2
Nebuchadnezzar Ih Mang
1 Nebuchadnezzar cu siangpahrang a òuan kum hnihnak ah mang pakhat a man. Cuih a mang cun a thin a harter tuk ih a it thei lo.
2 Curuangah a kutòial zohthiam pawl, a mitkher thiam pawl, dawithiam pawl le arsi zohthiam pawl kha a mang lettu dingah a ko hai. A hnenah an ra ih a hmaiih an ra din tikah,
3 an hnen ahcun, “Mang ka manmi in ka thin i harter tuk. A tican theih ka duh,” a ti.
4 Siangpahrang hnenah Aram òong in, “Maw siangpahrang bawipa, na nunkhua sau hram seh. Na mang cu in sim awla a tican kan lo sim pei cu,” tiah an ti.
5 Siangpahrang in an hnenah, “Ka mang le a tican in sim dingah ka tummi le ka ruahcat zomi a si. In sim thei lo asile nan kut le nan ke ka lo bohthlek thluh dingih nan inn pawl khal hnawmpen ah ka cangter thluh ding.
6 Sikhalsehla ka mang le a tican in sim thei a si ahcun laksawng le hminòhatnak ka lo pe ding. Curuangah atu ah ka mang le a tican cu i sim uh,” a ti.
7 Siangpahrang hnen ahcun, “Siangpahrang Bawipa in na mang in sim a si ahcun a tican cu kan lo sim ding,” an tisal.
8 Cutikah siangpahrang in aw hrang zet in, “Ka ruah vek ngaingai nan si hi! A tikcu rei deuh seh ti hi nan tummi a si, ziangahtile ka mang in sim thei lo ahcun,
9 nan zate in hremnak bangrep ka lo pe ding, tiih ka ruahcat zomi nan theih ruangah a si. Tikcu a rei deuh asile thu cu a thleng aw deuh ding tiih ruahsannak nan neih ruangah nan lakah theihthiam awknak nan nei ih thuphan lawnglawng in sim rero a si ko. Ka mang cu ziang a si, ti in sim uh. Cule ka mang ih tican khal in sim thei, ti ka thei ding,” tiah a ti.
10 Siangpahrang ih thuronmi pawl in, “Hi leilungtlun ahhin siangpahrang bawipa nangmah ih theih na duhmi hi a lo sim theitu zohman an um lo ding. Na thusuhmi vek hi ziangvek siangpahrang tum bik le cak bik hman in an kutòial zohthiam, an mitkher thiam le an dawithiam pawl hnenah an sut dah keel lo.
11 Siangpahrang bawipa na thusuhmi hi a har tuk lawmmam ih khawzing pawl dah tilo milai cun na hrangah a let theitu zohman an um lo ding. Khawzing pawlle milai lakah an um fawn lo,” tiah an sawn.
12 Cuve tein siangpahrang bawipa cu a thin a heng, a ai a thok ih Babilon ram sungih siangpahrang ruahnak petu pawl hmuahhmuah that òheh dingah thu a pek.
13 Cuticun siangpahrang ruahnak petu pawl hmuahhmuah Daniel le a rualpi pawl tiangin thah dingah thu pek òheh a si.
Pathian In Daniel Hnenah Mang Le A Tican A Sim
14 Cule Daniel cu mi thattu dingih òuanvo pekmi, siangpahrang kiltu ralkap pawl hotu ralbawi Ariok hnenah a feh. Ralring zet in a òong ih,
15 Ariok cu, “Ziangahso siangpahrang bawipa in hibangtuk thupek hrang zet cu a suah?” tiah a sut. Cutikah Ariok in Daniel cu thil umdan hmuahhmuah a sim thluh.
16 Hmakhat teah Daniel cu siangpahrang hnenah a feh ih a mang ih tican a sim theinak dingah tikcu rei deuh a dil.
17 Daniel cu a tlung ih a rualpi Hananiah, Mishael le Azariah pawl cu cuih thuhla pawl a sim òheh.
18 Babilon ramsung siangpahrang ruahnak petu pawl thawn thah cih an si lonak dingah le cuih mangbangza thil an hnenih a fiangter theinak dingin, Pathian hnenih zangfahnak dil dingah a sim.
