10
Judah mi pawl ih Daan cun a ngaingai a simi kha felte le kim tein a langter thei lo; a ra thleng dingmi thil òha ih thluathlam lawng a si. An tuah òheumi raithawinak kha kumtinte an tuah ringring. Cutiin asile ziangtinso Daan ih a fialmi hibangtuk raithawinak pawl hmangin Pathian a pantu minung pawl cu mi famkimah a tuah thei ding? Pathian a betu pawl an sualnak ihsin thianfaitermi rak si ngaingai hai sehla an sual phuhrun awknak an nei nawn lo dingih raithawinak hmuahhmuah a um nawn lo ding. Sikhalsehla thil umdan ngaingai ahcun kumtinte an sualnak an theihnak dingah raithawinak cu a rak si riangri. Ziangahtile cawcang thisen le me thisen in sualnak cu a tlengfai thei dah lo.
Cubangtuk a si ruangah leilung ih Khrih a rung lang zik tikah Pathian hnenah,
“Raithawinak le peknak cu
na duhmi an si lo;
Sikhalsehla ka hrangah
taksapum na remruat zo.
Òilva pum ih pekmi mei-ur thawinak
parah lungkimnak na nei lo.
Sual thianfainak dingih raithawinak khalah
lungawinak na nei cuang lo.
Cule Daan cabu sungih ka thuhla
an nganmi vekin a hnenah,
“Maw Pathian, na duhmi tuah dingin
hinah ka um,” ka ti,”Ref 10:5-7 Saam 40:6-8; tiah a sim.
A hmaisabik ih a simmi cu, “Raithawinak le hlanmi ah siseh, biakòheng parih òilva le sual thianfainak hrangih raithawinak ah siseh, na lungawi zawng le na duhmi khal an si lo,” a ti. Hi raithawinak pawl cu Daan vekih tuahmi an si òheh ko nain hibangtuk in a sim thotho. Cuih hnuah anih in, “Maw Pathian, na duhmi tuah dingah hinah ka um,” tiah a ti. Curuangah Pathian in raithawinak hlun pawl cu a hnong thluh ih cuih ai ah Khrih thawinak a ret. 10 Ziangahtile Pathian in tuahter a duhmi cu Jesuh Khrih in a tuah òheh ruangah amah ih taksapum kumkhua daih in a pekawknak thawngin kan sualnak ihsin in tlengfai a si.
11 Judah puithiam pawl in an òuanvo cu nitin tein an tuah ih an pek òheumi raithawinak cu vei tampi an pek. Sikhalsehla raithawinak in sualnak cu a tlengfai dah lo.Ref 10.11 Suah 29:38; 12 Asinan Khrih in sualnak hrangah thawinak cu vei khat a pek ih cucu kumkhua daih a si; cuih hnuah Pathian vorhlam kamah a to.Ref 10.12 Suah 110:1; 13 Cutawk ihsin Pathian in a ral pawl a ke-phah ih a tuah hai hlan sung a hngak. 14 Veikhat thawinak in sualnak ihsin a tlengfaimi pawl cu kumkhua mi famkimah a tuah a si.
15 Cule Thlarau Thianghlim khalin a theihpinak kan hnenah a langter. A hmaisabik ah Thlarau Thianghlim in,
16 “Himi hi Bawipa ih òongkam a si:
Hmailam caan ah anmah thawn
kan tuah dingmi thukam cu hitiin a si;
Ka daan pawl an thinlung sungah
ka re dingih an ruahnak parah
ka ngan ding,”Ref 10:16 Jer 31:33-34; a ti.
17 Cuih tlunah a simsal ih,
“An sualnak le an siatnak pawl cu
ka ciing nawn lo ding,” tiah a ti.Ref 10.17 Jer 31:34;
18 Cubangtuk in an sualnak
ngaidam a si ahcun sualthawinak
a òul nawn lo.
