27
Isaak In Jakob A Thluasuah
1 Isaak cu a tar zet zo ih a mit khal a mal thlang. Curuangah a fapa upa bik Esau cu a ko ih, “Ka fapa,” tiah a ti. Esau in, “Hinah ka um,” tiah a ti.
2 Isaak in, “Ka tar zo ih ka thi cing men ding.
3 Na hriamnam, na li le thal la awla, ka hrangah hramlak ah sa va hawl aw.
4 Cuih sa cu ka duh zawng in thawte in suang awla i rak pe aw. Ka ei pei ih ka thih hlanah ka thluasuah ka lo peta ding,” tiah a ti.
5 Cutiih Isaak in a fapa Esau hnenih a òong cu Rebekka in a rak ngai ringring. Cun Esau in a pa hrangah hramlak ih sa a hawl sungah,
6 Rebekka in Jakob hnenah, “Na pa in Esau hnenah,
7 ‘Sa i sum awla rawl thawte in i son aw. Ka ei pei ih ka thih hlanah Bawipa ih hmaiah thluasuah ka lo peta ding,” tiah tubai teah a ti ka thei.’
8 Curuangah ka fapa, “Ka thu ngai awla ka lo simmi tuah aw.
9 Kan òilva ruun lakah va feh awla, me note pahnih va hruai awla ka hnenah rak keng aw. Ka suang pei ih na pa ih duh zawng in ka tuah pei.
10 Cuticun na pa hnenah a ei dingah na hei keng pei; a thih hlanah a thluasuah a lo pe ding,” tiah a ti.
11 Asinan Jakob in a nu hnenah, “Ka nu, ka u Esau cu hmul tampi a nei ih kei cu taksa naalmi ka si, ti na thei ko.
12 Ka pa in i tham men ding sikhawh, ka bum ti i thei thotho lo ding maw? Cuticun thluasuah si sawn lo in camsiatnak riangri ka parah ka thlenter pang ding,” tiah a ti.
13 Cutikah a nu in, “Ka fapa, camsiatnak a thleng asile keimah ih parah siseh, ka lo simmi cu tuah sawn aw; va fehzang awla me note cu ka hrangah va la aw,” a ti.
14 Jakob cu a va feh ih a nu hnenah me note cu a rak keng; cule a nu in a pa ih duh zawng in rawl cu a suang.
15 Cun Esau ih hnipuan òha bik, a nu ih ret sakmi cu Rebekka in a lak ih Jakob a hrukter.
16 A nu in Jakob ih baan tluan le hmul um lonak a hngawng cu mephaw in a tuam thluh.
17 Cun rawl a thaw mi le sang a tuahmi cu a nu in Jakob a hei kenter.
18 Cutiin Jakob cu a pa hnenah a feh ih, “Ka pa,” tiah a va ti. A pa in, “Awi, ka fa, zo deuh so na si?” tiah a rak ti.
19 Jakob in, “Na fa upa Esau ka si, na sim vekin ka tuah zo. Zangfah tein ra to awla ka lo summi sa hi ra ei in thluasuah i pe aw,” tiah a ti.
20 Isaak in, “Cuti zamrang in ziangtinso na va ngah, ka fapa,” a ti. Cutikah Jakob in, “ Bawipa na Pathian in i bawm ih ka ngah a si,” tiah a ti.
21 Cule Isaak in Jakob hnenah, “Khui hnik, ka lo tham theinak dingah i rak naih deuh aw. Ka fapa Esau na si ngaingai maw, si lo so?” tiah a ti.
22 Jakob in a pa cu a hei naih tikah a pa in a rak tham ih, “Na aw cu Jakob ih aw a bang nain na baan cu Esau ih baan a bang fawn,” tiah a ti.
23 Isaak in Jakob cu a rak theithiam lo, ziangahtile Esau ih baan bangin hmul a nei thluh ve. Thluasuah pek a hun tum tikah a pa cun,
24 “Ka fapa Esau na si ngaingai maw?” tiah a sutsal. Jakob in “Ka si ko,” tiah a ti.
25 Cutikah Isaak in, “Na suanmi sa cu i pe aw; ka eita pei ih thluasuah ka lo pe ding,” tiah a ti. Jakob in sa cu a pek ih in dingah sabitti khal a pek.
26 Cun a pa in, “Ka fa, i rak naih awla i hnam aw,” tiah a ti.
27 Cutiin Jakob cun a pa cu a hei naih ih a hnam tikah a pa in a hnipuan rim a hnim ih cuih hnuah thluasuah a pek.
“Hi ka fapa ih rim cu,
Bawipa ih a thluasuahmi
hramlak rim a bang;
28 Pathian in van ih daifim lo thlak in,
Na leiram cu leiòha si hram seh;
Fang le sabitti tampi lo pe seh.
