram ka do ih ka siatsuah hi Bawipa ih bomnak a tello ah maw si nan ruat? Bawipa amah rori in nan ram do dingah le siatsuah dingah i fial a si,” tiah a ti.
11 Cutikah Eliakim, Shebna le Joah in cuih ralbawipa hnenah, “Kan hnen ahcun Aramaik òong in òong aw! Kan thei ko sokhaw. Hebru òong cun òong hlah; phar parih a um mi hmuahhmuah in, in ngai a si,” tiah an ti.
12 Assiria ralbawipa cun, “Hi ka thusimmi hmuahhmuah hi nanmah le nan siangpahrang hnen lawng ih sim dingah kan siangpahrang in i thlah ah maw nan ruat? Si hlah e; phar parih a totu pawl hnen khalah hi thu hi sim ding ka si; ziangahtile nanmah tla ih nan tuah ding vek thotho in annih khalin an eek an ei dingah an zun an in ding a si,” tiah a ti.
13 Cule ralbawipa cu a ding ih Hebru òong in, a aw neih patawp in a au ih, “Assiria siangpahrang in nan hnenih a òongmi hi ngai hnik uh.
14 Hezekiah in lo bum rero hlah seh, tiah ralrinnak a lo pek a si. Hezekiah cun a lo run theilo ding.
15 Bawipa rinsan dingih a lo forhnak cu lung hlah uh; Bawipa in, in run dingih kan khuapi cu Assiria ralkap pawl a lakter lo ding, tiah zum duh hlah uh!
16 Hezekiah thu cu zum hlah uh. Assiria siangpahrang in atu ah nan khuapi sung ihsin ra suak in remnak tuah dingah thu a lo pek a si. Nan sabit hri ih sabit cu eiter nan si ko ding; nan theipi kung ihsin theipi cu nan ei ko dingih nan tikhur in tidai cu nan in ko ding.
17 Cule kan siangpahrang in nan ram vek rori a simi ram ah a lo umter dingih cutawkah sabitti nan in theinak dingah sabit hri a um ve ko ih sang tuah dingah fang a um ko.
18 Bawipa in, in run ko ding, tiah ruat dingah Hezekiah in nan thinlung cu lo mol rero hlah seh. Assiria siangpahrang in ram tampi a do tikah an ram ih khawvang pawl in an ram an run suak, ti nan thei dah maw?
19 Khuiahso Hamath le Arpad khawvang pawl an si òheh? Khuiahso Sefarvaim khawvang pawl an um? Zo talin Samaria ram an run maw?
20 Ram hizat ih khawvang pawl lakah khawvang pakhat talin an ram cu Assiria siangpahrang kut sungin an run maw? An run lo a si ruangah nannih teh nan Bawipa in Jerusalem a run ding tiah ziangtinso nan zum thiam?” tiah a ti ciamco.
21 Cutikah misenpi cu an dai khepkhep; Siangpahrang Hezekiah ih a rak tiamcia bangin an dai ih zianghman an sawn lo.
22 Cule Eliakim, Shebna le Joah cu riahsia in an hnipuan an thlekih Assiria ralbawipa ih òongmi hmuahhmuah cu an siangpahrang hnenah an va sim.