15
Khrih Thawhsalnak
1 Ka u le ka nau tla, nan hnenih ka rak phuanmi Thuthangòha kha atu ah lo theihtersal ka duh. Cuih Thuthangòha cu nan pom cia mi le nan zumnak hnget zet ih a dinnak hmun a si.
2 Nan hnenih ka phuan cia mi Thuthangòha a si ih hnget zet in nan pom a si ahcun rundammi nan si. Nan pom hnget lo a si ahcun nan zumnak hi a lak a si ding.
3 Ka pom ngahmi atu nan hnenah a thupi bik tiah ka phuan sinmi cu hitiin a si: Ca Thianghlim sungih nganmi vekin Khrih cu kan sualnak ruangah a thi;Ref 15.3 Isa 53:5-12;
4 an phum ih, Ca Thianghlim sungih nganmi vekin, ni thumnak ah thawhtersal a si.Ref 15.4 Saam 16:8-10; Mat 12:40; Tirh 2:24-32;
5 Piter hnenah a lang ih a tirhthlah hleihnih hnenah a lang.Ref 15.5 Mat 28:16-17; Mar 16:14; Luk 24:34, 36; Joh 20:19;
6 Cuih tlunah òum khat ah zumtu u le nau zanga lenglo hnenah a lang; cupawl cu mi hrekkhat an thi zo nain a tam sawn cu an nung lai.
7 Cule Jeim hnenah a lang ih cuih hnuah a tirhthlahmi zate hnenah a lang.
8 A netnak ah, nithla kim lo ih suakmi vek ka si ko nain ka hnen khalah a lang ve.Ref 15.8 Tirh 9:3-6;
9 Kei cu a tirhthlah lakah a tenau bik miangmo, a tirhthlah ti tlak hman ka si lo; ziangahtile Pathian ih kawhhran hremtu ka rak si.Ref 15.9 Tirh 8:3;
10 Sikhalsehla Pathian zangfahnak thawngin atu vek hin ka si thei ve ih ka parih zangfahnak a neihmi cu a lak a si lo. A tirhthlah dang pawl hnakin nasa sawn in hna ka òuan; asinain cumi cu keimah ih òuanmi ti ding a si lo; ka hnenih a ummi Pathian zangfahnak ih òuanmi a si sawn.
11 Cuticun Thuthangòha cu nan ngah ih ka hnen ihsin nan ngah ah siseh, an hnen ihsin nan ngah ah siseh, kan zate in kan phuang ih nannih khalin nan zum zo.
Thawhsalnak
12 Kan thu phuanmi cu: Khrih cu thihnak ihsin thawhtersal a si zo, tihi a si ih atu ah ziangtinso mihrek khat in mithi thawhtersalnak a um lo tiah nan ti thei?
13 Cutiih nan timi cu a dik sibang sehla Khrih thawhtersal a si lo, tiah a cang ding.
14 Cule thihnak ihsin Khrih thawhter lo a si ahcun thuthang phuan ding zianghman kan nei lo ih zum ding khal zianghman nan nei lo.
15 Cuih tlunah Pathian ih thu ah thuphan per ah kan cang ding, ziangahtile thihnak ihsin Khrih cu Pathian in a thoter zo tiah kan sim ringring a sisi. Asinan a thimi pawl nunnak ah thawhter lo an si ngaingai ahcun Pathian in Khrih khal a thawhter lo a si ding.
16 Ziangahtile a thimi thawhter an si lo ahcun Khrih khal thawhter a si ve lo.
17 Cule Khrih thawhter a si lo ahcun nan zumnak hi a kawlawngpi a si dingih nan sualnak sungah a tang hrihmi nan si ding.
18 Cuih tlunah Khrih a zum ih a thimi pawl khal an hloral ve ding.
19 Khrih sungah ruahsannak kan neihmi hi khuitawk hman thleng lo in hi leilungtlun kan nunnak hrang lawnglawng a si ahcun leitlun khuavelminung lakah hin zangfakza bik kan si ding.
