8
Saltannak Ihsin A Kirmi Pawl
1 Artakzaksis siangpahrang a si lai ah Babilon ram saltannak ihsin Ezra thawn Jerusalem ih a kirmi pawl, an hrin ih lubik ciar cazin cu a tanglam vekin a si:
2-14 Finehas hrin in Gershom,
Ithamar hrin in Daniel,
David hrin in Shekaniah ih fapa Hattush,
Parosh hrin in Zekhariah le a hrinpi
minung za le sawmnga thawn,
an suahnak hminsinnak
cazin a um ciar.
Pahath Moab hrin in
Zerahiah fapa Eliehoenai,
minung zahnih thawn;
Zattu hrin in Jahaziel fapa Shekaniah,
minung zathum thawn;
Adin hrin in Jonathan fapa Ebed,
minung sawmnga thawn;
Elam hrin in Athaliah fapa Jeshaiah,
minung sawm sarih thawn;
Shefatiah hrin in Mikhael fapa Zebadiah,
minung sawmriat thawn;
Joab hrin in Jehiel fapa Obadiah,
minung zahnih le hleiriat thawn;
Bani hrin in Josifiah fapa Shelomith,
minung za le sawmruk thawn;
Bebai hrin in Bebai fapa Zekhariah,
minung kul hluanriat thawn;
Azgad hrin in Hakkatan fapa Johanan, minung za le pahra thawn;
Adonikam hrin in Elifelet, Jeuel le Shemaiah, minung sawmruk thawn;
(Neh hnu deuh ah a kirmi an si.)
Bigvai hrin in Uthai le Zakkur,
minung sawmsarih thawn,
Jerusalem ah an kir.
Ezra In Levi Mi A Hawl
15 Ahava khua ih a luangmi tiva kapah misenpi pawl cu ka kokhawm ih cutawkah ni thum sung kan cam. Misenpi lakah puithiam an um nain Levi mi pakhat hman an um lo.
16 Curuangah hotu pakua: Eliezer, Ariel, Shemaiah, Elnathan, Jarib, Elnathan, Nathan, Zekhariah le Meshullam le zirhtu Saya pahnih: Joiarib le Elnathan ka ko ih,
17 Kasifia khua ih lubik a simi Iddo hnenah, amah le a bawmtu pawl le biakinn saktu pawl va tong dingah le Biakinn sungih Pathian hnaòuantu minung rak kuat dingah a tlunih upa pawl ka thlah.
18 Pathian ngilneihnak in, Mahli hrin Levi mi, thil tithei zetmi Sherebiah in rak kuat ih a fapa le a unau sungin minung hleiriat thawn an ra.
19 Cule Merari hrin Hashabiah le Jeshaiah tla an sungkhat minung kul thawn in rak kuat.
20 Cuih tlunah Levi mi pawl bawmtu dingah siangpahrang David in an pupa pawl hnaòuan a rak pekmi Biakinn hnaòuantu minung zahnih le kul tla an tel. An zate in cazin sungah an hmin khum an si òheh.
Thla An Cam, Rawl An Ul
21 Cuih Ahava Tiva kiang ahcun kan zate in Pathian hmaiah rawl ul dingah le kan lung neemter dingah ka forhfial ih kan lamzin ah kanmah le kan faate pawl le kan thilri neihmi pawl in hum dingah Pathian hnenah kan dil.
22 Kan fehnak lamzin ah ral pawl kut in in kiltu dingah siangpahrang hnen ihsin rang ralkap pawl dil dingah ka ning a zak fawn, ziangahtile kan Pathian cun amah a rinsantu cu a thluasuah ih amah a dungtuntu parah cun a lung a awi lo a si, tiah siangpahrang hnenah ka rak sim zo.
23 Curuangah rawl kan ul ih in humhim dingah Pathian hnenah thla kan cam; cule kan thlacamnak cu in theih sak a si.
Biakinn Hrang Laksawng
24 Cun puithiam upa pawl sung ihsin Sherebiah le Hashabiah le a dang pahra ka hril.
25 Cule siangpahrang bawipa ruahnak petu pawl, a kuthnuai bawi dangdang pawl le Israel mi pawl in Biakinn ih hman dingah an pekmi sui le ngun le bungbeel pawl cu cuai ka thlai ih puithiam pawl hnen ahcun ka pek.
26-27 Ka pekmi pawl cu a tanglam pawl hi an si:
Ngun cuai thawng hleiruk
zahnih le sawmnga;
Ngun beelkheng zakhat,
ngun cuai sawmnga man;
Sui cuai thawnghnih le zanga;
Suikheng kuum kul, sui cuai li man;
Darkheng òha zet pahnih,
suikheng tluk in
a man a khungmi an si.
28 An hnen ahcun, “Nannih cu nan pupa ih Pathian Bawipa ih hnenah mi thianghlim nan si ih a hnenah lungtho teih an pekmi sui le ngun bungbeel pawl tla hi a thianghlimmi an si.
29 Biakinn nan thlenpi hlan lo ralring zet in kil uh. Cutawkah puithiam pawl ih khaan ah cuai thlai uhla Jerusalem khua ih um Israel mi hotu upa pawl, puithiam upa pawl le Levi mi upa pawl hnenah pe uh,” ka ti.
30 Cuticun sui le ngun le bungbeel pawl cu Jerusalem Biakinn ih ret dingah puithiam pawl le Levi pawl in an lak.
Jerusalem Ah An Kir
31 Jerusalem cu thla khat thla, ni hleihnih ni ah feh dingah Ahava tiva in kan pok. Kan lamzin tluanah Bawipa cu kan hnenah a um ih ral siimnak le damiah bawhthupnak tong lo tein in hum a si.
32 Jerusalem kan thlen tikah ni thum sung kan cawl.
33 Cule ni linak ah Biakinn ah kan feh ih sui le ngun le bungbeel pawl cu cuai kan thlai hnuah Uriah fapa puithiam Meremoth hnenah kan pek. Meremoth thawn cutawkah Finehas fapa Eleazar le Levi mi pahnih, Jeshua fapa Jozabad le Binnui fapa Noadiah khal an um.
34 A zate in cuai an thlai ih an siar òheh in kim tein cazin sungah an khum.
35 Cun Babilon saltannak ihsin a rakir mi hmuahhmuah in Israel Pathian hnenah mei-ur thawinak an pek. An pekmi pawl cu Israel mi zate hrangah cawcang hleihnih, tuucang sawmkua le paruk, tunote sawmsarih le pasarih, le sualthlah thawinak hrangah mecang hleihnih an si. Hi rannung pawl cu mei-ur thawinak in Bawipa ih hnenah an pek.
36 Siangpahrang bawipa ih canganmi an kenmi tla cu Eufrates Nitlaknak lam pengih ram uktu mangki bawi le bawi dang pawl hnenah an pek ih annih khalin misenpi hnenah le Biakinn sung Pathian biaknak hrangah bomnak an pek.