23
Misual Nunau Unau Hnih
Bawipa in ka hnenah, “Milaipa, hlanlai ah nunau unau hnihte an rak um. An nolai ihsin Izipt ram ah an um ih an falat ve tein an nuncan a òha lo; an pawhte duhduh ih thammi an si ih fala him si nawn lo in hlawhhlang ah an cang. Upa sawn cu Oholah ti a si, a naunu cu Oholibah ti a si. An pahnih in ka nupi an si ih fanu le fapa pawl in hrin. Oholah cu Samaria a si ih, Oholibah cu Jerusalem a si. Oholah cu ka ta a si ko nain hlawhhlang hna a òuan thotho ih Assiria ram ih a mi duhmi pawl a ngai ciamco. A mi duhmi pawl cu sendup pian zia hnipuan a hruktu ralkap pawl, miphun òha hrin le hnaòuan tum zetzet a òuantu pawl an si ih an zate in rangpar ralkap bawi, mi piang zet pawl an si. Assiria ralbawi pawl hrangah hlawhhlang hna a òuan ih Assiria milem pawl biaknak le a taksa hiarnak thawn a borhhlawhter aw a si. Fala si nawn lo in hlawhhlang ih a cannak Izipt ram ih a um vek òhiamòhiam in hlawhhlang cu a òuan thotho. A tleirawl lai ihsin mipa pawl a hnenah an it òheu ih hlawhhlang tluk ah an rak tuah zo a si. Curuangah a duh kuahko mi le amah a hiartu Assiria mi pawl hnen ahcun ka pekta a si. 10 Annih in a hnipuan an hlit ih taklawng in an ret; a fanu le a fapa pawl an kai; cule amah khal ralnam in an that; cutiin thuòhennak a tong. Khuazakip ah nunau pawl in a thuhla cu an rel hiamhiam.
11 “Cumi cu a naunu Oholibah in a hmu nain a poisa cuang lo. A unu Oholah hnakin a hur sawn le a luar sawnmi hlawhhlang ah a cang. 12 Anih khal taksa hiarnak in a khat ih Assiria miphun òha hrin pawl, hnipuan tleu a hruktu ralkap bawi pawl, rangralkap bawi mipiang zetzet pawl cu a duh a si. 13 Nuncan sia in a borhbah awter. Upa sawn vek thotho in a nauta deuh khal a sia thotho a si.
14-15 “A nuncan siava sungah cun thuk deuhdeuh ah a pil sinsin. Babilon ram bawi pawl ih zuk cu phar parah an suai, siisen an hnih, taikhap an khap ih lupawng an pawngter; cupawl cu a ngai ciamco. 16 Cupawl a hmuh ve tein a ngai zet ih Babilon ahcun palai a hei thlah. 17 Babilon mi pawl an ra ih an ra ihpi; an hurnak an riamter ih an borhhlawhter. Cutiih a borhbah awkter hnu ahcun a ninghang in a ningsin hai a si. 18 Asinan mikip theih dingin a tuah aw ih hlawhhlang a si kha mi hmuahhmuah ih hmuh dingah a phozaar aw. A unu ka ningsin vekin anih khal ka ningsin a si. 19 Izipt ram ih tleirawl a si lai ihsin hlawhhlang hna a rak òuan vek thotho in atu khalah a òuan ih a luar vivo. 20 Laakcang le rangcang bangin zahmawh le ti a neitu mipa hur pawl kha a hiar hai a si,” a ti. 21 Oholibah, Izipt ram ah tleirawlte na rak si lai ah na nuncan a òha lo ih mipa pawl in na pawhte an lo tham ih fala him na sinak hlo tiangih na sualnak kha na pehzom duh vivo a si!
Nauta Nu Parih Pathian Thuòhennak
22 “Cuti a si ruangah Oholibah, Cungnungbik Bawipa keimah in ka lo sim duhmi cu hitiin a si: Na duhmi pawl cu na khop neknek zo, sikhalsehla na parah an thin ka hengter dingih nangmah kulh dingah ka run hruai hai ding. 23 Babilon mi, Khaldean mi, Pekod mi, Shoa mi, Koa mi le Assiria mi pawl ka run hruai ding. Cuih mipiang zetzet, miphun òha hrin pawl le bawi upa pawl, acozah bawi pawl le rangralkap ralbawi pawl cu ka finkhawm ding. 24 Saklam ihsin an run do ding, ralkap tampi le rangleng le rawl phurhnak leng pawl thawn an rung ding. Ralphaw le thir lukhuh thawn an thuam aw dingih an lo kulh òheh ding. An kut sungah ka lo pe dingih anmah ih daan in na thu an òhen ding. 25 Na parih ka thin a heng ruangah an thinheng in ka lo siatsuahter ding. Na hnar an tan ding, na hna an hlep dingih na faate pawl an that ding. A si, na fanu le na fapa pawl an lo long dingih an nungcung in meisa in an ur ding. 26 Na hnipuan an thlek dingih na hlawnthil pawl an la ding. 27 Izipt ram ihsin na rak thok zomi nuncan siava le taksa hiarnak na tuah ringringmi cu ka cemter ding. Milem pawl cu na zoh nawn lo dingih Izipt ram khal na ruat nawn lo ding,” a ti.
