24
Isaak Hrangah Nupi An Hawl
1 Abraham cu a kum a upa ih a tar zet thlang; Pathian in a tuahmi le a òuanmi hmuahhmuah ah a thluasuah.
2 Cule Abraham in a thil neihmi hmuahhmuah a kilkhawitu, a hnenum upa bik pa ih hnenah, “Na kut ka cawn karlak ahb 24:2 Cawn karlak timi cu cuih san ahcun thupi ngaingai, zohman ih thleng thei nawn lo dingmi thukamnak an tuah tikah an zahmawh kai tahrat in an kam awk òheu ruangah a si. re hram awla thu i kam aw.
3 Van le lei ih Pathian Bawipa ih hmai le ka hnenah, ka fapa Isaak ih nupi dingah ka umnak Kanaan ram ih nunau ka la hrimhrim lo pei, tiah siatserh in thu i tiam aw.
4 A hlanih ka rak umnak ka khuaram ah na feh pei ih ka sungkhat pawl sung ihsin ka fapa ih hrangah nupi na va hawl pei,” tiah a ti.
5 Cutikah a hnenumpa in, “Asile cuih nunaunu in i thlun duh lo in a inn ih um duh sawn sehla ziangtinso a si ding? Na fapa sawn na rak umnak na khuaram ahcun ka kirpisal ding maw?” tiah a sut.
6 Cule Abraham in, “Ka fapa cu kirpi hrimhrim lo dingin ruat cia aw;
7 Bawipa, van ih Pathian in ka pa ih inn le ka suahkehnak ram ihsin i suahter ih atu hi ram hi, ‘Na tesinfa hnenah ka pe ding,’ tiah siatserh in i tiamkam cia mi a si. Amah Pathian in a vancungmi na hmaiah a fehter dingih ka fapa hrangih nupi cu na ngah thei ko ding.
8 Sikhalsehla nunau in a lo thlun duh lo ngaingai a si ahcun ka hnenih na kammi thutiam awknak ihsin na luat ding. Ziang a si khalle, ka fapa cu cutawk ram ahcun na kirpi hrimhrim lo pei,” tiah a ti.
9 Cuticun a hnenumpa cun a bawipa Abraham ih cawn karlak ah a kut a ret ih a simmi pawl tuah tengteng dingah siatserh in thu a tiam aw.
10 Cun a hnenumpa cun a bawipa ih kalauk rual sungin pahra a lak ih tim a tuah ih laksawng dingah thil mankhung tampi a keng. Cule Mesopotamiac 24:10 Mesopotamia timi hi Aram Naharaim an rak ti. ram Nahor umnak khua ah a feh.
11 Cuih khua a va thlen tikah hnarpawn ih tikhur kiangah a kalauk pawl cu a bokter. Zanlam a si zo hrangah khuasung ih nunau pawl cu tidai khai dingin an ra.
12 Cutikah Abraham ih hnenumpa cu thla a cam ih, “Maw Bawipa, ka bawipa Abraham ih Pathian, ka bawipa hnenih na thukammi kimter in tuih sun tikcu caan ah i hlawhtlingter hram aw.
13 Hi ka dinnak tikhur ahhin tidai khai dingah khuasung in fala pawl an ra ding.
14 Fala pakhat hnenah, ‘Zangfah tein na tithawl run òhum awla tidai ka in ding,’ tiah ka ti pei ih anih in, ‘In aw, na kalauk pawl khal ti ka tul hai pei,’ tiah a ti asile cuih fala cu na salpa Isaak hrangih na hrilmi fala si hram seh. Cutiih a can ngaingai le ka bawipa hnenih na thukam na kimter a si, tiah ka thei ding,” tiah a ti.
15 Cule a thlacam hman a òheh hlanah Rebekka an timi fala cu a liang parah tithawl pu tahrat in a ra. Rebekka cu Bethuel ih fanu a si. Bethuel cu Milkah ih fapa a si ih Milkah cu Abraham ih unaupa Nahor ih nupi a si.
16 Rebekka cu fala himte a si ih a mawi zet fawn. Tikhur ahcun a vungòum ih a tithawl khat ko ti a than hnuah a hungsal.
17 Cutikah Abraham ih hnenumpa cu a va tlan ih a hnenah, “Zangfah tein na tithawl sungih tidai i inter hram aw,” tiah a dil.
18 Rebekka cun, “Bawipa, in aw,” tiah a ti ih a tithawl cu zamrang tein a liang par ihsin a òhum ih tithawl khal cu fektein a kaihsak ih a inter.
