38
Judah Le Tamar
Cuih caan ah Judah cun a unau pawl a tanta ih Adullam khuami Hirah hnenah a vung um. Cutawkah Kanaan mipa Shua ih fanu a hmu ih a nupi ah a òhit. A nupi cu fa a vun ih fapa a hring ih a hmin ah Er a sak. A nupi cu fa a vunsal ih fapa a hring lala ih a hmin ah Onan a sak. A nupi in fapa a hring lala ih a hmin ah Shelah a sak. A nupi ih Shelah a hrin lai ah Judah cu Khezib khua ah a um.
Cun Judah in a fapa upa bik Er cu nupi a holh ih a nupi hmin cu Tamar a si. Asinan Er cu Bawipa ih hmaiah misiava a si ruangah Bawipa in a nunnak a cemter. Cutikah Judah in Onan hnenah, “Na u ih nupi cu ihpi awla na u in tesinfa a neih theinak dingah a pasal ih unau na si bangtukin na òuanvo cu kimter aw,” tiah a ti. Asinan faate a neih khalle amah ih tefa an si lo ding ti kha Onan in a thei. Curuangah a u ih nupi thawn an pawl awk tinin a u ih hrangah faate sem thei lo dingin a ci cu leilung ah a tlakter. 10 A nuncan cu Bawipa ih lungkimmi a si lo hrangah Bawipa in a nunnak a cemter ve. 11 Cule Judah in a fapa ih nupi Tamar hnenah, “Ka fapa Shelah a òhan ih tlangval a si hlan cu na pa ih inn ah va kir hrih awla nuhmei in va um hrih aw,” tiah a ti. Hitiih a tinak cu a ule pahnih an thih vekin Shelah khal a thi ve pang ding ti a phan ruangah a si. Curuangah Tamar cu a pa ih inn ah a kir.
12 Caan a hung rei deuh tikah Shua ih fanu, Judah ih nupi cu a thi. A mithi ngai a reh tikah a tuurual pawl ih hmul an mehnak Timnah khua ah a rualpi Adullam khuami Hirah thawn an feh. 13 Cule Tamar hnenah, “Na pasal ih pa cu a tuu pawl hmulmet dingah Timnah ah a feh a si,” tiah mi in an sim. 14 Cuhrangah a hruk ringringmi nuhmei hnipuan cu a phoih ih hmaihuhnak puanpate in a hmai a hup ih, Timnah lamzinih a ummi Enaim khuasung luhnak ah a to. Shelah cu a tlangval zo nain amah cu Shelah hrangah òhit an tum lo ti kha Tamar in a thei.
15 Judah in Tamar cu a hmu ih a hmai a huh awk ruangah hlawhhlang a si tiah a ruat. 16 A hnenah lamzin kapah a va feh ih, “Ra awla kan it tlang ding,” tiah a ti. A fapa ih nupi a si kha a thei lo. Cutikah Tamar in, “Ziangso i pek ding?” tiah a sut. 17 Judah in, “Ka òilva sung ihsin me note pakhat ka lo kuat ding,” tiah a ti. Tamar in, “Na run kuat hlan tiang thutiamkamnak i pekta a si ahcun na sim vekin si ko seh,” tiah a ti. 18 Judah in, “Ziangso thutiamkamnak ah ka lo pe ding?” tiah a suh tikah, Tamar in, “Na hminkhennak le a hridai le atu ih na kenmi na kianghrol i pe aw,” tiah a ti. A ti vekin a pek. Cun an pawl aw ih Tamar cu fa a vun. 19 Tamar cu a tho ih inn ah a feh. A hmaihuhnak puan cu a phoih ih a nuhmei hnipuan a hruksal.
20 Cuih hnuah Judah cun a thutiamkamnak thil va tlensal dingah Adullam khuami a rualpipa cu me note pakhat thawn Tamar hnenah a hei tirh; asinain Tamar cu a va hmu nawn lo. 21 A kiangkap ih mi pawl cu, “Enaim lamzin kiangih a ummi hlawhhlangnu kha khuiahso a si?” tiah a suh tikah annih in, “Cutawkah hlawhhlangnu a um dah lo,” an ti. 22 Cuhrangah Judah hnenah a kir ih, “Nunaunu ka tong lo; a kiangkap mi pawl in, cutawkah hlawhhlangnu a um dah lo an ti,” tiah a sim. 23 Cutikah Judah in, “A hnenih ka thilri pawl cu laksal tum nawn hlah; mual kan pho pang ding. Na va tong thei lo nain me note ka kuat ngaingai cu a tawk zo,” tiah a ti.
24 Thla thum hnuah Judah cu, “Na fapa ih nupi Tamar cu hlawhhlang a òuan ih midang thawn fasawn a vun zo,” tiah mi in an sim. Cutikah Judah in, “Khuasung ihsin suah uhla mei in ur that uh,” tiah thu a pek. 25 Tamar cu an suah ih an hruai lai ah a pasal ih pa Judah hnenah thu a cah ih, “Hi thilri a neitupa ih fa ka vun a si; hi thilri hi zo ih ta so a si, zoh hnik uh; hminkhennak le a hridai le kianghrol an si hi,” tiah a ti. 26 Cumi cu Judah in a theih tikah, “Hi nu hi midik a si ih keimah sawn misual ka si. Ka fapa Shelah hrangah òhi zo ding ka rak si nain,” tiah a ti. Cuih hnu cun Tamar cu a ihpi nawn lo.
27 Cun a nithla a kim tikah faphir a ken kha an thei. 28 A pum a na ih culai ah a fa pakhat in a kut pakhat a run suah. Cutikah nau dongtu in a ngel ah pat hrisen a rak khih ih, “Hihi suak hmasa a si,” tiah a ti. 29 Asinan a kut cu a dirhsal ih a dang pakhat sawn hmaisa ah a suak. Cutikah nau dongtu in, “Nangmah riangri maw a rung suak hmaisa,” tiah a ti. Cuhrangah a hmin ah Perezn 38:29 Perez: timi cu Hebru òong in a pahsuak tican a si. an sak. 30 Cuih hnuah a unau a suak ih a kut ih patsen khihmi a si. A hmin ah Zeraho 38:30 Zerah timi cu Hebru òong in zingthlapit ih a senmi ti thawn a aw suah a bang aw. an sak.