Pathian Naih Uh
19 Curuangah u le nau pawl, Jesuh thihnak thawngin Hmun Thianghlim Bik sungih luh theinak luatnak famkim kan nei zo. 20 Amah in puanzar thlek tahrat in lamzin thar, lamzin nung, in on sak zo. Cuih puanzar cu amah ih taksapum kha a si. 21 Vancung ih Pathian innpi kilkhawitu dingah Puithiam Sang bik kan nei. 22 Curuangah thinlung tak ngai le zumnak fel thawn Pathian cu naih uh si. Mawhnak thinlung thianfaitermi le tidai thiang thawn tlengfaimi kan taksapum thawn Pathian cu pan uh si.Ref 10.22 Pui 8:30; Ezk 36:25; 23 Ruahsannak kan nei tiih kan langtermi kha hngetkhoh zet in pom uh si; ziangahtile a thukamnak a kimtertu Pathian cu rin tlak a si. 24 Pakhat le pakhat zawnruahnak nei uh si; pakhat le pakhat bawm aw in duhdawtnak le òhatnak khal langter ton uh si. 25 Hmunkhat ih kan pumkhawm òheumi kha bansan hlah uh si. Mihrek cun an bansan nain Bawipa ih Ni a nai vivo ruangah, kannih cu pakhat le pakhat thazang pe aw sinsin ding kan si.
26 Thudik kan theih ngah hnuah sualnak kha thei cingin kan tuah vivo thotho a si ahcun sual thianfai theinak dingah sual hrang thawinak zianghman a um nawn lo. 27 An hrangih a tangmi an covo cu a thleng cing dingmi Pathian thuòhennak le Pathian a dodaltu pawl a kaangfai òhehtu ding òihnungza meisa kha òih thlohthlo in an hngak ding lawng a si thlang.Ref 10.27 Isa 26:11; 28 Moses Daan thu a thlun lotu cu thutheitu pahnih pathum in a sual a si an tinak in a thu an relcatmi cu, zangfahnak zianghman um lo in thah a si.Ref 10.28 Daan 17:6, 19:15; 29 Cuti asile, Pathian Fapa ziangih a siar lotu le sualnak ihsin mi a thianfaitertu Pathian thukamnak thisen nautattu le, zangfahnak a neitu Thlarau a hmuhsuamtu pawl teh ziang bangtukin tuah an si pei? Cubangtuk minung cu ziangtlukih a nasami hremnak an tuar ding tikha ruat hnik uh! 30 Ziangahtile, “Keimah in phu ka la ding, keimah in ka lehrul ding,” a ti ih tlunah, “ Bawipa in a minung pawl cu an thu a òhen ding,” a titu zo a si, ti kan thei.Ref 10:30 Daan 32:35, 36; 31 A nungmi Pathian kut sungih tlak cu tuksumza a si.
32 Hlanih nan umdan vun ruathnik uh. Culai ah Pathian tleunak nan hnenih a thlen pek ahkhan tuarnak le harsatnak a phunphun nan tong nain cuih harsatnak in a lo neh hai lo. 33 Veikhat khat ah misenpi hmuhah hmuhsuamnak le hremnak nan tong ih vei dang ah cuti vekih hmuhsuamnak le hremnak a tongtu pawl nan tuarpi ve a si. 34 Harsatnak a tongmi thawngtla pawl parah lainatnak nan nei. Nan neihmi thilri hmuahhmuah an lo lon òheh tikah nan sunnak cu lungawi in nan tuar thei, ziangahtile hi thilri hnakin a òha deuhmi le kumkhua in a hmun dingmi kan nei hrih a si, ti nan thei. 35 Curuangah nan thin nau hlah uh, ziangahtile ralòhatnak nan neih ahcun laksawng tumpi nan ngah ding a si. 36 Pathian duhnak tuah thei dingah le a thukammi co thei dingah thinfual in um uh. 37 Ziangahtile Ca Thianghlim in,
“Caan tawite hnuah a ra dingmi
Amah cu a thleng ding, a rei lo ding.
38 A dingmi ka miphun in an zum dingih
an nung ding;
Asinan dungsiptu an um ahcun,
an parah ka lung a awi lo ding,”Ref 10:37-38 Hab 2:3-4; a ti.
39 Kannih cu dungah a siip ih a hloral tami kan si lo. Rinnak nei in rundamnak a cotu sawn kan si.