20 Sikhalsehla thudik cu hitiin a si: Khrih cu thihnak ihsin thawhtersal a si zo ih a thi cia mi pawl thawhter an si ve ding ti theihnak ah rah hmaisabik aamahkhan a si.
21 Mi pakhat ruangah thihnak a um bangtukin mi pakhat thawngin thawhsalnak a thleng ve.
22 Adam thawn an pehzom awknak ruangah mi hmuahhmuah thihnak an ton bangtukin Khrih thawn an pehzom awknak thawngin mi hmuahhmuah nunnak ah thawhter an si ve ding.
23 Sikhalsehla a sangsang tein thawhter an si ding: A hmaisabik ah Khrih, cule a ratsal tikah Amah ih minung pawl an si ding.
24 Cuih hnuah a netnak caan a ra thleng ding. Khrih in thlarau lam uktu pawl, thuneitu pawl le huham neitu pawl hmuahhmuah a neh òheh hnuah Uknak cu Pa Pathian hnenah a pe ding.
25 Ziangahtile Pathian in ral hmuahhmuah cu a neh òheh ih a ke hnuai ih a ret òheh hlan lo Khrih in a uk ding.Ref 15.25 Saam 110:1;
26 Ral netabik a neh dingmi cu thihnak a si.
27 Ziangahtile Ca Thianghlim in, “Pathian in ziangzongza a ke hnuai ah a ret òheh ding,” tiah a ti.Ref 15.27 Saam 8:6; “Ziangzongza,” ti tikah Pathian Amah cu a tel lo, ti cu sim òul lo a si. Pathian in thil hmuahhmuah cu Khrih ih hnuai ah a ret òheh ding.
28 Sikhalsehla ziang hmuahhmuah cu Khrih uknak hnuai ih ret òheh a si tikah Fapa Amah khal cu thil hmuahhmuah a hnuai ih a retsaktu Pathian ih hnuai ah a re aw ve dingih Pathian cu ziangzongza ih tlunah uktu a si ding.
29 Cule a thimi pawl ai awh in ziangahso hrekkhat pawl in baptisma an lak? An tumtahmi ziangso a si? A thimi pawl thawhter an si ngaingai lo ahcun ziangahso himi pawl hin mithi pawl ai awh ih baptisma an lak duh rero?
30 Kanmah lala vun ti sehla: Thinphannak lakah cat lo in ziangahso kan um duh rero?
31 U le nau tla, nitin tein ka thi a si. Khrih Jesuh thawn kan pehzom awknak thawngin nanmah cu ka porhawknak nan si ih hitiih ka òong theinak khal hi a si.
32 Cule hitawk Efesa khua ah “Sahrang” thawn kan sual aw, ti tlak a simi kha milai tumtahnak lawng ih ka tuahmi a si ahcun ka hlawknak ziangso a um? A thimi thawhter an si ngaingai lo ahcun òongòhimnak ih, “Thaisun ih thi ding thamtham, kan ei kan in mai pei cu!” an ti vekin kan si ding a sisi.Ref 15.32 Isa 22:13;
33 Bummi si hlah uh. Òongòhimnak ah “Rualpi òha lo in ziaza òha a siatter,” ti a si.
34 Nan thinlung vun fimtersal uhla nan sualnak cu bang thlang uh. Mi òhenkhat cu Pathian khal nan theih lo ruangah nan ningzak seh tiah ka timi a si.
Thawhsalnak Ruangpum
35 Mihrek in, “Ziangtinso mithi pawl cu thawhter an si ding? Ziangvek ruangpum so an neih ding?” tiah nan sut ding.
36 Mi-aa pawl! Leilung sungih thlaici nan tuh tikah a thih hmaisa lo ahcun a kho dah maw si.
37 Cule thlaici nan tuh tikah sangvut ci siseh, thlaici dang siseh, a ci lawng si nan tuh, a hung kho dingmi a kung nan tuh dah maw si.
