19
Pathian In Izipt A Hrem Ding
1 Izipt hrangih a thleng mi thu:
Bawipa cu zamrang zet in mero parah a to ih Izipt ah a ra a si. A hmaiah Izipt ih milem pawl cu an khur ih Izipt mi pawl ih ralòhatnak cu a hlo.
2 Bawipa in, “Izipt ram sungah mah le mah doawknak ral ka thoter ding; unau le unau an do aw dingih innhnen le innhnen tla an ral aw ding. A hua aw mi khua pakhat le pakhat an do aw dingih a ral aw mi siangpahrang pawl cu miuk theinak huham duh ah an do aw ding.
3 Izipt mi pawl ih tumtahmi cu ka siatbal òheh dingih an thinlung ka siatter ding. An milem hnenah bomnak an dil ding; pol an leeng dingih mithi thlarau pawl thu an ron ding.
4 Izipt mi pawl cu miher le mi puarthau kut sungah ka pe dingih mi zangfah nei lo siangpahrang in a uk hai ding. Cungnungbik Bawipa Keimah in ka sim zo a si,” tiah a ti.
5 Nail tivapi ah tidai a malzet dingih nuamte in a kang òheh ding.
6 A tiva òek pawl cu an nam zet dingih an car òheh ve ding. Phaipheng le phok pawl cu an vuai òheh ding;
7 Nail tivakap ih cinmi rawl kung hmuahhmuah an car òheh dingih thli in a semhlo thluh ding.
8 Nail tivapi ih ngakaih in pum a cawmtu hmuahhmuah an hruum an ai ding; an sio le an sur pawl cu a lak an si òheh ding.
9 Puanthan tuahtu pawl an thin a nau ding;
10 thiamtaktu le zungthiam pawl cu an thin a pit dingih an van a sang ding.
11 Zoan khua ih hotu pawl cu mi-aa hlir an si! Izipt mifim bik pawl in at-thlak thu an forh. Hlanlai siangpahrang le mifim pawl ai awhtu kan si tiah ziangtinso siangpahrang an sim ngam?
12 Maw Izipt siangpahrang, khuiahso na mifim pawl an si òheh? Cungnungbik Bawipa in Izipt hrangih tumtahnak a neihmi hi an lo sim thei hmang ding nain!
13 Zoan le Memfis hotu pawl cu mi-aa an si! An miphun hruaitu ding an sinain an hruaisual zo a si!
14 Bawipa in thinlung buainak a pek hai ih an thusimmi khal a buai òheh. Curuangah Izipt in thilsual lawnglawng a tuah ih zuri pa cu amai luak par lala ih a sawn vekin Izipt cu a sawn rero a si.
15 Izipt ram sungah milian siseh, mifarah siseh, mitum siseh, minauta siseh, a bawm theitu zohman an um lo.
Izipt In Bawipa A Biak Ding
16 Izipt mi pawl cu nunau bangih an òihhrut caan a ra thleng ding. Cungnungbik Bawipa in anmah hrem dingih a kut a thlir kha an hmuh tikah an tuksum in an òhia thlohthlo ding.
17 An hrangah Bawipa in a ruah cia mi an theihsal tin tein Izipt mi in Judah mi pawl cu an òih ringring ding.
18 Cui caan a thlen tikah Izipt khua panga ah Hebru òong an hmang ding. Cutawkih a ummi pawl in siatserh ih thu an kam tikah Cungnungbik Bawipa hmin in an kam ding. Khua pakhat cu, “Ni khuapi,” tiah an ti ding.
19 Cui caan a thlen tikah Izipt ram ah Bawipa ih hmin in biakòheng pakhat an dawl dingih Izipt ramri ah a hmin in lungphun an phun ding.
20 Cupawl cu Izipt ram ah Cungnungbik Bawipa a um ti khihhmuhnak an si ding. Cutawkih a ummi pawl in hremnak an tuar ih bomnak dilin Bawipa an kawh tikah anmah runtu dingah Bawipa in mi pakhat a thlah ding.
21 Izipt mi hnenah Bawipa cu a lang leh ding. Cutikah Bawipa cu an òihzah ding, an biak dingih a hnenah thawinak le laksawng an keng ding. A hnenah thu fekten an kam dingih an thukammi vekin an tuah ding.
22 Izipt mi pawl cu Bawipa in a hrem ding, asinain a damtersal hai ding. Amah lam an hoi dingih an thlacamnak a theih sak dingih a damter hai ding.
23 Cui caan a thlen tikah Izipt le Assiria karlak ah lamzinpi a um ding. Hi ramhnih ih minung pawl cu ol tein an tlawng aw thei dingih hmunkhat ah Pathian an bia tlang ding.
24 Cui caan a thlen tikah Israel cu Izipt le Assiria thawn an òangtlang dingih an ramthum cu leilung pumpi hrangah thluasuah an si ding.
25 Cungnungbik Bawipa in thluasuah a pe hai dingih, “Izipt ka minung, Assiria ka kut tuahmi, le Israel ka hril mi, nan parah thluasuah um hram seh,” a ti ding.Ref 19.1-25 Jer 46:2-26; Ezk 29:1-32:32;