4
Nebuchadnezzar Mang Pahnihnak
Siangpahrang Nebuchadnezzar in phunkip, hnamkip le òongkip hnenah a tanglam thu hi a cah: “Nan parah daihnak um ko seh! Cungnungbik Pathian in ka hnenih a langtermi mangbangza le khawruahhar thil pawl hi rak ruat ciar hnik uh.
“Pathian ih in hmuhmi
mangbangza pawl hi
ziangtlukin so a maksak!
Khawruahhar a tuahmi hi
ziangtlukin so huham a neih!
Pathian cu kumkhua in
siangpahrang a si ding,
sanikhuk in a uk ding.
“Ka inn ah nunnuam zet le neinung zet in ka rak um òheu. Asinan veikhat cu ka it lai ah òihnungza mang ka man ih tuksumza thil ka hmu. Cuih ka mang ih tican i simfiangtu dingah Babilon peng sungih siangpahrang thuronmi pawl kokhawm dingah thu ka pek. Kutòial zohthiam pawl, pol pawl, mitkher thiam pawl le arsi zohthiam pawl an ra ih ka mang cu ka sim nain a sullam zohman in, in simfiang thei lo. Cule Daniel a ra. (Daniel cu ka khawzing hmin suangin Belteshazzar ti tla in kawh a si.) A sungah khawzing thianghlim pawl ih thlarau a um ih a hnenah ka mang cu ka sim. A hnenah: Belteshazzar, kutòial zohthiam pawl hotu, na sungah khawzing thianghlim pawl ih thlarau a um ih thil mangbangza le thil thuuk na thei thei, ti ka thei. Ka mang cu hihi a si; a tican i sim aw!
10 “Ka it lai ah langnak ka hmu ih leilung pumpi laifangah thingkung tumpi pakhat ka hmu. 11 Cuih thingkung cu a òhang deuhdeuh a sang deuhdeuh ih a ziik in van a dai ih leitlunmi hmuahhmuah in an hmu thei a si. 12 A hnah pawl cu an mawi ngaingai, a rah a tam ngaingai ih leilung pumpi ei khopin a tam. Ramsa pawl a hnem ah an bok, vate pawl in a hnge ah bu an sak ih a nungmi tinkim in a rah cu an ei.
13 “Cuih langnak ih thu ka ngaihtuah rero lai ah van ihsin fel zet le ralring zet ih khua a tangmi vancungmi pakhat a rung òum. 14 Aw ring zet in thu a run phuang ih, ‘Zanthing hi hau uhla a hnge pawl tan òheh uh. A hnah pawl hleuh thluh uhla a rah pawl òhekdarh òheh uh. A hnen ihsin ramsa pawl le a hnge ihsin vate pawl dawihlo òheh uh. 15 Sikhalsehla a sumhmui le a hram cu thir le dar cikcin thawn khit uhla leilung ah taan uh. Cutawkah hrampi lakah cun tanta uh.
“‘Atu ihsin himi pa ih parah dai tla aw sehla ramsa le thingkung le hrampi lakah um seh. 16 Kum sarih sung milai thinlung keng lo in ramsa thinlung sawn a keng ding. 17 Himi cu a fel ih a ralring zet vancungmi ih thurelcat mi a si. Cuti a si ruangah leilungtlun khuazakip mi in thei hai seh: Cungnungbik Pathian in minung ih ram uknak tlunah thu a nei ih cuih ram uknak cu a duhmi hnenah a pek, leitlun minauta bik hnen khalah a pek thei a si, a ti.
18 “Himi hi ka mang cu a si. Atu ah Belteshazzar, ka mang ih tican i sim aw. Ka thuronmi pawl pakhat hman in a tican in sim thei lo; asinain nang cun na sim thei ding, ziangahtile khawzing thianghlim pawl ih thlarau na sungah a um a si,” tiah a ti.
19 Cumi a theih tikah Belteshazzar ti khalih kawhmi Daniel cu a thin a phang ih zianghman a òong thei lo. Cutikah siangpahrang in a hnenah, “Belteshazzar, ka mang le a tican in lo phangter hlah seh,” tiah a ti.
Belteshazzar cun, “Siangpahrang bawipa, na mang le a tican hi na hrangah si lo in na ral pawl ih hrangah sisehla ka va duh so! 20 Thingkung a sang zet ih a ziik in van a daimi cu leilungtlun mi hmuahhmuah in an hmu thei. 21 A hnah pawl cu an mawi zet ih a rah cu leilung pumpuluk ih eikhop dingin a tam. A hnuai ah ramsa pawl an bok ih a hnge ah vate pawl in bu an sak.