28 Cungnungbik Bawipa in, “Nanmah a lo huatu le a lo mitkemtu pawl ih kut sungah ka lo pe ding. 29 Cutiih an lo huat ruangah hna na òuan man hmuahhmuah an lak òheh dingih na hnipuan hlit in lawngfangkheh in hlawhhlang vekin an lo thlah ding. Na taksa hiarnak le hlawhhlang na sinak in, 30 na parah hibangtuk thil hi a thlengter a si. Miphun tampi hrangah hlawhhlang na òuan ih an milem pawl thawn na borhhlawhter aw zo. 31 Na unu ih thu na cawn ruangah hremnak khuathai na in dingah ka lo pe ve ding,” tiah a ti.
32 Cungnungbik Bawipa in,
“Na unu ih khuathai in na in ding,
A khuat cu a tum ih a thukzet fawn.
Mi hmuahhmuah in an lo hmuhsuam
dingih an lo nautat ding.
Na in dingmi khuat cu a liam thluahthlo.
33 Cuih khuat cun vansanglam in
a lo tuah ding;
Na ri ciamco ding.
Òihnak le siatsuahnak khuat a si,
Na unu Samaria ih khuat a si.
34 Na in dingih a cemfai òheh ding,
Na khuat kuai phelte pawl in,
Na pawhte an lo at ding.
Cungnungbik Bawipa in ka sim zo,” a ti.
35 Cungnungbik Bawipa in, “Keimah i hngilh ih i dungtun ruangah le na taksa hiarnak le hlawhhlang na sinak ruangah na tuar ding a si,” a ti.
Unau Pahnih Parah Pathian Thuòhennak
36  Bawipa in ka hnenah, “Milaipa, Oholah le Oholibah parih thuòhen dingah na tiar zo maw? Fihnungza thil pawl an tuah ruangah mawhthluk aw. 37 Òaangòawm sualnak an tuah ih mi an that: Milem pawl thawn an sual ih fapa in hrinsakmi pawl an that. Ka fapa pawl cu milem hnenih thawinak ah an pek. 38 An tuahmi cu culawng a si lo. Ka òunghmunter mi ka Biakinn an borhhlawhter tikcu ah Sabbath khal an buar. 39 Milem pawl thawinak ih ka faate pawl an thah ni rori ah ka Biakinn ah an ra ih an borhhlawhter.
40 “Ram hlapi ih a ummi mipa pawl an sawm leuhleuh ih mipa pawl cu an ra ngaingai. Unau pa hnihte cu ti an kholh aw, an mithmul an dumter ih sui le ngun thil mankhung an hruk. 41 Tohkham mawi zet parah an to ih an hmaiah cabuai pakhat an ret ih a parah cun thil òhaòha ka pekmi, rimhmui le olif hriak pawl an ret. 42 Zianghman a poisa lotu miburpi ih awn au thawm a thang; nelrawn ihsin rak hruaimi miburpi an si. Nunau unau hnih ih ngeel ah faute an hrukter ih an lu ah a mawi zetmi lukhuh an khumter. 43 Ka thinlung tein nupa sualnak tuah tahrat in a baang hnephnep mi nunau cu an hman reromi an hlawhhlang nu a si thotho, ka ti. 44 Hi hlawhhlang nunau pahnih hnenah atu le atu an feh. Nuncan siava nunau Oholah le Oholibah hnen ahcun an kir leuhleuh. 45 Miding pawl in hi nunau pawl cu òaangòawm sualnak an tuahmi le mi an thah ruangah an hnong hai ding, ziangahtile nupa sualnak an tuah ringring ih an kut khal thisen a hnih aw a si,” tiah a ti.
46 Cungnungbik Bawipa in hitiin a ti: “Anmah thinphangtertu le an thil longtu ah miburpi rak hruai uh. 47 Miburpi cun lungto in deng hai sehla ralnam thawn do hai seh; an faate pawl that hai sehla an inn pawl ur hai seh. 48 Hi ram sungah nuncan siava ih nun cu ka kham ding; cumi cu nunau hmuahhmuah in hi nunau pahnih vekih nupa sualnak an tuah lonak dingah ralrin peknak a si ding. 49 Cule nannih unau hnih tla: Nan nuncan fihnungza a si ruangah le milem nan biaknak sual ruangah ka lo hrem ding. Cuticun keimah hi Cungnungbik Bawipa ka si kha in thei ding,” a ti.