TITÜH
Polüh noh Titüh üng ah kbia sa
1
1 Kei Polüh hin Pangsiima mpya jah Booi Jeishüh Khritoa ngshäa kah thoon kti ni. Pangsiima xü kkhyaangea jum ei naak ah däm duh lo vaia ni, Pangsiima hlü eia kba ah nih xün shei lo vai ua kkhyü ksang jah mthei vai sun keia khuut ni.
2 Asun sun üng angshääia xün naak angtea yah vai ääp ei khoh ktie. Pangsiim noh ahina shak ngshääi ah jah peet vaia ah ng'aan ei sun kho mdek am angtüüi hama kkhyüh vek kti. Pangsiim am hleei laang.
3 Asuna thoon lü Pangsiim noh ah hlü eia ksüün üng ah kkhyü sun thang kdo kkya kpyaü naak üng ah ngshing ngte shak ni. Asuna thang kdo kkya kpyaü kkhaia nih nih-e jah kuum kyan kti Pangsiim kuung noh ah nah xüh ni.
4 Nang Titüh-a veei sa kah yuk lok kti. Nih jum ei naak mat lü kah ning sa ksang kuunga kba nah thoon kti ni. Pa Pangsiim jah nih nih-e jah kuum kyan kti Booi Jeishüh Khrito noh bä naak jah diim deih naak ning peshe.
5 Kei noh i lü Kärite tui shonga kah ning taak hüt ni ti ta hlü ham naküt kti khuut sun angpääng vaia phäh ni. Nang noh mlüh tä lü shaang ngsiim üng asange nah jah msoon vai hlü kti. Kah ning sük sän käh mhnih bä.
6 Shaang ngsiim sang ta kbäü naak üng ngsiim yah kkhai. Ah kkhyu phi mat däk veyah kkhai. Ah sa nae jum ei ktia thoon yah kkhaie. Lääng lah lü nu pa pyen am ksang nak kti atia pyen ei vaia mkot käh veyah kkhai.
7 I a thoon lüni ti ta shaang ngsiim pä khong sun Pangsiima ksah-a shaang üng lam jah mshüüm ktia kyalü kkhyaanga kbäü ei naak käh veyah kkhai. Ah päta tia velü ah mlung kshoua käh thoon yah kkhai. Ju o-kolaih kti, ngtuun ngvook kpoh, ngui xüi külak kpaam ei ktia kkhyaanga phi käh thoon yah kkhai.
8 Kkhin mshü mseei thei kti, ado vai su ngngaai thei ktia kkhyaanga thoon yah kkhai. Ah mlung mbüüp kti, pyuun kti, Pangsiima hlü eia vek kti, shing khän ktia kkhyaanga thoon yah kkhai.
9 Shaang ngsiim sang sun kkhyü ksang ah ngtheih-a kba man kyet lü jum ei yah kkhai. Asun üng va jum ei ktie üng sang ktia mong sun ah jah msuh mtheh-a phäh ktha yah ei khoh kkhaie. Thang kdo kkya kpet mjak ktie sun khye kti atia shun khoh yah kkhai.
10 I lüni ti ta thang kdo kkya kpet mjak lü i a am kyah ktia kkhyü üng jum ei ktie lam jah hmü shak ktia kkhyaang kho hah pa vek ktie. Ah nih nih-e sun aktung boka vun moih pä üng kae ni.
11 Asuna kkhyaangea mpyong sun jah kbom vai hlü kti. I a thoon lüni ti ta ngui xüi ah nih yah ei vaia am nik ktia msuh mtheh üng kkyoong long üng kae abäng sun ah nih mlung jah up lat shak ktie.
12 Kärite mjü üng ka shahma mat noh “Kärite kkhyaange sun hleei hlak khoi ulü akkyüh kshe kkhyüng kshei üng täng lü dam lü ei o-kolaih ktie ni” tilü ah pyen.
13 Ahina shahma-a shak shi hin sang kti. Asuna thoon lü ah nih jum eia do naak lo vai angbüh kuunga jah him vai hlü kti.
14 Ah nih nih-e noh Jüdah-ea kkhui kkei jah kkhyü ksang not kti kkhyaangea thuum seen sun käh ah nih läk lam su ngngaih vai hlü kti.
15 Ah mlung kko ngsiim ngsaih ktia kkhyaanga phäh ta abäng hin ngsiim kti ni. Lüphi mtuih shek ktia kkhyaang, Booi Jeishüh am üm nak ktia kkhyaanga phäh ta abäng hin msih mpüh kti ni. Aksanga ta ah nih ngnei shak jah sheet shak lü mkhye poh üng ah nih mkhyea am ngngaai ei u.
16 Ah nih nih-e sun Pangsiim kshing ktia hana som ktie. Lüphi ah nih ve soh poh mshah üng Pangsiim ah nih kpet mjak ni. Asuna thoon lü ah nih-e sun jah sok xeh ei phyak ktie ni. Pangsiima kkhyü be sun am ksang na-hlü u. Akdoa koong i phi am bilou poh mshah thei u.