16
Jerusalem Cu Rin tlak Lo Ah A Cang
1 Bawipa cun ka hnenah hitiin a simsal:
2 “Milaipa, Jerusalem in thil borhbah a tuah hi òha tein sim aw:
3 Ziangkimtithei Bawipa in a hnenih ka simmi hi simfiang aw:
“Maw Jerusalem, Kanaan ram ah a suakmi na si. Na pa cu Amor mi a si ih na nu cu Hit mig Amor mi le Hit mi pawl cu Israel mi pawl in milem bia le hlawhhlang phun ih an ruahmi an si. a si.
4 Na suah lai ah zohman in na laihri an lo tan lo; zohman in an lo kholh lo; ci thawn khal an lo hnawt lo ih puan khalin an lo tuam lo.
5 Zohman na parah zangfahnak nei in hibangtuk ih a lo tuah saktu an um lo. Na suah lai ah duhtu khal na nei lo. Hramlak ih hlon menmi na si.
6 “Cule na kiangin ka feh tikah na thisen lakih na taal rero kha ka lo hmu. Thisen in a lo tuam òheh, asinain na thih ding cu ka lo siang lo.
7 A harhdam zetmi thingkung bangin ka lo òhanter. Na hung òhangih a cak zetmi fala na hung si. Na sam a sau, na pawhte a bom, asinain na tak lawngin na um.
8 “Na kiangih ka fehsal tikah mi ngaimi na neih ding tikcu a thleng ka tiih na taklawng cu ka angki fual in ka lo khuh ih nangmah ngaitu si dingah thu ka lo kam. A si, nangmah thawn òhit umnak thukam ka tuah ih ka ta ah na cang,” a ti. Cutiin Ziangkimtithei Bawipa in a sim.
9 “Cule tidai ka lak ih na thi cu ka lo hnawtfai sak. Na vun cu olif hriak in ka culh.
10 Òelhmi puan in ka lo thuam ih saphaw òha bik ih tuahmi kedam ka lo pe; lu tuamnak puan paate le pu angki fual ka lo pek.
11 Nunau hlawnthil faute le òhi pawl ka lo leih.
12 Hnarkhaih, hnakhaih pawl le suilukhuh mawi zet ka lo pek.
13 Sui le ngun hlawnthil na nei ih puanòelh le pu hnipuan na hruk ringring. Maida òha bik in tuahmi sang na ei ih khuaitizu le olif hriak na ei. Na mawi zet ih siangpahrang nu ah na cang a si.
14 Soisel ding um lo ih na mawi ruangah ramkip ah na hmin a thang; hitluk duhnungza ih a lo tuahtu cu keimah ka si,” a ti. Cutiin Ziangkimtithei Bawipa in a ti.
15 “Sikhalsehla na mawinak le na hminthannak cu zumawknak ah na hmang ih na hnenih a rami hmuahhmuah thawn na it vivo.
16 Na khawvang pawl biaknak hmun mawiternak ah na hnipuan hrek khat cu na hmang ih hlawhhlang bangin na tonmi kip hnenah na taksa na pek. Hibangtuk ih cang ding a si lo.
17 Ka lo pekmi sui le ngun hlawnthil pawl cu mipa lem tuahnak ah na hmang ih anmah thawn nan sual.
18 Ka lo pekmi puanòelh pawl cu milem pawl khuhnakah na hmang ih na hrangah ka timi olif hriak le rimhmui pawl cu milem pawl hnenah na pek a si.
19 Ei ding rawl thaw bik sangvut, olif hriak le khuaitizu ka lo pe; asinain milem pawl thinlung tlonnak ah thawinak ah na pek òheh a si,” a ti. Cutiin Ziangkimtithei Bawipa in a ti.
20 “Cule fanu le fapa i hrinsakmi pawl cu na lak ih milem hnenah thawinak ah na pek. Ka hrangah rin tlak lo ih na can hi a sia tuk zo lo maw?
21 Ziangahso ka faate pawl cu lak tahrat in milem hnenah thawinak ih na pek?
22 Hlawhhlang òuan in fihnungza ih na nun rero lai sungah hin na sentet lai ih taklawngte in na thisen lakih na rak taal rero kha na vun ruat dah maw?” tiah a ti.
Jerusalem Cu Hlawhhlang Nun In A Nung
23 Cungnungbik Bawipa in, “Na cem, na cem riai a si! Thil òha lo hmuahhmuah na tuah òheh hnuah,
24 lamzin kiangkap kipah milem biaknak hmun na tuah vivo ih hlawhhlang hna na òuan.