19 Cule cuih zan rori ah Daniel cun langnak a hmu ih cuih mangbangza thil cu a hnenah fianter a si. Cule Daniel in vancung Pathian cu a thangòhat.
20 “Pathian cu a fim ih huham a nei,
Kumkhua in amah cu thangòhat uh!
21 Amah in tikcu le caan hi a tuah;
Siangpahrang pawl a din hai ih
Amah in a òhumsal hai a si.
Fimnak le theihthiamnak
a petu cu Amah a si.
22 Thuthuk le thuthup khal
Amah in a langter òheh.
Khawthim lakih thuhmi khal
Amah in a thei thluh.
Amah cu tleunak in a kulh.
23 Maw ka pu le ka pa ih Pathian,
Nangmah cu ka lo thangòhat ih
ka lo upat a si.
Nangmah in fimnak le cahnak i pek.
Ka thlacamnak i ngai ih
Siangpahrang hnenih sim ding
tla i sim zo,” a ti.
Daniel In Siangpahrang A Sim
24 Daniel cu siangpahrang ruahnak petu pawl that dingih òuanvo pekmi Ariok hnenah a feh ih, “That hlah aw, siangpahrang hnenah i fehpi awla a mang ih tican cu ka sim ding,” tiah a ti.
25 Hmakhat teah Ariok in Daniel cu siangpahrang Nebuchadnezzar hnenah a fehpi ih, “Siangpahrang bawipa, Judah saltangmi lakah na mang let theitu ding pakhat ka tong zo,” tiah a ti.
26 Siangpahrang in (Belteshazzar ti tla ih an kawhmi) Daniel hnen ahcun, “Ziang mang ka man timi le a tican i sim thei pei maw?” tiah a sut.
27 Daniel in, “Maw siangpahrang bawipa, na mang le a tican a lo sim theitu zohman an um lo; mifim pawl siseh, mitkher thiam siseh, kutòial zohthiam le arsi zohthiam siseh, zohman an um lo.
28 Sikhalsehla vancung ah, mangbangza thil a simfiang theitu Pathian a um. Amah in siangpahrang bawipa, na hnenah hmailam ih a cang dingmi thu a lo sim cia a si. Na ihthah lai ih na hmuhmi na mang cu ka lo sim ding.
29 “Siangpahrang bawipa, na ihthah lai ah hmailam thu na man. Cule mangbangza a langfiangtertu Pathian in hmailam ih a ra thleng dingmi thil kha a lo hmuh a si.
30 Hi thil cu ka hnenah a simfiangmi a si; keimah hi midang hnakih ka fim bik ruangah a si lo, asinain siangpahrang bawipa nangmah in na mang ih tican cu na theih theinak dingah le na hnenih a ra thlengmi ruahnak pawl hi na theihnak dingah hitiin simfiang a sinak cu a si.
31 “Maw siangpahrang bawipa, na mang ah a tum le a maksak zetmi, a vaar zetmi le a tleu zetmi, asinain zoh tikah òihnungza a simi milem na hmaiih a din kha na hmu.
32 A lu cu sui hlirih tuahmi, a òaang le a kut cu ngun in tuahmi, a tai le a cawn cu dar ih tuahmi;
33 a ke pawl cu thir ih tuahmi an si ih a ke zaphak cu thir a hrek, tlak a hrek ih tuahmi an si.
34 Cuih milem cu na zoh rero laifangah zohman ih tham lo in lungpi pakhat cu amah tein a ril ih thir le tlak ih tuahmi a ke cu a rilh ngah ih a parh òheh.
35 Hmakhat teah thir le tlak, dar le ngun le sui pawl cu an kuaizam ih òhal ih fangrialnak hmunih leivut bangtuk ah an cang òheh. Cuih leivut pawl cu thli in a neh malte hman um lo tiangin a semhlo òheh. Asinan cuih lungto cu a òhang vivo ih tlang tumpi ah a cang; cule leilung pumpi a khuh òheh a si.