Daniel In Mang A Simfiang
22 “Maw siangpahrang bawipa, a sang zetmi le a hnget zetmi thingkung cu nangmah hi na si. Na nasa zet ih van na dai; na cahnak huham cu leilung pumpuluk ah a thleng. 23 Siangpahrang bawipa, nangmah in na zoh lai ah van ihsin vancungmi a rung òum ih, ‘Thingkung hi hau uhla cekkuai òheh uh; asinain a sumhmui cu leilung ah tanta uh. Thir le dar cikcin in khit uhla hramlak ih hrampi lakah cun tanta uh. Hi pa ih parah dai tla aw sehla cutawkah ramsa thawn kum sarih sung um hai seh,’ a ti.
24 “Maw siangpahrang bawipa, na mang ih tican cu hitiin a si ih Cungnungbik Pathian in na parih a ra thleng dingmi cu a phuang zo. 25 Minung umnak khua le ram ihsin dawihlo na si dingih ramsa lakah na um ding. Kum sarih sung cawcang bangin hrampi na ei ding; hramlak ah na it dingih dai in a lo tlak ding. Cule minung ram uknak tlunah Cungnungbik Pathian in thu a nei timi le cuih ram uknak cu a duhmi hnenah a pek timi hi na thei ngah ding. 26 Sumhmui cu leilung ih tanta dingah vancungmi in thu a pek. A tican cu Pathian in leilung pumpi a uk a si, ti na theih ngah tikah siangpahrang na cangsal ding, tinak a si. 27 Curuangah siangpahrang bawipa, thu ka lo simmi hi ngai aw. Sualnak tuah nawn hlah, a dikmi tuah awla mifarah pawl zangfah aw. Cuticun na òhangso vivo ding,” a ti.
28 A tivek cun siangpahrang Nebuchadnezzar parah a kim òheh. 29 Thla hleihnih hnuah, Babilon khua a siangpahrang inn parih a toihvah rero lai ah, 30 “Zoh hnik uh, Babilon a maksak zia hi! Ka khuapi ah ka tuah ih ka huham le ka cahnak, ka sunlawinak le ka maksaknak langter dingah ka din a si,” tiah a ti.
31 A òongmi hman a òong thluh man hlanah van ihsin aw in, “Siangpahrang Nebuchadnezzar, ka simmi hi ngai aw! Na siangpahrang huham cu na hnen ihsin lakhlo a si zo. 32 Minung umnak khua le ram ihsin dawihlo na si ding; hramlak ramsa lakah na um dingih kum sarih sung cawcang bangin hrampi na ei ding. Cule Cungnungbik Pathian in minung ram uknak tlunah thu a nei ih cuih ram uknak cu amah ih duhmi hnenah a pe thei, tihi na thei ngah ding a si,” tiah a ti.
33 A tivek cun a kim ngaingai. Nebuchadnezzar cu minung umnak khua le ram ihsin dawihlo a si ih cawcang vekin hrampi a ei ngaingai. A taksa parah dai a tla; a sam cu muvanlai thlahmul tluk in a sau ih a tin cu vate tin vekin a hriam.
Nebuchadnezzar In Pathian A Thangòhat
34 “Kum sarih a kim tikah van khi ka hun zoh ih ka thinlung a kimsal. Cungnungbik Pathian cu ka thangòhat ih kumkhua ih a nungmi hnen ahcun upatnak le sunlawinak ka pek a si,” tiah siangpahrang cun a ti.
“Kumkhua in a uk ding,
A uknak cu kumkhua in a hmun ding.
35 Leitlun minung pawl cu
zianghman lo ah a zoh hai.
Van ih vancungmi le leitlun ih
minung pawl cu,
Amah in a uk thluh a si.
Zohman in a duhnak an el thei lo;
A thiltuahmi khal thu an sut thei lo.
36 “Ka thinlung a kimsal tikah cun ka hminthannak, ka maksaknak, ka sunlawinak le ka ram uknak pawl cu ka hnenah pek òheh an sisal. Ka kuthnuai ih bawi a rak simi le ka minung phun-u pawl khalin in rak cohlangsal ih ka siangpahrang thuneihnak tla cu a hlan hnakih nasa sawn in ka hnenah pek a sisal.
37 “Atu ahcun keimah Nebuchadnezzar in vancung siangpahrang ka cawimawi, ka upat ih ka sunloih fawn a si. A tuahmi hmuahhmuah cu a ding le a dikmi an si ih puarthau zet ih thil a tuahtu cu a òhum a si,” tiah siangpahrang in a ti.