8
Judah Mi Pawl In Do Ve Ding An Sim
1 Cuih sun ah Siangpahrang Xerxes in Judah mi a huatu Haman ih thilri hmuahhmuah cu siangpahrang bawinu Esther hnenah a pek. Esther in Mordekai thawn sungkhat an si kha Siangpahrang hnenah a sim. Cuih si cun Mordekai cu siangpahrang umnak ah a lut thei.
2 Siangpahrang in a hminkhennak, (Haman hnen ihsin a lakmi) a zunghruk cu a phuak ih Mordekai a pek. Cule Esther in Mordekai cu Haman thilri kiltu dingah a ret.
3 Cun Esther in siangpahrang kehram ah òap phahin a sep aw ih siangpahrang bawipa cu a biaksal. Agag tesinfa Haman in Judah mi a phiarnak thil òha lo cu kham dingah siangpahrang cu a dil ciamco.
4 Siangpahrang bawipa in a sui kianghrol cu a thlir ih Esther cu a ding; cule a hnenah,
5 “Maw siangpahrang bawipa, na lung a kim ih ka zawnruat in thudik a si tiih na ruah ve a si ahcun na zangfahnak in Agag tesinfa le Hammedatha ih fapa Haman in na ukmi ramsung hmuahhmuah ah Judah mi an zate ih thah thluh dingin thu a rak pekmi cu a thupekmi vekih tuahsuak lo dingah thu thansal hram aw.
6 Ka phunpi an hlohral le ka sungkhat pawl thah thluh an si ahcun ziangtinso ka tuar thei ding?” a ti.
7 Cutikah siangpahrang Xerxes in siangpahrang bawinu Esther le Judah mi Mordekai hnen ahcun, “Judah mi pawl a phiar ruangah Haman cu ka that zo. A thilri pawl tla Esther ka pe thluh zo.
8 Asinan siangpahrang hmin in le siangpahrang hminkhennak ih khen cia mi thuthannak cu balsal a theih nawn lo a si. Sikhalsehla nan duh ahcun Judah mi hnenah nan duhmi hmuahhmuah ngan uh; ka hmin in ngan uhla ka hminkhennak in khen uh,” tiah a ti.
9 Cuih ni cu thla thum thla, Sivan thla, ni kul hluanthum ni a si. Mordekai in siangpahrang cangantu hmuahhmuah a ko ih, India in Ethiopia tiang a kaumi ram, ramòhen za le kul hluansarih uktu bawi le ram uktu bawi pawl le Judah mi pawl hnenih kuat dingmi ca cu a auh. Cuih ca cu ramòhen kipih an hmanmi an òong ciar in le Judah mi hnen ahcun Judah òong in an ngan.
10 Mordekai in cuih ca cu siangpahrang Xerxes hmin in a ngan ih siangpahrang hminkhennak in a khen. Mi an thlahmi pawl cun siangpahrang ranginn ih a ummi rang pawl to in cuih ca cu khuazakip ah an tlanpi.
11 Cuih ca sungah cun, siangpahrang in khuakip ih a ummi Judah mi pawl cu kom aw in òantlang theinak thu a pek. Khuitawk ramòhen le zo miphun an si hmanah hriamnam thawn Judah mi pawl an do a si ahcun Judah mi pawl in dokir dingah thu a pek. An dokir lawng hman si lo in an faate le an nupi pawl thawn thah thluh ding, mi pakhat hman zuah lo in thah thluh ding le an thilri hmuahhmuah tla lak thluh dingin thu a pek.
12 Cuih thupekmi cu Persia ramsung hmuahhmuah ah Judah mi pawl thah ding ni, thla hleihnih thla, Adar thla, ni hleithum ni ah tuahsuak ding a si.
13 Cuih thu cu thlun òulmi daan a si dingih cumi a kim tikah Judah mi pawl an rak òan thei venak dingah ramòhen kipah than ding a si.
14 Siangpahrang thupek vekin, rangtotu pawl cu siangpahrang rang to in zamrang in an tlan. Cuih thu cu siangpahrang umnak Susa Khuapi tla ah an than.
15 Mordekai cu siangpahrang inn ihsin siangpahrang hnipuan a raang le mepian, phang femte ih tahmi puan sen hruk in le a mawi ngaingai mi sui lukhuh khum in a suak. Cutikah Susa Khuapi lamzin ah mi tampi cu lungawi thanuam in an au.
16 Ziangahtile Judah mi hrangah cun lungawinak le thawsuahnak, thinnomnak le nehnak thinlung a um.
17 Siangpahrang thupekmi an thannak ramòhen kip le khuakip ah Judah mi pawl cun lungawinak puai an tuah ciamco. Judah mi pawl an òih deuh ruangah midang tampi tla Judah mi ah an cang.