10
Nan cem riai a si! Ka minung pawl hrem duh ah a dinglo mi daan nan tuah! Mifarah le mizonzai pawl in an covo an co lo ih an thu nan theih sak lo. Cuticun nuhmei le nu pa nei lo farah pawl ih thilri pawl nan long a si. Pathian in a lo hrem tikah ziangso nan tuah ding? Nan parah lam hlatpi ihsin harsatnak a rathlen tikah ziangtinso nan um ding? Bomnak hawl in zohnen ah so nan tlan ding? Nan thilri le nan lennak pawl hi khuiahso nan thuh ding? Raldonak ah nan thi ding; asilole an lo kai dingih an lo hruaihlo ding a si. Cui hnu hmanah Bawipa ih thinhennak cu a dai hrih lo; hrem dingah a kut cu khai cia in a um lai a si.
Pathian In Assiria Siangpahrang A Hmang
Bawipa in, “Ka thin i hengtertu pawl thawinak ih ka hman mi talhtum cu Assiria a si. Ka thin ai a thoktertu, Pathian òihzah lotu pawl do dingah Assiria ka thlah a si. An thilri long dingah le an minung pawl lamzin hnawmhne bangih pal cih dingah ka thlah a si,” a ti.
Asinan Assiria siangpahrang in mi thisen luannak ding tumtahnak a rak nei ve. Ram tampi siatsuah ding a tum. Tluang a khawngih, “Ka ralkap hotu ralbawi pawl cu siangpahrang an si òheh! Kalno le Karkhemish khua pawl ka neh. Hamath le Arpad khua pawl tla ka neh fawn. Samaria le Damaskas khuapi pawl tla ka la zo. 10 Milem a betu ram pawl daantattu dingah ka kut ka hawi zo; an milem pawl cu Jerusalem le Samaria ih milem hnakin an tam sawn a si. 11 Samaria le a milem pawl ka siatsuah thluh zo bangtukin Jerusalem khua le cutawkih an biak mi milem pawl cu ka siatsuah òheh ding a si,” a ti.
12 Sikhalsehla Bawipa in, “Zion Tlang le Jerusalem parih ka tuahmi pawl ka òheh tikah Assiria siangpahrang khal cu a tluangkhawn le a puarthau ruangah daan ka tat ding,” a ti.
13 Assiria siangpahrang in, “Keimah ih’ tuah òhehmi a si! Ka cak, ka fim ih theihthiamnak ka nei a si. Ramkhat le ramkhat karlak ramri pawl cu ka siat òheh ih an rawl khawl mi pawl cu ka lak òheh. Cawcang bangin, cutawkih a ummi pawl cu ka palbeek òheh. 14 Leilung tlunih ram pawl cu vate bu vek an si ih an lennak le an sumsaw pawl cu vate ti kan laak vekin ol tein ka laak a si. Keimah dawi dingah, thla khawng ngamtu zohman an um lo. Ka aang ngamtu khal an um lo,” tiah tluang a khawng ciamco.
15 Asinan Bawipa cun, “Hreitlung in a hmangtu hnakin ka tum sawn, a ti thei pei maw? Hluah in thing attu hnakin ka thupi sawn, a ti pei maw? Talhtum in minung a keng lo; minung in talhtum a keng a si,” a ti.
16 Cungnungbik Bawipa in atu rawlkhop ih a nungmi pawl hi hrem dingah natnak a thlenter ding. An taksa ruangpi sungah natnak cu meisa kang bangin a kang ding. 17 Pathian amah, Israel ih tleunak cu meisa ah a cang ding. Israel ih Pathian thianghlim cu mei-alh ah a cang dingih ni khat sungah ziang hmuahhmuah, hling le so tiangin, a kang òheh ding. 18 Tupi ruul zetzet le loram òhaòha pawl cu natsia in milai a siatsuah bangin a siatsuah thluh ding a si. 19 Thingkung a tangmi tla a malzet dingih nauhak tualleng hman in a siar thei ding.
Mi Malte An Kir Ding
20 Israel mi pawl sungin a tangmi mi malte in anmah a siatsuahtu ram rinsan nawn lo in Israel ih Pathian thianghlim Bawipa sawn an rinsan tikcu caan a thleng ding. 21 Israel mi sungin mi malte cu a cakmi an Pathian hnenah an kirsal ding. 22 Atu ahhin Israel mi cu Tifinriat kapih vunnel zat in an tam nain a kirsal mi cu mi malte an si ding. Mi tam sawn hrangah cun hlohralnak cu retsak cia a si ih an ton ding hrimhrim a si. 23 A si, hi ram pumpi sungah Cungnungbik Bawipa in a sim cia vekin, siatsuahnak a thlenter ding a si.Ref 10.22, 23 Rom 9:27, 28;
Bawipa In Assiria A Hrem Ding
24 Cungnungbik Bawipa in Zion ih a ummi a minung pawl hnenah, “Izipt mi in nan parih an rak tuah zo vekin Assiria mi khalin an lo hrem ih nan tuarzet nain òih hlah uh. 25 Rei lo teah nan parih hremnak ka thlenter mi cu ka rehter dingih anmah sawn ka siatsuah thlang ding. 26 Oreb Lungpi ih Midian mi pawl ka rak vuak bangtukin Cungnungbik Bawipa Keimah in ka fungin ka vuak hai ding. Izipt mi ka tuarter zo bangin Assiria mi pawl ka tuarter ve ding. 27 Cui caan a thlen tikah cun a cakmi Assiria kut sung ihsin ka lo suah dingih an kawn cu nan hngawng ah thilrit a si nawnlo ding,” tiah a ti.
Ral In An Nam
28 Ral pawl in Aih 10:28 Ai ti mi hi Ai-ath ti tla a si thei ih, cang 28-32 kar ih a ummi khua pawl hi saklam ihsin Jerusalem nam dingih an runnak lamzin tluan ih a ummi khua pawl an si. khua an la. Migron an lan zo. An rawl cu Mikmash ah an ret. 29 Cui tlangkawn an run tan ih Geba ah an riak. Ramah khua mi pawl cu an thin a phangzet. Siangpahrang Saul ih khua Gibeah khua mi pawl cu an tlanhlo òheh. 30 Gallim mi pawl au hnik uh! Laishah mi pawl ngai hnik uh! Anathoth mi pawl in sawn hnik uh! 31 Madmenah le Gebim khua mi pawl cu thih òih ah an tlan ciamco.
32 Tuih sun ah ral cu Nob khua ah an um ih Zion Tlang le Jerusalem khuapi lamah an kut tum an hawi ciamco.
33 Cungnungbik Bawipa in thinghnge thlakmi bangin a thla hai ding. Anmah lakih a puarthau bik le a sang bik khal cu sattan mi le namthlak mi a si ding. 34 Tupi laifangih thing pawl tla hreitlung ih an hau vekin le Lebanon ih thing òha bik tla an thluk vekin Bawipa in anmah tla cu a thlu ding a si.Ref 10.-34 Isa 14:24-27; Nah 1:1-3:19; Zef 2:13-15;