9
Paul Ih Lungthlengnak
(Tirh 22:6-16; 26:12-18)
1 Cuih caan hrawngah Saul cun Bawipa ih dungthlun pawl kha that dingah a hringhro rero. Puithiam Sang hnenah a va feh ih,
2 Damaskas khua ih sinakok inn uktu pawl in amah kha an rak theihnak dingah ca ken ding a va dil. A tumtahmi cu cutawkah Bawipa ih Lamzin a thluntu an um asile nunau mipa tilo kai tahrat in Jerusalem ih hruai ding kha a si.
3 Saul cu Damaskas khua a thlen zikah hmakhat teah van ihsin tleunak in a kimvelin a run tlet.
4 Saul cu a tlu ih, “Saul, Saul, ziangahso i hrem?” tiah aw pakhat a thei.
5 Saul in, “ Bawipa, zoso na si?” tiah a sut.
Cuih aw cun, “Na hrem reromi Jesuh ka si.
6 Tho awla khuapi sungah va feh aw; na tuah òulmi kha an lo sim ding,” tiah a ti.
7 Saul thawn khual a tlawngmi pawl cu an cawl òheh ih kam khat hman an òong lo; aw cu an thei nain zohman an hmu lo.
8 Saul cu leilung ihsin a hung tho ih a mit a hun meng, asinain zianghman a hmu thei lo. Curuangah a kut in an hruai ih Damaskas khua sungah cun an fehpi.
9 Ni thum sung khua a hmu thei lo; cuih ni thum sungah zianghman a ei lo, tidai khal a in lo.
10 Damaskas khuasung ah Ananias timi dungthluntu pakhat a um. Langnak hmuhmi a nei ih cumi sungin Bawipa in, “Ananias!” tiah a ko.
Anih in, “ Bawipa, hinah ka um,” a ti.
11 Bawipa in, “Na timtuah awla Lamzin Ding timi ah va feh aw. Judas inn ah Tarsas khuami Saul timi pa a um maw, tiin va sut aw. Amah cu thla a cam lai rero;
12 anih khalin langnak a hmu ih cumi langnak sungah cun a mit khua a hmuh theisalnak dingah Ananias an timi pa a rung lut ih a lu parah kut a ra suan kha a hmu,” tiah a ti.
13 Ananias in, “ Bawipa, mi tampi in himi pa ih thuhla hi in sim zo ih Jerusalem ih na minung pawl parih thil òha lo a tuahmi pawl khalin sim.
14 Cule atu ah puithiam upa pawl ih thuneihnak thawn nangmah a lo biatu pawl hmuahhmuah kai dingah Damaskas ah a ra thleng a si,” tiah a ti.
15 Bawipa in a hnenah, “Va feh aw! Ziangahtile amah cu Zentail mi hnen le siangpahrang pawl hnen le Israel mi pawl hnenah ka hmin thangter dingin le ka hnaòuan dingin ka hril zo.
16 Cule keimah in ka hrangih a tuar dingmi pawl cu ka hmuh ding a si,” tiah a ti.
17 Curuangah Ananias cu a feh ih Saul umnak inn ahcun a va lut. Saul ih lu parah a kut suang tahrat in, “Unau pa Saul, hitawk lam na rat lai ih lamzin ah na hnenih a langmi Jesuh Bawipa amah rori in na hnenah i thlah. Khua na hmuhsal theinak dingah le Thlarau Thianghlim thawn na khahnak dingah na hnenah i thlah a si,” tiah a ti.
18 Hmakhat teah Saul ih mit ihsin ngakep bangtuk a simi a tla ih khua a hmu theisal. A tho ih baptisma an pek.
19 Cule rawl a ei ih thazang a neisal.
Saul cu Damaskas khua ih dungthluntu pawl hnenah ni malte sung a um.
20 An pumkhawmnak sinakok inn pawlah a va feh ih Jesuh cu Pathian Fapa a si, ti thu kha a sim.
Damaskas Khua Ah Saul In Thu A Sim
21 A theitu hmuahhmuah cu an mang a bang ngaingai ih, “Jerusalem ah Jesuh a zumtu pohpoh a siatsuahtu cu amah hi a si lo maw? Cuvek thotho in hitawk khalah hin cubangtuk mi cu kai tahrat in puithiam upa pawl hnenih thlenpi dingah a ra thleng a si lo maw?” tiah an sut aw ruri.