25 Na mawinak cu ciarbek lakah na hnuk a si. A ra mi kip hnenah na taksa na pek ih a ni a ni in hlawhhlang hnaòuan ah na pil deuhdeuh.
26 A hurnak a sup thei lotu na ramhnen Izipt mi pawl cu na ihkhun ah na itter ih cutiin na hlawhhlannak in ka thin i hengter deuhdeuh a si.
27 “Atu ah nangmah hrem dingah le na covo leiram thluasuah lakkir dingah ka kut ka hawi zo. Nangmah a lo huatu le na nunsual ruangih a lo mitkemtu Filistin mi pawl ih kut sungah ka lo pe zo.
28 “Midang in diriam in an lo tuah thei lo ruangah Assiria mi pawl na dawi. An hlawhhlang ah na cang, sikhalsehla annih khalin diriam in an lo tuah thei ve lo.
29 Babilon mi pawl, sumtuah thiam pawl hrang khalah hlawhhlang na si, asinain na di an lo riamter thei thotho lo,” tiah a ti.
30 Ziangkimtithei Bawipa in hitiin a ti: “Mi zuangzam na va si so! Ningzahnak zianghman nei lo hlawhhlang bangin hi thil hmuahhmuah cu na tuah òheh.
31 Lamzin tluan kipah milem biaknak na tuah ih hlawhhlang na òuan. Sikhalsehla hlawhhlang dang vekin tangka duh ah na tawivak lo.
32 Mah ih pasal sawn duh lo in mikhual pawl thawn pawl aw in sualnak a tuahtu nupinu vek na si.
33 Hlawhhlang cu a hlawhman an pek, sikhalsehla nang cun a lo duhtu hmuahhmuah laksawng na òhen ih hmunkip ihsin ra in na hnenih ra it dingah nawhthuh na pek vivo a si.
34 Nang cu hlawhhlang nunau phundang na si. Hlawhhlang òuan dingah zohman in an lo hnek lo. Hlawhhlang man na ngah lo, nangmah sawn in man na pek riangri. A si, mi phundang na si,” tiah a ti.
Jerusalem Parih Pathian Thuòhennak
35 Maw Jerusalem, hlawhhlang nu! Bawipa ih òong hi ngai hnik!
36 Ziangkimtithei Bawipa in hitiin a ti: “Hlawhhlang dang bangin na hurnak thawn a lo duhtu pawl hnenah na hnipuan na hlit òheh ih fihnungza na milem pawl na biak ih na faate pawl that tahrat in milem hnenah thawinak na pek.
37 Hibangtuk ih na tuah ruangah a rak lo nompitu pawl hmuahhmuah cu na duhmi siseh, na huatmi siseh, hmunkhat ah ka finkhawm ding. Na kimvel ah a lo raltu dingah ka kokhawm òheh dingih na hnipuan ka lo hlit òheh ding; lawngfangkheh ih na um kha lo hmu hai seh.
38 Mipa dang thawn òaangòawm sualnak a tuahtu le mi a thattu nunau cu an hrem hai bangin mi thisen cu na parah ka hlam dingih ka thinheng le ka aithok in ka lo hrem ve dingih na thi ding.
39 An kut sungah ka lo pe dingih hlawhhlang na òuannak le milem na biaknak hmun pawl kha an balsiat òheh ding. Na hnipuan an lak ding; na hlawnthil an lo long dingih na taklawngte in an lo thlah ding.
40 “Lungto in nangmah deng dingah mipi pawl kha an tokhrok dingih an ralnam in an lo sattan òheh ding.
41 Na inn pawl meisa in an ur ziam dingih na tuarnak cu nunau burpi an zohter ding. Hlawhhlang òuan nawn lo dingin ka lo kham dingih na mi ngaimi pawl laksawng pe nawn lo dingin ka lo kham fawn ding.
42 Cuih hnuah ka thinhennak cu a reh dingih ka dai ding. Ka thin a heng nawn lo dingih ka lo thiik nawn lo ding.
43 Na sentet lai ih ka lo kilkhawinak pawl na hngilh òheh ih na thilsual tuahmi pawl in ka ai i thokter. Na parih a thlengmi pawl cu na thil tuahmi pawl ruangih cawhkuan ka lo pekmi an si. Ziangahso fihnungza thil tampi na tuah ih tlunah zuanzamnak tla na bet sinsin?” tiah a ti. Ziangkimtithei Bawipa in a sim zo.
