2
Esther Cu Siangpahrang Bawinu A Cang
1 Cuih hnuah, a thinhennak a daihsal tikah, siangpahrang bawipa cun Vashti thil tuahmi le a tlunih thu a pekmi cu a ruatsal.
2 Cutikah a ruahnak petu hrekkhat pawl in, “Ziangahso na hrangah fala mawi pakhatkhat kan hawl lo?
3 Na uk sung ramòhen kipah na kuthnuai ih bawi pawl thlah awla fala mawi hmuahhmuah cu hi siangpahrang umnak Susa Khuapi ih siangpahrang nusun pawl umnak inn ahhin rak hruai hai sehla nunau kiltu tilpermi Hegai zohter aw. Cunah rak ceimawi hai seh.
4 Cule na duh bikmi fala cu la awla Vashti ai ah siangpahrang bawinu ah tuah aw,” tiah an ti.
Cumi cu siangpahrang lungkim zawng a si ih an tivek cun a tuah.
5 Cuih Susa Khuapi ahcun Mordekai an timi Judah mi pakhat a um. Mordekai cu Jair ih fapa a si ih Benjamin phun, Kish le Shimei tesinfa a si.
6 Siangpahrang Nebuchadnezzar in Judah Siangpahrang Jehoiakhin le a minung pawl Babilon ah sal ih a hruai tikah Mordekai khal a rak tel ve.Ref 2:6 2 Siang 24:10-16; 2 San 36:10;
7 Mordekai hnenah a paseu ih fanu Esther an timi a um; Esther ih Hebru hmin cu Hadassah a si. A nu le pa an thih hnuah Esther cu Mordekai in a cawm ih a fanu ngaingai vekin a zoh.
Esther cu fala mawi zet a si ih a ruangrai khal a òha zet.
8 Curuangah siangpahrang thupekmi an than ih fala tampi Susa Khuapi ih an ratpi tikah Esther khal cu an hruai ve. Esther cu siangpahrang inn ih nunau umnak khaan ahcun an ret ih Hegai in a zoh.
9 Hegai in Esther cu a duh zet ih òha deuh in a zoh. Ceimawi awknak a phunphun a pek; a taksa a hmehsak ih rawl tla òha cuangin a pek. Esther zohtu dingah siangpahrang inn ihsin a hrilmi fala pasarih a ret.
10 Cun Esther in Judah mi a si kha a phuang dah lo; Mordekai in phuang lo dingih a tiam ruangah Esther cun a thup ringring.
11 Nitin tein Mordekai cu Esther ziangvekin a um ti le ziangtin a um leh pei, ti theih duh ah siangpahrang nusun pawl umnak inn tual hmaiah a feh òheu.
12 Cuih fala pawl ceimawi dingah kum khat a rei. Thla ruk sung mura zihmui thawn an taksa an hmehsak ih, a dang thla ruk sung balsam zihmui thawn an taksa an hmehsak. Cuih hnuah fala pawl cu pakhat, pakhat in siangpahrang Xerxes hmai ahcun fehpi ding an si.
13 An umnak inn ihsin siangpahrang inn ih an feh tikah an duhmi ziangvek khal an hruk thei.
14 Siangpahrang inn ahcun zanlam ah feh ding an si ih a thaizing ah a dang nunau pawl umnak inn ah feh ding an si. Cutawkah cun siangpahrang nusun pawl zohtu tilpermi Shaashgaz in a zoh hai ding. Siangpahrang in a duh ih a hmin in a kawhsal lomi cu zo fala hman siangpahrang hnenah fehsal ding an si nawn lo.
15 Nikhat cu Esther feh caan a ra thleng. Esther, Modekai paseu Abihail ih fanu, Mordekai in amah fanu ngaingai bangtukih a cawmmi cu, a hmutu hmuahhmuah ih uarmi a si. Siangpahrang hnenih a feh tikah cun siangpahrang nusun pawl umnak inn zohtu Hegai ih simmi hnipuan cu a hruk.
16 Cuticun Xerxes Siangpahrang a òuannak kum sarih kum, thla hra thla, Tebeth thla ahcun Siangpahrang inn sung siangpahrang Xerxes hmaiah Esther cu a thleng.
17 Siangpahrang bawipa in fala dang pawl hnakin Esther cu a duh cuang; mithmai a pekmi le a ngaimi fala dang pawl hnak khalin Esther cu a ngai sawn a si. Curuangah siangpahrang lukhuh cu Esther a khumter ih Vashti ai ah Esther cu siangpahrang bawinu ah a tuah.
18 Cule siangpahrang in Esther upatnak ah rawl ei puai tumpi a tuah ih a kuthnuai bawi pawl hmuahhmuah le ramòhen uktu bawi pawl a ko òheh. A uksung hmuahhmuah ah colhum caan a pek ih a thil neih vekin siang zet in laksawng a zem ciamco.
Mordekai In Siangpahrang A Humsuak
19 Cule fala pawl a vei hnihnak an khawmawk tikah, Mordekai cu hnaòuan pakhat siangpahrang in a pek.
20 Mordekai ih a rak tiam cia vekin Esther cun Judah mi a si cu a phuang dah lo. Phuang lo dingin Mordekai in a tiam ih nauhakte a si lai ih a thu a rak ngai vekin atu khalah Mordekai ih thu cu a ngai a si.
21 Mordekai cu siangpahrang zung ih hnaòuantu pakhat a si lai ah siangpahrang inn khaan sangka pawl kiltu tilpermi pahnih Bigthana le Teresh in Siangpahrang Xerxes cu an ngaih deuh lo ruangah an phiar ih a thah an tum.
22 Cumi cu Mordekai in a thei ih siangpahrang bawinu Esther a sim. Esther in cuih thu cu siangpahrang bawipa a sim sin.
23 An zingzoi tikah thudik a si, ti an thei ih an pahnih in thlaithahnak parah an thlai that hai. Cuih thu hmuahhmuah cu siangpahrang ih thupeknak vekin kim tein siangpahrang ramsung thu hminsinnak cabu sungah an khum.