39
Puithiam Hrangah Hnipuan An Tuah
(Suah 28:1-14)
Puithiam pawl in hmun thiang sungah hnaòuan caan ih an hruh dingah tuuhmul in mepian, sendup le a senmi hnipuan sunglawi an tuah. Moses hnenih Bawipa ih thupek vekin Aaron hrang khalah hnipuan thianghlim an tuah.
Òaangthlaih angki thianghlim cu sui, mepian, sendup le a senmi tuuhmul le phiarmi puan mankhung thawn an tuah. Sui cu a tlep a tlep i a phel hnuah mepian, sendup le a senmi pat lakah mawi zet ih òelhcih theih dingin paatete in an aatsal. Cuih òaangthlaih angki sihnak ah liangbah hri an tuah ih a sir ah an sih veve. Mawi zet ih tahmi taikhap cu a cuih liangbah hri pahnih thawn an peh aw. Moses hnenih Bawipa ih thupek vekin hi taikhap khal hi sui, mepian, sendup le a senmi tuuhmul le phiarmi puan mankhung a si. A senmi lungmankhung an taat ih a kimvel ihsin sui in an khap. Lung parih mi hmin an kher òheu vekin Jakob fapa hleihnih pawl ih hmin cu cuih lungmankhung parah cun an kher. Moses hnenih Bawipa ih thupeknak bangtukin, Israel miphun hleihnih pawl theihsalnak lungmankhung ih cang dingin liangbah hri pawl parah cun cuih lungmankhung pawl cu an ben.
Puithiam Sang Ih Òaangben
(Suah 28:15-30)
Òaangthlaih angki vekin mawi zet ih òelhmi òaangben tla cu an tuah. Sui, mepian, sendup le a senmi tuuhmul le phiarmi puan mankhung in an tuah. A tung le a vang an can aw ih bil hnih ah an bil; zungpi bok pakua a saumi le a kaumi a si. 10 Cuih òaangben parah lungmankhung tlar li an ben: Tlar khatnak ah a sen, a mepian le a sendupmi lungmankhung an ben. 11 Tlar hnihnak ah a tangphaw, a pawl le daimon lungvar an ben. 12 Tlar thumnak ah sendup, a sen le a engmi lungmankhung an ben. 13 Tlar linak ah tangphaw, sendup le a varmi lungmankhung an ben. Hi lungmankhung pawl cu an kimvel in sui in an vel. 14 Lungmankhung hleihnih an ben ih a parah Jakob fapa hleihnih pawl hmin kher in an ngan. Hmin khermi vekin an kher ih lungmankhung pakhat parah Israel miphun pakhat hmin ciar an kher fingfing. 15 Òaangben hrangah hrihrual bangtukin a hrual aw mi sui hlir in sui òhi an tuah. 16 Sui tlangkap pahnih le sui kual pahnih an tuah ih sui kual pahnih cu òaangben ih tlunlam kiil veve ah an ben. 17 Cuih sui kual pahnih ah sui hri pahnih an khit ih, 18 sui hri khatlam zim pahnih cu sui tlangkap pahnih ah an khih. Cuticun òaangthlaih angki ih hmailam liangbah parah sui tlangkap pahnih cu an thlaih. 19 A dang sui kual pahnih an tuah ih òaangben hnuailam kiil veve ah a sunglam zim òaangthlaih angki sangtu ah an sih. 20 Sui kual pahnih an tuah lala ih òaangthlaih angki hmailam liangbah hnuailam ah an khit ih òha zet ih tahmi taikhap tlunlam ah an sih. 21 Òaangben parih sui kual pahnih cu òaangthlaih angki ih sui kual pawl thawn mepian hrihrual in an òawnkom ih cuhrangah òaangben cu taikhap ih tlunah seep puakpo lo-in, Moses hnenih Bawipa ih thupek vek cekci in òaangben cu a bek thlepthli.
A Dang Puithiam Thuam An Tuah
(Suah 28:31-43)
22 Òaangthlaih angki hnuai ih hrukmi angki fualpi cu mepianmi tuuhmul hlir in an tuah. 23 Angki fualpi ah lu hrolhnak ong pakhat an tuah. Cuih ong kimvel cu an hruk tikah tlek lo dingin a tlang an khul. 24 Cuih angki hnuailam zim cu mepian, sendup le a senmi tuuhmul le puan mankhung pawl in tale rah cuangin an òelh. 25 Sui hlir in khingte an tuah ih tale rah karlak hnuailam zim kimvel ah khingte cu an thlaih. 26 Moses hnenih Bawipa ih thupek vekin puithiam hna an òuan ih an hrukmi angki fualpi ih thuailam zim kimvel ah tale rah zuk òelhmi le khingte thlaihmi an um.
27 Aaron le a fapa pawl hrangah puan mankhungih tahmi angki pawl an tuah; 28 cule lupawng le lukhum tla puan mankhung in an tuah ih, bawngbi tawi pawl cu phiarmi puan mankhung in an tuah. 29 Tai òemnak cu Moses hnenih Bawipa ih thupeknak vekin phiarmi puan mankhung le mepian, sendup le a senmi tuuhmul thawn an tuah ih mawi zet in an òelh. 30 Sui hlir in calben thianghlim an tuah ih cakhennak parih cangan bangin a parah, “ Bawipa ih hnenah pekmi,” tiah an khen. 31 Moses hnenih Bawipa ih thupekmi vekin cuih calben pheng cu an lupawng parah an òem cih.
Hnaòuan An Òheh
(Suah 35:10-19)
32  Bawipa ih umnak inn Puanthlam cu an òheh. Moses hnenih Bawipa ih thupek vekin Israel pawl in an tuah òheh. 33  Bawipa ih umnak inn Puanthlam le a thilri pawl, puan awhnak, phar le phartlang, a òhuam le a òhuam tawdam pawl; 34 a par khuh hrangah tuucang phaw a senih buhmi, a khuh sintu ah saphaw òha le a khaptu dingih puanòha mankhung pawl; 35 lungpheng pahnih an retnak Thukam Kuang le a sin le a zawnfung pawl; 36 cabuai le cabuai ih thilri le Pathian hrangih hunmi sang; 37 sui hlirih tuahmi meivannak fung, a meivannak, meivanmi a tlar ih ret ding pawl, a thilri dangdang le meivannak hrangih siti pawl, 38 sui ih tuahmi biakòheng, hriak culhnak hrangih siti, zihmui rimthaw, thlam sung luhnak sangka puanzar, 39 darih tuahmi biakòheng, khohriik vek darpheng, a zawnfung pawl le a thilri hmuahhmuah, kut kholhnak kheng le a tawdam; 40 kulhnak hrangah puanzar, kulhnak òhuam le òhuam tawdam pawl, kulh luhnak puanzar, a hridai pawl le puanthlam hrangih thil bah-nak pawl, Pathian Umnak Puanthlam sungih hnaòuan tikah a òulmi thilri hmuahhmuah; 41 hmunthiang sungih hnaòuan tikah puithiam pawl ih hrukmi hnipuan sunglawi, puithiam hna an òuan tikah Aaron le a fapa pawl ih hruk dingmi hnipuan thianghlim pawl cu Moses hnenah an rak keng. 42 Moses hnenih Bawipa ih thupek vekin Israel mi pawl in hnaòuan cu an òheh. 43 An tuahmi hmuahhmuah cu Moses in òha tein a zoh ih Bawipa ih thupek vekin an tuah òha a si, tiah a hmu. Cuhrangah cupawl cu Moses in thluasuah a pek.