Nu Bang, Fa Bang
44 Bawipa in, “Jerusalem, na parah mipi in ‘Nu bang, fa bang,’ tiah òongòhimnak an hmang ding.
45 Nang hi na nu na zon taktak. Na nu cun a pasal le a faate pawl a ngaih lo. Pasal le faate a huatu na unau pawl bangtuk na si. Nang le na unau pawl ih nu cu Hit mi a si ih nan pa cu Amor mi a si.
46 “Na u-nu upa bik cu a fanu pawl thawn saklam ih a ummi Samaria a si. Na naunu cu a fanu pawl thawn thlanglam ih a ummi Sodom a si.
47 An thu cawng in fihnungza an tuahmi tuah ve hi na lung a kim tawk maw? A kim tawk lo; ziang hmuahhmuah na tuahmi ah, rei lote sungah annih hnakin na luar sawn a si.
48 “A nungmi Pathian ka sinak hmin saal in Cungnungbik Bawipa in ka lo sim: Nangmah le na khuate pawl ih nan tuahmi thil òha lo pawl hi na naunu Sodom le a khuate pawl hman in an tuah dah lomi a si.
49 Amah le a fanu pawl cu ei ding tirawl tampi an nei ih hnangam le thindaite in an um ruangah an puarthau; asinain mifarah le minauta pawl cu zianghman ah an siar lo.
50 An hngal ih an thinlung a ruh ruangah le ka huat zawng thil an tuah ruangah, na theih vekin, ka siatsuah òheh a si.
51 “Na sual tuahmi a hrek hman Samaria cun a tuah lo. A tuah dah mi hnakin fihnungza sawn na tuah a si. Na balh zia hi na unau nu pawl ih balhnak thawn òhim tikah annih cu mi thianghlim ti tlak an si.
52 Mualpho le ningzahnak na tuar cuahco a òul ko. Na siatnak hi a tam tuk ih na kiangkap ih a ummi na unau nu pawl cu mi mawhlo an bang. Na suahpi nunau pawl mi thiangfai tluk ih na canter ruangah atu cu na mithmai sen in na ningzahnak hi phur aw,” tiah a ti.
Sodom Le Samaria An Òhangso Ding
53 Bawipa in Jerusalem hnenah, “Sodom le a fanu pawl, Samaria le a fanu pawl cu ka òhangsotersal ding. A si, nang khal ka lo òhangsoter ding.
54 Na nuncan thei aw in na ning a zak ding; na mualphonak in na suahpi nunau pawl kha mifel ah a cangter ding.
55 An zate in an òhangsosal dingih nangmah le na khuate pawl tla a hlan vekin nan nungsal ding.
56 Na rak puarthau lai ah le thilsual na tuahmi phuan òheh a si hlanah cun,
57 Sodom cu hnihsuahsainak ah na hmang òheu a si lo maw? Atu ahcun Sodom vekah na cang zo: Edom mi le Filistin mi le a dang a lo huatu na ramhnen pawl ih hnihsuah sainak ah na cang zo.
58 Thil mawi lo le fihnungza na tuah ruangah na tuar ding a si,” tiah a ti. Bawipa in a sim zo.
Kumkhua A Hmunmi Thukamnak
59 Cungnungbik Bawipa in, “Na hlawhmi ka lo pe ding, na tuah vekin na parah ka tuah ve ding, ziangahtile na thutiam awknak zianghman ah siar nawn lo in na thukamnak na bal a si.
60 Sikhalsehla na no lai ih thu ka rak lo kammi cu ka hngetter ding. Cule nangmah thawn kumkhua daih thukamnak ka tuah ding.
61 Ziangvek thil ka tuah ti kha na ciing dingih na suahpi nunau pawl, upa siseh, nauta siseh, na kirpisal tikah cun na thil tuahmi parah na ning a zak zet leh ding. Ka thukammi sungah a tel lo nain na suahpi nunau pawl cu na fanu bangtuk ah ka tuah ding.
62 Na hnenih ka thukam cu ka tharsuah dingih cuticun Bawipa ka si kha in thei ding.
63 Na tuahsual mi hmuahhmuah ka lo ngaidam ding, sikhalsehla nang cun na ciing ringring dingih na ningzak in na kaa hman na ang ngam lo ding,” tiah a ti. Ziangkimtithei Bawipa in a sim zo.