36 “Na mang cu cumi a si. Maw siangpahrang bawipa, na mang ih tican cu atu ah ka lo sim ding.
37 Siangpahrang bawipa, nang hi siangpahrang hmuahhmuah lakah a tum bik le a maksak bik na si. Vancung Pathian in siangpahrang lakih lal bik ah a lo tuah ih huham le cahnak le hminthannak tla a lo pek.
38 Milai umnak leitlun hmuahhmuah uktu ah a lo tuah ih ramsa le vate tlun khalah uktu ah a lo tuah. Nangmah hi a lu ih sui kha na si.
39 Na hnuah ram uknak a um hrih ding nain nangmah ih ram uknak tluk cun a nasa lo ding. Cuih hnuah ram uknak pathumnak a um dingih leilung pumpi a uk ding. Cumi cu dar ram uknak a si ding.
40 Cuih hnuah ram uknak palinak a um dingih thir tluk ih a cakmi a si ding. Cutiih a cah ruangah ziang hmuahhmuah a dengkuai dingih a khiak òheh ding. Thir cun ziang hmuahhmuah a denkuai vekin cuih hlanih uknak hmuahhmuah cu a dengkuai dingih a rialdip òheh ding.
41 Cule na mang ih na hmuh vekin a ke le a kezung pawl cu a hrek thir, a hrek tlak an si. A tican cu cuih uknak cu a òhen aw mi uknak a si ding tinak a si. Thir vekih cahnak a nei ve ding, ziangahtile thir le tlak an rawi awk ruangah a si.
42 A kezung pawl cu a hrek thir, a hrek tlak an si ih a tican cu cuih uknak cu a hrek a cak dingih a hrek cu a òawnòai ding tinak a si.
43 Na hmuh vekin thir cu tlak thawn an rawi aw a si. A sullam cu cuih ram uknak ih uktu bawi pawl in hrinkhat le hrinkhat komawknak ah hrin dangdang òhit tonawknak tuah an tum ding tinak a si. Sikhalsehla an tuahsuak thei lo ding, ziangahtile thir le tlak cu an rawi aw thei lo.
44 Cuih ram uktu bawi pawl ih ram an uk tikah vancung ih Pathian in a cem dah lomi uknak a run umter ding. Zohman in cuih uknak cu an neh lo ding; asinain uknak dang hmuahhmuah cu a siatsuah òheh dingih kumkhua in a hmunta ding.
45 Na mang ah zohman ih tham lo in tlang ih lungpi cu amah tein a ril ih thir, dar, tlak, ngun le sui ih tuahmi milem a sut kha na hmu. A maksakmi Pathian in hmailam ih a ra dingmi thil kha siangpahrang bawipa nangmah a lo sim a si. Na mang manmi cekci ka lo sim zo; cule a tican khal dik zet in ka lo simfiang zo a si,” tiah a ti.
Siangpahrang In Daniel Laksawng A Pek
46 Cule siangpahrang Nebuchadnezzar cu leilung ah a bok ih Daniel hnenah thawinak le thil hlanmi pawl pe dingin thu a pek.
47 Siangpahrang cun, “Na Pathian hi pathian dang hmuahhmuah lakah a maksak bik a si; siangpahrang tlunah Bawi a si ih mangbangza thil simfiangtu Pathian a si. Himi cu ka thei, ziangahtile mangbangza thil nangmah in na simfiang zo,” a ti.
48 Cule Daniel cu hnaòuan tum zet a pek ih laksawng mankhung zetzet a pek hnuah Babilon peng hotu bik ah a tuah; siangpahrang thuronmi pawl lakah hotu bik ah a tuah fawn.
49 Daniel ih dilsaknak thawngin Shadrak, Meshak le Abednego khal cu Babilon peng thuhla tawlreltu ah siangpahrang in a tuah. Daniel cu siangpahrang inn ih hnaòuantu ah a um lanta.