EZEKIEL
Thuhmaihruai
Ezekiel cu BC 586 kum ih Jerusalem siat hlan le siat hnuah Babilon ah a ummi profet a si. A simmi thuthang cu Jerusalem ih a ummi, a tangsun pawl, le Babilon ih a ummi Judah mi pawl hrangah a si. Ezekiel sungah thutlangpi paruk a um: (1) Pathian in a profet si dingah Ezekiel a kawhnak; (2) A miphun pawl hrem an tuarnak ding le an hrangah ralrin a òulnak thu le Jerusalem siatsuah a sinak ding thu; (3) A minung pawl an hrem ruangah le an hruaisual ruangah Bawipa in miphun hmuahhmuah parah hremnak le thuòhennak a thlenternak ding thu. (4) Jerusalem a siat hnuah Israel hnangamternak le hnemnak, hmailam hrang ruahsannak a um thu. (5) Gog hrangah riahsiatnak le siatralnak a um dingmi simsungnak thu. (6) Israel miphun le an Biakinn dinsal ding a si, timi thu an si.
Ezekiel cu zumnak hngetzet neimi le thuruahnak a phunphun neitu a si. A thutheih fiangmi tampi cu langnak a hmuhnak in a ra ih a simmi thu tampi cu tican nei zet hminsinnak pawl thawn a phuang. Thinlung le ruahnak tharter a òul zia le zozo khal mah le sualnak cio parah òuanvo kan nei ti kha a langter. A miphun pawl an nun thartersal dingah ruahsannak a neihnak thu khal a phuang. Profet lawng si lo in puithiam tla a si bangtukin Biakinn le thianhlimnak lamih a tha a tho ngaingai mi a si.
1
Pathian A Hmuh Hmaisa Biknak
Pathian Tohkham
1 Kum sawmthum kum, thla li thla, ni nga ni ah, keimah puithiam Ezekiel, Buzi ih fapa cu Babilon ram Khebar Tivapi kiangah sal ih kaihmi Judah mi pawl thawn kan um. Van a ong aw ih Pathian langnak ka hmu.Ref 1.1 Thup 19:11;
2 Cuih kum cu siangpahrang Jehoiakhin sal ih an kaihnak kum nganak kum a si.Ref 1.2 2 Siang 24:10-16; 2 San 36:9, 10.;
3 Cuih Babilon ram Khebar Tivapi kiangah cun ka hnenah Bawipa ih òongmi ka thei ih a huham cah zia khal ka thei.
4 Ka hun zoh ih saklam ihsin thlipi huuk a run kha ka hmu. Khawdur sahzet sungin nimthla a kau zohzo ih a kiangkap cu a vang zukzo. Nimthla a kaunak zawn ahcun dar bangin a tleumi ka hmu.
5 Thlipi laifangah a nungmi ramsa bangtuk milai hmuihmel kengmi pali ka hmu;Ref 1.5 Thup 4:6;
6 asinain hmai pali le thla pali an nei fingfing.
7 An ke pawl cu an ding zerzer ih an tin pawl cu cawcang tin bangtuk an si; tleu zet ih hnawtmi dar vek an si.
8 Hmai pali le thla pali an nei fingfing ih tlunah an thla pakhat hnuai ah milai kut pakhat an nei fingfing; cutin pakhat in kut pali ciar an nei.
9 Cuih ramsa nung pakhat in an thla pahnih ciar an pharh ih kil li nei, tung le vang can aw in an um ih an thlazim cu an dai aw òheh. An òhawn tikah an taksa her aw lo tein a burpi in an òhawn.
10 Ramsa nung pakhat in hmai phun dangdang pali fingfing a nei. Hmailam ah milai hmai a nei; vorhlam ah kiosa hmai a nei; kehlam ahcun cawcang hmai a nei ih dunglam ah muvanlai hmai a nei.Ref 1.10 Ezk 10:14; Thup 4:7;
11 Ramsa nung pakhat in an thla pahnih fingfing an pharh ih cuticun ramsa dang ih thlazim kha an dai fingfing. An thla pahnih cu pharh lo in an taksa parah an khup fingfing.
12 Ramsa nung pakhat in kap li fingfing an hoi ih cuticun an taksa her òul lo in an duhnakah a burpi in an feh thei a si.
13 Cuih ramsa nung pawl lakah cun meisa vaampi vekih a tleu zohzo mi a um ih amah cu catbang lo in a òhawn aw rero. Cuih meisa vaampi sung ihsin nimthlakau vekih a tleu zohzo mi a suak.Ref 1.13 Thup 4:5;
14 Cuih ramsa pawl cu nimthlakau tluk ih cak in dung le hmaiah an pet rero.
15 Cuih ramsa pali cu ka zoh rero lai ah ramsa pakhat kiangah lengke pakhat fingfing, lengke pali leilung dai in ka hmu.
16 Cuih lengke pali cu an bangrep; lungmankhung bangin an tleu fingfing; cuih lengke sungah lengke dang pakhat ding zet in a tan zawng in a vunglutmi a um fingfing;
17 cuticun lengke cu an duhnakah an her aw thei.
18 Leengke pawl ih tlangkap cu an sang zet ih an makzet; mit hlir in an khat.Ref 1.18 Thup 4:8;
19 Ramsa nung pawl an òhawn tikah lengke pawl khal an òhawn ve; leilung ihsin tlunlam ih an kaiso tik khalah lengke pawl khal an so ve a si.
20 Ramsa nung pawl cu an duhnak kipah an feh; cuvek cekci in lengke pawl khal an feh ve; ziangahtile ramsa pawl in an uk a si.
21 Curuangah ramsa nung pawl an feh ah siseh, an din ah siseh, asilole thli lakih an kai ah siseh, lengke pawl khal cun an tuah òheh ve a si.Ref 1.15-21 Ezk 10:9-13;
22 Cule ramsa pawl ih lu tlunah cun mangbangza in a varmi tlunkhuh-kuum a um.Ref 1.22 Thup 4:6;
23 Cumi hnuai ahcun ramsa nung pawl cu an ding. An thla pahnih cu an rualpi ramsa lamah an pharh ih a dang thla pahnih in an taksa an khuh fingfing.
24 An thla khawn thawng ka thei ih tipi huuk thawm bangtuk a si. Ralkap siar cawk lo ih thawmvang bangtuk a si; Cungnungbik Pathian aw bangtuk a si. An zam lo tikah cun an thla an khup.Ref 1.24 Thup 1:14, 15; 19:6;
25 Asinan a lu tlunih a ummi tlunkhuh-kuum ihsin thawmvang cu a ra thang thotho.
26 Cuih tlunkhuh-kuum tlunah cun lungmankhung tleu ih tuahmi siangpahrang tohkham bangtuk a um. Cuih tohkham parih totu cu minung pianhmang a keng.Ref 1.26 Ezk 10:1; Thup 4:2, 3;
27 Cuih pianhmang cu meisa sungih a tleumi dar vaam bangtuk a si. A kiangkap hmuahhmuah cu vang zetin a tleu.Ref 1.27 Ezk 8:2;
28 Vangro bangtukin pian zia phunkim a nei. Hi tleunak cu Bawipa ih umnak langtertu a si.