22 Sikhalsehla Saul thusimmi cu hmual a nei deuhdeuh; Jesuh cu Messiah rori a si tiah a simmi kha mi thinlung sungah fiang tukin a luh ruangah Damaskas khua ih a ummi Judah mi pawl in a thu cu an let thei lo.
23 Ni tam nawn a rei tikah Judah mi pawl an tongkhawm aw ih Saul that dingah khua an khang.Ref 9.23-25 2 Kor 11:32-33;
24 Asinan cutiih an khuakhanmi cu a simtu an rak um ih Saul in a thei. Amah thah duh ah a sun a zan in khuapi ih kotka pawl cu an kil.
25 Sikhalsehla Saul a thluntu pawl in zankhat ah Saul cu bawm sungah an ret ih khuapi kulhnak hauhruang ong in a lengah an vun òhum.
Jerusalem Ah Saul A Thleng
26 Saul cu Jerusalem ah a feh ih dungthlun pawl lakah tel ve a tum. Asinan annih pawl cun dungthlun a si ve thlang ti kha an zum lo ih an zate in amah kha an òih riangri.
27 Cule Barnabas in a òanpi ih tirhthlah pawl hnenah a fehpi. Barnabas in an hnen ahcun Damaskas lamzin ih Bawipa a tonnak le Bawipa in a hnenih a òongmi pawl kha fiang tein a sim. Cule Saul in Jesuh ih hmin kha Damaskas khua ah ralòha zet in Thuthangòha a phuannak thu tla a sim.
28 Curuangah Saul cu an hnenah a um ih Jerusalem khuasung hmunzakip ah a feh ih ralòha zet in Jesuh hmin in thu a sim.
29 Grik òong a hmangtu Judah mi pawl hnen tla ah thu a sim ih thu tla an el aw, asinain annih cun a thah an tum.
30 Cumi cu zumtu pawl in an theih tikah Saul cu Sisaria ah an hruai ih Tarsas ah an thlah.
31 Cuticun Judea ram, Galilee ram le Samaria ramsung kawhhran pawl cu hnangam tein an um. Kawhhran cu Thlarau Thianghlim bomnak in a cak deuhdeuh ih mi khal an karh vivo. Pathian òihzah in an um.
Lidda Le Joppa Ah Piter A Tlawng
32 Piter cu khuazakip ah a tlawng ih veikhat cu Lidda khua ih ummi Pathian awi pawl tlawng dingah a feh.
33 Cutawkah Aenias an timi pa a tong. Aenias cu mizeng a si ih kum riat sung ihkhun ihsin a tho thei dah lomi a si.
34 Piter in, “Aenias, Jesuh Khrih in a lo damter a si. Tho awla na ihphah zual aw,” tiah a ti. Hmakhat teah Aenias cu a tho.
35 Lidda le Sharon ih a ummi hmuahhmuah in Aenias cu an hmuh ruangah Bawipa lamah an hoikir.
36 Joppa khua ahcun Tabitha an timi nu a um ih Jesuh zumtu a si. (A Grik hmin cu Dorkas a si ih a tican cu “Zukneng,” tinak a si.) A tikcu hmuah cu thil òha tuahnak ah le mifarah bomnak ah a hmang.
37 Cuih caan ah cunu cu besia zet in a na ih a thi. A ruak cu an kholh ih tlunta khaan ah an ret.
38 Joppa khua cu Lidda khua in a naite a si. Cule Joppa ih a ummi zumtu pawl in Lidda ah Piter a um ti kha an theih tikah mi pahnih an thlah ih, “Zamrang in kan hnenah ra hram aw,” tiah an cah.
39 Curuangah Piter cu a tim a tuah ih anmah a thlun. A va thlen tikah Piter cu tlunta khaanah cun an hruai. Cutawkah cun nuhmei pawl in an pan ciamco ih an òap ih Dorkas damlai ih angki le kawtkor a tahmi pawl kha an hmuh.
40 Piter in khaan sung ihsin mi pawl cu a suahter òheh ih, a khukbil in thla a cam; cule Dorkas ruak lam a hoi ih, “Tabitha, tho aw!” tiah a ti. Dorkas cun a mit a hun meng ih Piter a hmuh tikah a hung to.
41 Piter in a hei dawh ih a dinter. Cule nuhmei pawl le zumtu pawl hmuahhmuah cu a kawh ih a nungzo tiin an hnenah a hmuh.
42 Cuih thu cu Joppa khuasung hmuahhmuah ah a thang ih mi tampi in Bawipa an zum.
43 Piter cu Joppa khua ah savun tuahtu Simon inn ah ni tampi sung a cam.