38 Pathian in cuih thlaici hrangah a duhmi kung a pek, thlaici hmuahhmuah hrangah kungko a pek fingfing a sisi.
39 Nunnak a neimi hmuahhmuah in an neihmi taksa a bang aw ciar lo. Milai taksa cu phunkhat a si ih ramsa ih taksa cu phundang a si; vate taksa cu a dang ih nga ih taksa tla a dang lala.
40 Cule vancung ruangpum a um ih leilung ruangpum a um. Vancung ruangpum sunlawinak le leilung ruangpum sunlawinak cu an dang aw.
41 Ni in amah ih sunlawinak a nei ih thlapi khalin sunlawinak phundang a nei. Arsi khalin sunlawinak an nei fingfing ih an sunlawinak cu a dang aw ciar a si.
42 Mithi pawl thihnak ihsin thawhter an si tikah cubangtuk in a si ve ding. Taksapum cu phum a si tikah a thi theimi a si; thawhter a si tikah a thi thei lomi a si ding.
43 Phum a si tikah a mawi lo ih a òawnòaizet; thawhter a si tikah a mawi zet dingih a cak zet ding.
44 Phum tikah taksapum a si; thawhter a si tikah thlaraupum a si ding. Taksapum a um bangtukin thlaraupum khal a um a si.
45 Ziangahtile Ca Thianghlim in, “Adam hmaisa cu a nungmi milai a si,” tiah a ti; asinain Adam neta cu nunnak petu Thlarau a si.Ref 15.45 Sem 2:7;
46 A ra thleng hmaisami cu thlarau a si lo, taksa a si; cuih hnuah thlarau a ra thleng.
47 Leilung ih tuahmi Adam hmaisa cu leilung ihsin a ra; asinain Adam neta cu van ihsin a ra.
48 Leilung ta a simi pawl cu leilung ih tuahmi bangtuk an si; vancung ta a simi pawl cu van ihsin a rami bangtuk an si.
49 Leilung in tuahmi minung ih hmuihmel kan ken vek hin van ihsin a ra Mi ih hmuihmel kan keng ve ding.
50 Ka u le ka nau tla, ka simmi cu hitiin a si: Thi le sa ih tuahmi cun Pathian Uknak a co thei lo ding; cule a thi theimi in a thi thei lomi cu a co thei fawn lo ding.
51-52 A dikmi thuthup hi ngai hnik uh: Kan zate in kan thi òheh lo ding, sikhalsehla netabik tawtawrawt an tum tikah mitòhep karah kan thleng aw òheh ding. Ziangtintile tawtawrawt awthawng a than tikah mithi pawl thawhter an si dingih annih cu an thi nawn lo ding; cule kannih pawl cu thleng òheh kan si ding.Ref 15.51-52 1 Thes 4:15-17;
53 Ziangahtile a thi theimi cu a thi thei nawn lomi ah thleng a si ding; a thi dingmi cu a thi lo dingmi ah thleng òheh an si ding.
54 Cubangtuk in a thi theimi cu a thi thei nawn lo ih thleng an si tikah cun Ca Thianghlim in:
“Thihnak cu siatralter òheh a si,
Nehnak cu a famkim zo a si,”
a timi cu a kim ding.Ref 15.54 Isa 25:8;
55 “Maw thihnak, na mi nehnak
khuiahso a si?
Maw thlankhur, na tur cu
khuiahso a si?”Ref 15.55 Hos 13:14;
56 Thihnak ih tur cu sualnak a si ih sualnak ih huham cu Daan hi a si.
57 Sikhalsehla kan Bawipa Jesuh Khrih hmangin nehnak in petu Pathian cu thangòhat si ko seh.
58 Curuangah ka duhdawtmi u le nau pawl, tlu lo dingin hnget zet in ding uh. Pathian hna cu taima zet in òuan ringring uh; Bawipa ih hnaòuan cu a lak a si dah lo, ti nan thei.