19 Tidai a inter hnuah Rebekka in, “Na kalauk pawl hrang khalah tidai ka khai pei ih an duhzatin in hai seh,” tiah a ti.
20 Zamrang tein òilva tikuang sungah a tidai cu a thlet ta ih kalauk pawl an khawh hlan lo tidai cu a khaisak rero.
21 Abraham ih milai pa cun Bawipa in i hlawhtlinter pei maw, tiah dai tein a zoh ringring.
22 Cun kalauk pawl cu Rebekka in ti a pek òheh hnuah Abraham ih hnenumpa cun a man a khung zetmi sui hnarthlaih a vun suah ih a hnar ah a thlaih; cun sui faute tum zet pahnih a la ih a kut ah a hruk.
23 Cule, “Zo fanu so na si? Na pa ih inn ah kan hrangah riahnak khaan a um pei maw?” tiah a sut.
24 Rebekka in, “Nahor le Milkah ih fapa Bethuel ih fanu ka si.
25 Na òilva hrangah hrampi le rawl tampi kan nei ih nan riahnak dingah khaan khal a um,” tiah a ti.
26 Cutikah Abraham ih hnenumpa cun lukun in, Bawipa Pathian cu a biak ih,
27 “Ka Bawipa Abraham ih Pathian, Bawipa cu thangòhat in um seh. Amah in ka bawipa Abraham hnenih a thukamnak le rin tlak a sinak cu a kimter zo. Ka bawipa Abraham ih unau inn ah Pathian in i thlengter a si,” tiah a ti.
28 Falanu cu a nu hnenah a tlan ih cuih thuhla hmuahhmuah cu a sim.
29 Cutikah Rebekka ih òapa Laban in cuih thuhla cu a thei ih,
30 Rebekka ih hnarthlaih le a ngeel parih faute tla a hmuh tikah tikhur lamah a va tlan ih Abraham ih hnenumpa cu tikhur kiangah a kalauk pawl thawn an rak din kha a va hmu.
31 Cutikah Laban in, “Kan inn ah ra aw, Bawipa ih thluasuahmi na si. Ziangahso khualeng ah na din? Kan inn cu nan riahnak dingah ka simsial zo ih na kalauk pawl hrang khalah hmun a um a si,” tiah a ti.
32 Cuticun Laban in an inn ah a luhpi hai ih kalauk parih thil pawl cu a òhum thluh ih hrampi le rawl tla a pek. Cutiin Abraham ih hnenum le a minung pawl ke kholhnak dingah tidai a rak keng.
33 Cun zanriah ei an tuah tikah Abraham ih hnenumpa in, “Ka thusim duhmi ka sim hlan cu rawl ka ei hrih lo ding,” tiah a ti. Cule Laban in, “Na sim duhmi cu sim aw,” tiah a ti.
34 A thu cu a vun thok ih, “Kei cu Abraham ih hnenum ka si.
35 Pathian in ka bawipa cu tlamtling zet in bawngmal a sawm ih milian zet ah a tuah. Bawipa in tuu le me le caw a rualrual in a pe ih sui le ngun, salnu le salpa, kalauk le laak tampi tla a pek.
36 Cule ka bawipa ih nupi Sarah in a tar hnuah fapa a hring. Ka bawipa in a neihmi thil hmuahhmuah cu a fapa a pe thluh.
37 Ka bawipa in, ‘Ka fapa Isaak ih nupi dingah atu ka umnak Kanaan ram ih fala pawl sung ihsin na hril lo pei.
38 Ka pa ih miphun le ka laicin pawl hnenah ka fapa hrangah nupi na va hawl lo ahcun na parah siatserhnak thleng seh,’ tiah a hmai rori ah thutiamnak i tuahter.
39 Cule ka bawipa ih hnenah, ‘Cuih nunaunu in i thlun duh lo sehla ziangtinso a si ding?’ tiih ka suh tikah,
40 ka bawipa in, “A thu ka thlun ringringmi Pathian in a vancungmi na hnenah a thlah dingih a lo hlawhtlinter ding. Ka pa ih sungkhat le ka laicin sung ihsin ka fapa nupi cu na òhi tengteng ding.
41 Cutiih na tuah asile ka siatserhnak sungin na luat ding; cun ka laicin hnenah na feh ih an lo el a si ahcun ka siatserhnak sungin na luat ding,” tiah i ti.
42 “Tuih sun tikhur kiangih ka ra thlen tikah ka thlacammi cu, ‘ Bawipa, ka bawipa Abraham ih Pathian, ka thil tuahmi parah hlawhtlinnak i pe hram aw.
43 Zoh hnik, tikhur kiangih ka din lai ah tidai khai dingih falanu a rat tikah a hnenah, na tithawl sungih tidai i pe hram aw tiah ka ti pei ih,
44 falanu in, in aw, na kalauk tla tidai ka pe hai ding, a ti a si ahcun cuih fala cu ka bawipa fapa ih nupi dingah Bawipa in a hrilmi siseh, ’ tiah ka ti.