29 Miphun tampi in na hna òuan hai sehla,
Mi tampi na hmaiah kun hai seh.
Na sungkhat pawl ih tlunah
uktu na si pei ih,
Na unau ih tesinfa pawl cu
na hmaiah kun hai seh.
A lo camsiattu cu
camsiat si ve hai sehla,
A lo thluasuahtu cu
thluasuah si ve hai seh,”Ref 27:29 Sem 12:3; tiah a ti.Ref 27:27-29 Heb 11:20;
Esau In Isaak Ih Thluasuah A Dil
30 Cutiih a pa Isaak in thluasuah a pe òheh hnuah Jakob cu a suak. Cu òheh ve tein a ramtawihnak in Esau cu a ra tlung.
31 Anih khalin rawl thawthaw a suang ih a pa ih hnenah a hei keng. “Ka pa, zangfah tein to awla, na fapa ih ka rak kenmi sa cu ei in thluasuah i pe hram aw,” tiah a ti.
32 Isaak cun, “Zoso na si?” tiah a sut. Anih in, “Na fa upa Esau ka si,” tiah a ti.
33 Cutikah Isaak cu a pumpuluk hnin ko in a thir thlohthlo ih, “Cuti asile sa a kap ih ka hnenih a rak kengtu cu zoso a si? Na rat hlante ah ka rak ei zo. A netabik ka thluasuahnak cu amah ka pe zo ih amah ih ta kumkhua in a si zo,” tiah a ti.
34 Esau in cumi a theih tikah, ninghangin napi in a òap ruangro; “Ka pa, na thluasuahnak i pe ve aw,” tiah a òap phahin a dil.
35 Asinan Isaak in, “Na naupa a ra ih i bum a si. Na thluasuahnak a co thluh zo,” tiah a ti.
36 Cule Esau in, “Atu hi a vei hnih i bumnak a si. Jakobl 27:36 Jakob ti le Bum ti cu Hebru òong in a aw suah a bang aw. tiih an kawh hi a dik a si. A hmaisa ah fatir ka sinak i long zo; atu ah ka thluasuahnak i long fawn. Ka hrangah thluasuahnak ziangtetal na nei nawn lo maw?”Ref 27:36 Sem 25:29-34; tiah a ti.
37 Cutikah Isaak in, “Amah cu na tlunah bawi ah ka tuah zo ih a sungkhat pawl tiangin a hnaòuantu dingah ka tuah thluh zo. Rawl le sabitti khal ka pe thluh zo. Ziangso na hrangah a tang nawn pei? ka fa,” tiah Esau cu a ti.
38 Asinan Esau in a dil hrih thotho. “Maw ka pa, thluasuahnak pakhat lawng maw si na neih? Kei khal i thluasuah ve hram ko aw,” tiah a ti ih Esau cu napi in a òap.Ref 27:38 Heb 12:17;
39 Cutikah Isaak in,
“Na hrangah lei le ramòha
a um nawn lo,
Na leiram hrangah van ih
daifim khal a um lo.
40 Na hriamnam rinsan in na nung pei ih,
na naupa ih siahhlawh na si pei.
Sikhalsehla ral na tho asile,
a lo uknak sungin na suak ding,”Ref 27:40 2 Siang 8:20; 2 San 21:8;
tiah a ti.Ref 27:39, 40 Heb 11:20;
41 A pa in Esau co dingmi thluasuahnak cu Jakob a pek thluh ruangah Esau in Jakob cu a hua ih, “Ka pa hi rei a nung nawn lo ding; a thih hnuah Jakob cu ka that tengteng pam ding,” tiah a thinlung tein a ruat.
42 Asinan Esau ih tummi cu Rebekka in a thei ih Jakob cu a ko. “Ngai hnik, na u Esau in lehrul a tum ih nangmah lo thah a tum a si.
43 Cu a si ruangah, ka fapa, ka lo sim vekin tuah aw. Zamrang in na timtuah awla Haran khua ih ka òapa Laban hnenah tlan aw.
44 Na upa ih thinhennak a reh ih,
45 a hnenih na thil tuahmi pawl a hngilh thluh hlantiang na pu hnenah va um aw. Cuih hnuah mi pakhatkhat ka thlah pei ih ka lo kirter leh ding. Ziangahso nikhat sungah ka fapa pahnih hloral ding cu ka sian ding?” tiah a ti.
46 Cule Rebekka in Isaak hnenah, “Esau ih òhitmi hnamdang nupi pawl hi ka ning tuk ih ka khop tuk zo. Hivek Hit phun nunau Jakob in a òhi ve tla a si ahcun kei cu ka thih ah a òha sawn ding,” tiah a ti.