GALATI
(Galatians)
Kawhhran Hnenih Paul Cakuat
Thuhmaihruai
Jesuh Thuthangòha cu Judah miphun a si lomi Zentail mi pawl hnenah sim an thok ih a zumtu khal an tam vivo tikah Khristian taktak si thei dingah Moses Daan pawl an thlun ve a òul maw, timi thusuhnak hi a suak. Paul cun a òul lo, a ti. Thungaite in kan sim a si ahcun Khrih sungih kan nunnak ahhin zumnak lawng hi a thupi a si, tiah a ti. Cuih zumnak cun kanmah le Pathian karlak ah rualremnak a umter a si, a ti. Asinan Galati peng sungih kawhhran hrekkhat lakah Paul a dodaltu pawl an ra ih Pathian thawn rem awk nan duh a si ahcun Moses ih Daan nan thlun ding a si, tiah an ra ti. Galati peng hi Rom acozah ukmi Asia Minor sungih a ummi a si.
Paul in Galati cakuat a nganmi hi zirh sualnak ih hruai sualmi pawl zumnak dik le tuahnak dik ih hruaikirsal thei dingah a nganmi a si. Paul in kei cu Jesuh Khrih ih tirhthlah diktak ka si tiah a òang. Milai thuneihnak thawn tirhthlah si dingah kawhmi ka si lo, Pathian ih kawhmi ka si ih ka hnaòuannak khal Judah mi a si lomi pawl hnenah a si bik, tiah a ti. Pathian le milai kan pehzom awk theinak cu zumnak pakhat lawng in a si, ti kha a thupi bik ih a nganmi a si. Cuih tlunah Khristian nuncan ziaza timi hi Khrih kan zumnak ihsin a ra suakmi duhdawtnak ih rah a si, ti thu Paul in a netabik ah a sim.
1
Galati kawhhran pawl hnenah tirhthlah Paul in ca ka lo kuat. Thuthangòha phuang dingih tirhthlah si dingah hin milai ih hrilmi le thlahmi ka si lo; Jesuh Khrih thihnak ihsin a thotertu Pa Pathian le amah Jesuh Khrih ih hrilmi le thlahmi ka si. Hitawkih a ummi unau pawl tla thawn Galatiih kawhhran pawl cibai kan lo buk a si.
Kan Pa Pathian le Bawipa Jesuh Khrih in zangfahnak le daihnak cu lo pe hram seh.
Tuih san, san sia sung ihsin kannih luatter dingah Khrih cun Pa Pathian duhnak thlun in kan sualnak ruangah a nunnak a pe zo. Pa Pathian hnenah sunlawinak cu a kumkhua in um camcin hram seh! Amen.
Thuthangòha Pakhat
Ziang kar lote sungah Khrih zangfahnak thawn a lo kotu cu nan dungtun ih Thuthangòha dang nan pan lohli ka hmuh tikah ka mang a bang ngaingai. “Thuthangòha dang,” a um ngaingai ruangih ka timi a si lo; nan thinlung a lo hnaihnoktu le Khrih Thuthangòha thleng a tum rerotu minung an um ruangih ka timi a si. Kanmah siseh, vancungmi khal siseh, nan hnenih kan phuan cia mi Thuthangòha si lo in thuthangòha dang simtu an um a si ahcun camsiat si ko seh! Kan lo sim zo nain atu ah ka simsal ko pei: Nan pom cia mi Thuthangòha siar lo thuthangòha dang simtu cu camsiat si ko seh.
10 Hitiih ka ti tikah milai lungkimnak hawl rero ka bang maw? Ka tummi cu milai ih lungkimpinak a si lo; Pathian ih lungkimpinak a si sawn. Milai ih thangòhatnak ka hawl maw? Mi hmaiih hminòhatnak ka hawl a si ahcun Khrih ih hnaòuantu ka si lo ding.
Khrih Ih Tirhthlah Cannak
11 Ka u le ka nau tla, Thuthangòha ka phuanmi hi minung ih thokmi a si lo, tihi nan hnenah ka langter duhmi a si. 12 Minung hnen ihsin ka ngahmi a si lo; milai zohman ih in zirhmi khal a si fawn lo. Jesuh Khrih amah in ka hnenih a phuanmi a si.
13 Ka rak nuncan òheu daan cu nan thei thluh ko. Judah biaknak ka thlun lai ahcun Pathian ih kawhhran pawl ka hremsiat ih cimit dingah ka rak zuam ciamco.Ref 1.13 Tirh 8:3, 22:4-5, 26:9-11; 14 Judah biaknak thlun lam ahcun ka khukòhi lakah a fel bikmi ka si. Kan pupa daan thlun lam ahcun a hleice in rinsan tlak taktak ka si.Ref 1.14 Tirh 22:3;
15 Sikhalsehla Pathian cun a zangfahnak thawngin ka suah hlan hman in i hril ih amah ih hnaòuantu si dingah i ko.Ref 1.15-16 Tirh 9:3-6, 22:6-10, 26:13-18; 16 A Thuthangòha cu Zentail mi hnenih phuang dingah, a Fapa ka hnenih a run langter tikah milai zohman thuron dingah ka pan lo. 17 Jerusalem ih a ummi ka hlanih tirhthlah a rak si zomi pawl khal ka pan lo. Zamrang in Arabia sawn ah ka feh ih Damaskas ah ka ra kirsal. 18 Kum thum hnu lawngah Piter tong dingin Jerusalem ah ka feh ih a hnenah zarh hnih ka cam.Ref 1.18 Tirh 9:26-30; 19 Kan Bawipa ih naupa Jeim siar lo, tirhthlah dang zohman ka tong lo. 20 Hitiih ka nganmi hi thudik a si; thuphan a si lo ti cu Pathian Amah in a thei.
21 Cuih hnuah Siria le Silisia ram ah ka feh. 22 Culai ahcun Judea ram Khristian pawl cun pumpak in, in thei hrih lo. 23 “In rak hrem rerotu in atu ahcun siatsuah a rak tummi kan zumnak thuhla cu a phuang ciamco a si,” tiin mi ih an simmi an thei ih, 24 cutiin keimah ruangah Pathian an thangòhat.