45 Cutiin dai tein thla ka cam ih ka thlacam hman ka òheh hlanah Rebekka in a liangah tithawl pu in a ra ih tikhur ah tidai a vung khai. Cule a hnenah, ‘Zangfah tein tidai i pe aw,’ tiah ka ti.
46 Zamrang tein a liangih a tithawl cu a òhum ih, ‘In aw; na kalauk pawl khal ti ka pe hai ding,’ tiah i ti. Cuticun a tidai cu ka in ih ka kalauk pawl khal tidai a pek.
47 ‘Na pa zoso a si?’ tiih ka suh tikah, ‘Nahor le Milkah ih fapa Bethuel ih fanu ka si,’ tiah i ti. Cutikah a hnar ah hnarthlaih ka thlaih, a ngeel ah faute ka hruk.
48 Cun ka lu ka kun ih ka bawipa Abraham ih Pathian, ka lam tluang zet ih i hruaitu Bawipa cu ka biak ih ka thangòhat a si. Pathian in ka bawipa ih unau hnenah i thlenpi; cule ka bawipa fapa ih nupi hrangah a fanu ka tong zo.
49 Cutiin a si ih ka bawipa ih hrangah thuòha nan ruat thei ih rem nan ti a si ahcun atu ah i hliah hram uh. Kan thuhla a rem thiam lo nan ti a si khalle i sim uhla hmundang ah feh ka tum pei,” tiah a ti.
50 Cutikah Laban le Bethuel in a hnenah, “Hi thu cu Bawipa ih hnen ihsin a rami a si hrangah kannih relcat ding a si lo.
51 Cuhrangah hinah Rebekka a um; hruai awla fehpi ko aw. Bawipa amah ih a sim zo vekin na bawipa fapa ih nupi ah si ko seh,” tiah an ti.
52 Cuih thu a theih tikah Abraham ih hnenumpa cu Bawipa Pathian hmaiah leilung dai in a lu a kun ih lungawi thu a sim.
53 Cule sui le ngun hlawnthil le thilthuam tla a suah ih Rebekka cu a pe; a òapa le a nu khal thil mankhung zetzet a òhen hai.
54 Cuticun Abraham hnenum le a milai pawl cu rawl ei le in, in cuih zan cu an riak. A thaizing an thawh tikah, “Ka bawipa ih hnenah i kirter hram uh,” tiah a ti.
55 Asinan a nu le a òapa in, “Kan fala cu kan hnenah ni malte, ni hra tluk talin um hrih seh; cuih hnuah a feh leh ding,” tiah an ti.
56 Anih in, “In kai hram hlah uh; Bawipa in ka lamzin a tluanter zo. Curuangah ka bawipa ih hnenah i kirter ko uh,” tiah a dil hai.
57 Cule annih in, “Kan falanu kan ko pei ih amah kan sut pei, ziangtin a ruat pei maw,” an ti.
58 Rebekka cu an ko ih, “Hi pa thawn feh dingah na lung a kim maw?” tiah an sut. Rebekka in, “Ka lung a kim,” tiah a ti.
59 Curuangah an farnu Rebekka cu amah a rak umtu nunau pakhat thawn Abraham ih hnenumpa le a milai pawl hnenah an fehter.
60 Cun Rebekka cu hitiin thlaza an cam sak:
“Kan farnu,
Mi thawng tampi ih nu ah cang hram aw,
Na tefa pawl in an ral ih khuapi pawl
neh thluh hram hai seh,” tiah an ti.
61 Cule Rebekka le a hnenum nunau pawl cu kalauk parah an to ih Abraham ih hnenumpa cu an thlun. Hnenumpa in a hruai hai ih an fehta.
62 Culai ah Isaak cu, “Beer-lahai-roi” timi ihsin a ra thawn ih Negev ram ah a um.
63 Nikhat siimlam ah Isaak cu lam a leng ih kalauk pawl an ra rero kha a hmu.
64 Cule Rebekka khalin Isaak cu a hmu ih a kalauk parin a òum lohli.
65 Abraham ih hnenumpa hnenah, “Hramlak ih kanmah tong dingah a ra reromi pa khi zoso a si?” tiah a sut. Hnenumpa in, “Ka bawipa a si,” tiah a ti. Cutikah Rebekka in a hmaikhuhnak puanpate cu a la ih a hmai a khuh aw.
66 Cule hnenumpa in a tawlrelmi thu le hla hmuahhmuah cu Isaak hnenah a sim thluh.
67 Cule Isaak in Rebekka cu a nu Sarah rak umnak puanthlam ah a hruai ih a nupi ah a cang. Isaak in Rebekka cu a duhdawt ih a nu Sarah thih hnuah amah hnemtu ah a cang.