9
Jerusalem In Hremnak A Tuar
1 Pathian cun ring zet in, “Ra uh, hi khualipi a hremtu ding nannih milai pawl, nan hriamnam rak keng uh,” tiah a ti.
2 Hmakhat teah Biakinn saklam kotka lenglam in minung paruk an hung suak ih hriamnam an keng fingfing. An hnenah puan paate a sinmi minung pakhat a um ih cangannak thil a keng. An zate in an ra ih dar biakòheng kiangah an ding.
3 Cule Israel ih Pathian a um ti langtertu, a vang zetmi tleunak cu, a rak um cianak cherubim ramsa nung pawl hnenin a hung kai ih Biakinn sangka lamah a òhawn. Bawipa in cangannak thilri a pai ih puan raang paate a sintu hnen ahcun,
4 “Jerusalem khualipi pumpuluk ah feh awla hi khuapi sungih fihnungza thil an tuahmi ruangah riahsia le thinnuam lo ih a ummi hmuahhmuah pawl ih cal ah hminsinnak khen aw,” tiah a ti.Ref 9.4 Thup 7:3; 9:4; 14:1;
5 Cule Bawipa in midang pawl hnen ahcun, “Amah kha khualipi sungah hei thlun uhla mi va that uh. Zohman zuah hlah uh; zohman zangfah hlah uh.
6 Patar pawl, tlangval pawl, fala pawl, nupinu pawl le nauhak pawl that òheh uh. Sikhalsehla a cal ih hminsinnak a neitu cu zohman dai hlah uh. Hi ka Biakinn ihsin thok uh,” tiah a ti kha ka thei. Curuangah Biakinn ih a dingmi hotu pawl par ihsin an thok.
7 Pathian in an hnenah, “Biakinn cu borhhlawhter uh. A tual pawl cu miruak in khatter uh. Zamrang in thok uh,” a ti. Cuticun khuasung mi pawl cu an that.
8 Cutiih mi an thah rero lai ahcun keimah lawng ka si. Leilung ah ka bokkhup in ka hlon aw ih, “Maw Cungnungbik Bawipa, Israel ram sungih a tangsun mi pawl thah òheh ding tiangin maw Jerusalem parah na thin a heng?” tiah napi in ka au ciamco.
9 Cutikah Pathian in, “Israel le Judah mi pawl in tuksumza sualnak an tuah a si. An ramsung khuazakip ah mi an that ih an khuapi Jerusalem cu thilsual in an khahter zo. Bawipa in kan ram in dungtun zo ih kan tuahmi khalin hmu lem lo, an ti.
10 An parah zangfahnak ka nei lo ding. Midang parih an tuah vekin an parah ka tuah ve ding a si,” tiah i ti.
11 Cule cangannak thilri a pai ih puan paate a sintu cu a rakir ih Bawipa ih hnenah, “Na thupekmi vekin ka tuah òheh zo,” tiah a sim.