29
Jakob Cu Laban Ih Inn A Thleng
Cun Jakob cu a poksal ih nisuahlam mi pawl ih ram lam ahcun a feh. Cule rin lopi in hramlak ih tikhur pakhat ah a va thleng ih a kiangkap ah tuurual rual thum an bok kha a hmu. Cuih tikhur ihsin tuu pawl cu tidai an inter òheu. Tikhursin lungpheng cu a tum ngaingai. Tuu hmuahhmuah an thlen kim tikah tuukhal pawl in lungphengpi cu an òhawn ih an tuu pawl cu ti an inter òheu. An in òheh hnuah tikhur cu an sinsal òheu.
Cutikah Jakob in an hnenah, “Rualle uh, khuitawk in nan ra?” tiah a sut ih annih in, “Haran khua in,” tiah an ti. “Nahor ih fapa Laban nan thei maw?” tiah a suh tikah, “A si, kan thei,” tiah an ti. “A dam maw?” tiih a suhsal tikah, “A si, a dam; zoh hnik, a fanu Rachel cu a pa ih tuurual thawn a rat khi!” tiah an ti. Cule Jakob in, “Ni a sang lai ih tuu pawl tlun a cu hrih lo hrangah ziangahso nan tuu pawl ti tulh in nan tlantersal lo?” tiah a ti. Annih in, “Cuticun a si lo ding; tuurual pawl an thlen kim tikah lungphengpi hi kan òhawn hmaisa ding; cuih hnu lawngah ti kan tulh ding,” tiah an ti.
Cutiih Jakob le tuukhal pawl an biak awk rero laifangah Rachel cu a pa ih tuurual thawn a ra thleng. A pa ih tuukhal cu amah Rachel cu a si. 10 Cun a pu Laban ih tuurual thawn Rachel a rat cu Jakob in a hmuh tikah tikhur ah a va feh ih lungphengpi cu a òhawn ih, a nu ih òapa, a pu Laban ih tuurual cu tidai a pek. 11 Cule Rachel cu a hnam ih aw ring in a òap. 12 A hnenah, “Na pa ih farnu Rebekka ih fapa ka si,” tiah a sim. Cutikah Rachel cu zamrang in a tlan ih a pa a va sim. 13 A pa Laban cu a tupa Jakob ih thuhla a theih tikah hmuak dingah a tlan ih a ton tikah a pom ih a hnam. Cule a inn ah a hruai. Cun Jakob in a thuhla hmuahhmuah cu a pu Laban hnenah kim tein a sim. 14 Laban in, “Ka thi le ka sa ngaingai na si,” tiah a ti. Cutiin Jakob cu a pu hnenah thla khat pum a um.
Jakob In Laban Ih Hna A Òuan
15 Laban in Jakob hnenah, “Ka sungkhat na si ruangah a lak in ka hna na òuan rero ding cu a cang thei lo. Ziangzatso hlawhman ka lo pe ding?” tiah a sut. 16 A pu Laban cu fanu pahnih a nei; a fanu upa deuh ih hmin cu Leah a si ih a nauta deuh cu Rachel a si.
17 Leah cu a mit a mawi;o 29:17 A mit a mawi timi hi, A mit a cak lo tikhal a si thei. Rachel cu a ruangrai a òha ih a hmel khal a òha. 18 Jakob in Rachel cu a duh ruangah a pu Laban hnenah, “Na fanu nauta Rachel co dingah na hna kum sarih sung ka òuan ding,” tiah a ti. 19 Cutikah Laban in, “A rem ko ding, ka hnenah um aw. Midang hnenih ka fanu umter hnakin na hnenih umter ka duh sawn lo maw,” tiah a ti. 20 Curuangah Jakob cu Rachel co dingah kum sarih sung hna a òuan; asinain Rachel a duh zet ruangah kum sarih cu caan tawite vekin a thei.
21 Cule Jakob in Laban hnenah, “Kan ni tiammi a kim zo ih ka nupi si dingah na fanu cu i òhitter thlang aw,” tiah a dil. 22 Cuhrangah Laban in òhitawknak puai a tuah sak ih an khuasung mi zate in an sawm òheh. 23 Asinan cuih zan ah Rachel si lo in Leah sawn cu a pa in Jakob hnenah a pek ih Jakob in Leah cu a ihpi. 24 Laban in a fanu Leah kilkhawitu dingah a salnu Zilpah cu Leah hnenah a pek. 25 A thaizing lawngah Leah a si, ti kha Jakob in a thei. Cutikah Jakob in Laban cu, “Ka parah zianghrangah hivek na tuah? Rachel co dingah na hna ka òuan a si lo maw? Ziangahso hitiin i bum?” tiah a ti. 26 Cule Laban in, “Kan ram ah fanu upa pasal neih hlanah fanu nauta sawn pasal neih daan a si lo. 27 A dang kum sarih sung ka hna na òuan hrih ding asile mopuai zarh khat sung hi hngak awla Rachel cu ka lo pe ding,” tiah a ti. 28 Cumi cu Jakob a lung a kim ih zarh khat sung òhitawknak puai a cem tikah Laban in a fanu Rachel cu Jakob ih nupi dingah a pek. 29 Rachel kilkhawitu dingah a salnu Bilhah khal Rachel hnenah a pek. 30 Cun Jakob in Rachel khal cu a ihpi ih Rachel cu Leah hnakin a duh sawn. Cuticun Laban ih hnaòuan in a dang kum sarih a umsal.
Jakob Ih Faale Pawl
31 Jakob in Leah cu a duh deuh lo ti kha Bawipa Pathian ih a hmuh tikah faate a neihter, asinain Rachel cu fa nei lo in a um. 32 Leah cu fa a vun ih fapa a hring. Cule, “ Bawipa in ka zonzaih zia a hmu zo; atu cu ka pasal in i duh thlang ding,” tiah a ti ih a fapa hmin ah Reubenp 29:32 Reuben: ti cu Hebru òong in ka zonzaihnak i hmu ti thawn a aw suah a bang aw ih, i hmu, fapa tican a si. tiah a sak. 33 Cun fa a vunsal ih fapa a nei. Cule Leah in, “Pasal ih duh lomi ka si hi Bawipa in i thei; curuangah fapa i pe a si,” a ti ih a fapa hmin ah Simeonq 29:33 Simeon ti cu Hebru òong in i thei ti thawn a aw suah a bang aw. a sak. 34 Fa a vunsal ih fapa a nei lala. Cutikah, “Fapa pathum ka hrin zo ruangah ka pasal cu ka hnenah a kop deuh thlang ding,” tiah a ti ih a fapa hmin ah Levir 29:34 Levi ti cu Hebru òong in kop ti thawn a aw suah a bang aw. a sak. 35 Cuih hnuah fa a vunsal lala ih fapa dang pakhat a nei lala. “Atu cu Bawipa ka thangòhat ding,” a ti ih a hmin ah Judahs 29:35 Judah ti cu Hebru òong in thangòhat ti thawn a aw suah a bang aw. a sak. Cuih hnu cun faate a nei nawn lo.