2
Bawipa In Habakkuk A Run Sawn
1 Ka ralvennak donhleisang ah ka hung kai dingih Bawipa in ka òong dingmi ziangvek i sim ding tile ka phunzainak kha ziangtin i sawn ding, ti ka hngak ding.
2 Bawipa cun hitiin i run sim, “Na hnenih ka langtermi cu vei khat zohnak in siar thei dingah lungpheng parah fiang tein ngan aw.
3 Ngan fel aw, ziangahtile a kimnak tikcu a si hrih lo. Asinan cuih tikcu cu zamrang in a ra thleng dingih ka lo hmuhmi cu a kim ngaingai ding. A kimnak tikcu a tlai vek a bang ding nain thinsau in hngak aw; a kim tengteng dingih a tikcu cu a tlai nawn lo ding.Ref 2.3 Heb 10:37;
4 Cuih thu cu: ‘Miòha lo pawl cu an luat lo ding; sikhalsehla miding pawl cu Pathian rin tlak an si ruangah an nung ding,’ tihi a si,” tiah a ti.Ref 2.4 Rom 1:17; Gal 3:11; Heb 10:38;
Miding Lo Pawl An Cem
5 Lennak cu mibum a hmang. Mi duhham pawl cu an puarthau ih dai tein an um thei lo: Thihnak vekin khawh ti an nei dah lo. Mithi khua Sheol bangtuk an si: A tawk zo an ti dah lo. Curuangah a si miphun pakhat hnu pakhat anmah ih hrang lawnglawng ah an neh ciamco.
6 Nehmi pawl in nehtu pawl cu an roh hai dingih an nautatnak an langter ding. “Nan ta a si lomi nan lak; asinain nan cem ve ding. Lei a lo baktu pawl leiba pe dingah hnekcih tahrat in nan lian deuhdeuh; ziangtik tiang so cutin nan tlanlen vivo hrih ding?” an ti hai ding.
7 Asinan nan theih man hlanah, nannih mi nehtu cu leiba neitu ah nan cang ve dingih midang in paisa òhang pe dingah an lo hnekcih ve ding. Ral pawl an ra dingih nan òih ruangah khur thlohthlo in an lo tuah ding. An lo ram ciamco ding!
8 Miphun tampi cu nangmah in na ram. Asinan a nungsun pawl in, mi tampi na thah zo ruangah le leilung pumpi khuapi pawl le an minung pawl na tisiat òheh ruangah an lo ram ve ding.
9 Na cem a si! Midang siatsuah tahrat in na innsang cu na lianter; na umnak inn cu siatsuahnak le òihphannak ihsin himseh tiah na ngaihtuah ciamco.
10 Sikhalsehla na ngaihtuahnak cu a lak an si, na innsang ningzahnak a thlentu sawn an si. Miphun tampi na siatsuahnak in nangmah parah siatsuahnak na thlenter zo a si.
11 Phar ih dawlmi lungto hman cu nangmah dodal in a au dingih innbo in aw-khawk in a run sawn ding.
12 Na cem a si! Khuapi cu mi siatsuahnak thawn na din ih mi thahnak thawn na sak a si.
13 Na nehmi miphun pawl in an tha cem ko in thil òhahnem lo hna an òuan ih an sak cia mi pawl cu meisa in a kang òheh. Cumi cu Cungnungbik Bawipa ih thil tuahmi a si.
14 Asinan tifinriat cu tidai in a khah vekin leilung cu Bawipa ih sunlawinak theihnak in a khat ding.Ref 2.14 Isa 11:9;
15 Na cem a si! Na thinheng ah na innhnen pawl ningzak in na tuah ih an mual na photer; zuri bangin na tlukter.
16 Curuangah nang khal upatnak cotu si lo in ningzahnak in na khat ding. Nangmah rori zu na in dingih na sawn in na ril ding a si. Bawipa in nangmah hremnak khuathai a lo inter dingih upat hminòhatnak na neihmi cu mualphonak ah a cang ding.
17 Lebanon tupi ih thing na hau òheh; atu ahcun nangmah hau na si ding. A ramsa pawl na that hai; atu ahcun ramsa pawl òihnak thawn na khat ding. Leilung pumpi minung le an khuapi pawl na siatsuah ruangah le milai tampi na thah ruangah hibangtuk in na parah a thleng ding a si.
18 Milem in ziangso òhathnemnak a neih? Milai ih tuahcopmi thil pakhat men a si ih thuphan dah ti lo a lo sim theimi zianghman a um lo. Milem tuahtu in a tuahmi cu a rinsan tikah ziangso a hrangah a òhahnem? òong hman a òong thei lomi khawzing cu!
19 Na cem riai a si! Thingtan hnen ahcun, “Òhang aw,” na ti. Lungtlep khat hnenah, “Tho aw,” na ti. Milem in na hnenah langter theimi ziangtal a nei maw? Sui le ngun in khuutmi a si ding nain a sungah nunnak a um lo.
20 Bawipa cu a Biakinn thianghlim sungah a um. A hmaiah leitlunmi hmuahhmuah cu dai tein um seh.