17
Muvanlai Le Sabit Hri Tahòhimnak
1 Bawipa in ka hnenah,
2 “Milaipa, Cungnungbik Bawipa keimah in Israel mi pawl hnenih ka simmi hi an theihnak dingah,
3 tahòhimnak hi sim aw: Muvanlai tumpi pakhat a um ih a thla a tum zet; a thla kaupi in a pharh ih a mawi ngaingai. Lebanon Tlang parah a va zuang ih sidar thing zik a va khiak ih,
4 cuih thingzik cu sumtuahnak ram ah a zuanpi hnuah sumtuahtu pawl ih khuasung ah a va ret.
5 Cuih hnuah thingkung note pakhat Israel ram in a lak ih ram òhatnak hmunah a phun; cutawkah cun thingkung òhangtertu dingah tidai a um ringring.
6 Cuih thingkung cu a òhangih niam nawn in kau zet ih a zam liailiai mi sabit hri ah a cang. A hnge pawl cu tlunlam muvanlai umnak lamah an kai vivo ih a hram pawl cu thuukpi ah an pil vivo. A hri cu a hnge le a hnah pawl in an khuh a si.
7 “Cule a dang muvanlai tum zet pakhat a um ve ih a thla cu a hlai demdem ih a thlahmul cu an sah ngaingai. Sabit hri cun atu ih a dinnak hmunih tidai hnakin tidai tam deuh ka ngah ding ti beisei in cuih muvanlai lam ahcun a hram pawl a fehter ih a hnah pawl tla in an pan vivo.
8 Sikhalsehla cuih Sabit hri cu ramòha zet le tidai tam zet umnak hmunah ciin a si zo ih hnah nei tahrat in tam zet a rahmi sabit hri òha zet si ding lawng a bak.
9 “Curuangah Cungnungbik Bawipa keimah in hitiin thu ka sut: Hi sabit hri hi nung in a òhang ding maw? A hmaisa muvanlai in a hram ihsin a phawicat lo ding maw? A rah pawl tla thlong òheh in a hnge pawl a khiak òheh lo ding maw? Cutiin a vuai òheh lo ding maw? Hi sabit hri phawi ding ahcun thacah zet a òul lo, miphun cak zet si tla a òul lo.
10 A si, phun zo mi cu a si; sikhalsehla a nung ding maw, a òhang ngaingai ding maw? Nisuahnak lam thli in a soih tikah a vuai lo ding maw? Atu ih a òhannak hmunah khin a vuai òheh ko lo ding maw?” a ti.
Tahòhimnak Cu A Fiangter
11 Bawipa in ka hnenah,
12 “Hi tahòhimnak ih tican an theih le theih lo, hi raltho pawl hi sut hnik. Sim hai aw: Jerusalem ah Babilon siangpahrang a ra ih Judah siangpahrang le a kuthnuai bawi pawl kha a hruai.
13 Siangpahrang sungkhat lakih pakhat a ko ih amah thawn lungkimnak cakhen a tuah ih ka lo rian ding ti in siatserh thukamnak a tuahter. Cuih cakhen vekih an thlun ringringnak dingah le,
14 hi miphun hi raltho nawn hlah hai seh tinak ah mi upa pawl cu ralkaihmi ah a hruai.
15 Sikhalsehla Judah siangpahrang cu ral a tho ih rang tampi le ralkap tampi ngah duh ah Izipt ram ah palai a thlah. A hlawhtling ngai ding maw? A tisuak thei ngai ding maw? A thukamnak balsiat tahrat in hremnak tuar lo in a luat thei lo ding.Ref 17.12-15 2 Siang 24:15-20; 2 San 36:10-13;
16 “Pathian nung ka sinak hmin saal in Cungnungbik Bawipa keimah in ka sim: Siangpahrang tohkham parih a retu Babilon siangpahrang thawn an tuahmi siatcam thukamnak a pahbal ruangah hi siangpahrang cu Babilon ah a thi tengteng ding.
17 Babilon ralkap pawl an ra ih leilung an burh ih mi tampi thah duh ah khuapi phardawl leng ihsin phar an dawlsang ciamco tikah cun a cak zetmi Izipt siangpahrang ralkap pawl hman in an bawm thei lo ding.
18 A siatcam thukammi a pah ih lungkimnak cakhen a tuah cia mi a bal zo. Hibangtuk a tuah hnu ahcun a luat hrimhrim lo ding,” a ti.
19 Cungnungbik Bawipa in, “Pathian nung ka sinak hmin saal in ka sim: Ka hmin saal in thlun dingah siatcam ih a kam cia mi cakhen a bal ruangah ka hrem ding.
20 Sadawi pawl ih hmanmi sur ka kam dingih cuih sungah ka awk ding. Ka parah rin tlak lo ih a nun ruangah Babilon ah ka hruai dingih cutawkah ka hrem ding.
21 A ralkap òha bik pawl raldonak ah an thi dingih a tangsun pawl cu khuazakip ah òhekdarh an si ding. Cuih hnuah keimah Bawipa in ka sim ti kha na thei ding,” a ti.
Pathian Ih Ruahsannak Thukam
22 Cungnungbik Bawipa in hitiin a ti:
“Sidar thing saangpi ziik cu
ka la dingih thing note cu
ka khiak ding.
Tlang saangpi parah ka phun ding.
23 Israel tlangsang bik parah cun
ka phun ding.
A hnge pawl an cerh dingih cii an nei ding;
Sidar thing òha zet ah a cang ding.
Vate phunkip a parah an fu dingih,
A hnemdai ah colhnak an ngah ding.
24 Ramsung thingkung hmuahhmuah in
Bawipa ka si kha in thei ding.
Thingkung sang zet pawl cu ka hau ih
A niam pawl sangseh tiah ka òhanter.
Thinghring pawl cu ka vuaiter ih
Thingro pawl thinghring ah ka tuah.
Keimah Bawipa in ka sim zo. Tuah ding tiih ka sim cia mi cu ka tuahsuak tengteng ding.”