TIMOTIH-A SA ANGHNGIH NAAK
Polüh noh Timotih üng ah kbia sa anghngih naak
1
1 Kei Polüh Pangsiima hlü eia Booi Jeishüh Khritoa ngshäa kah thoon kti. Booi Jeishüh Khrito üng nih nglooi eia phäh Pangsiim noh angshääia xün naak ah jah peet hlüa kkhyü taam kpyaü kkhaia kei ah nah tüih lo ni.
2 Kah ning kphya naak kah ning sa, nang Timotih-a veei sa kah ning kbi lo ni. Pa Pangsiim jah nih Booi Pa Jeishüh Khrito noh bä naak, mpyeen ei naak jah diim deih naak ning peshe.
3 Kah mah püi mah pookea kba kah mlung kkyoong noh ah nah kbäü ei naak käh vek ktia Pangsiima khuut kah poh kti. Kah tä sham tä lü ning shüüm ngüshe nanga phäh Pangsiim kah je ei kti ni.
4 Nah kphyü tuia book shüüm ngüshe amhnüüp mthan nghläia kah ning hmuhlü be kti ni. Kah ning hmuh be yah ta kah je kyai naak küm seei kkhai ni.
5 Nah jum ei naak ksang kah shüüm kti ni. Nah mah püi Loih jah nah nu Junih noh aksüka asun kba anajum ei ma kti xooi ni. Nah jum ei naak jah ah nih jum ei naak lang lang kkhaia ngngaai lü kah mkhüh üp kti ni.
6 Kei noh nah kkhaana kah kut kah mtaan üng Pangsiim noh ah ning peet khyaih naak khoh käh mhnih laang lü shum ei bä tilü kah ning mtheh hlü kti.
7 Nih nih-e noh Mkhyangsiim üng kyüh ei naaka mlung nih yah ktie am ni. Hiit jah mhlä kphya naak, mlung mbüüp naak nih yah ktie ni.
8 Asuna thoon lü nih Booi Pa-a mong shak shi vai käh ngke ei bä. Booi Jeishüh Khritoa phäh khupa vek kti keia phäh phi käh ngke ei bä. Nang noh phi thang kdo kkya-a phäh khui kha khaam vaia ana-ngpyaih xat ei bä. Pangsiim noh asuna phäh ngjung ktha ning pek kkhai ni.
9 Pangsiim noh nih nih jah kuum kyan lü ah kkhyaang ngsiima nih thoon kkhaia ah jah xü ni. Asun sun nih nih-e noh khuut kdo nih poh-a phäh am nilü Pangsiima mkhüh jah ah bä naak üng ni. Ahina kho mdek am ah mhnün msenga hama kkhyüh Pangsiim noh ahina bä naak Booi Jeishüh Khrito üng ah jah poh peet pääng ni.
10 Tuh ta jah kuum kyan kti Booi Jeishüh Khritoa pou loa phäh üng Pangsiima bä naak ngshing ngte lok kti ni. Booi Jeishüh Khrito noh thih naak nääng lü thang kdo kkya üng xün naak jah pek kti. Booi Jeishüh Khrito üng nih nih-e angshääia thi naak am ve ti.
11 Asuna thang kdo kkya kpyaü lü jah msuuk mtheh kkhaia Pangsiim noh ngshäa nah msoon kti ni.
12 Asuna thoon lü ahin kba khui kha mpyeen sheet naak kah khaam kti ni. Lüphi Pangsiim üng kah ääp ei naak ta am sim pyak khoh. I lüni ti ta u kah üm nak kti atia kah kshing kti. Booi Jeishüh Khrito ah lo be veia Pangsiima nah apa kkhyü ksang üng kkhyü shing lü ve vaia Pangsiim noh nah kpüi kkhai atia kah kshing ei kti ni.
13 Kah veeia kkhyüh nah ngjaaka pyen ksang ksüng kyet bä. Ahin nanga läk lam vaia thoon kti. Booi Jeishüh Khrito üng nglooi ei naak üng nah yah jum ei naak jah mhlä kphya naak üng ve lä bä.
14 Nih nih üng vek kti Mkhyangsiim noh kkhyü ksang ning mthei kti ni. Asuna kkhyü ksang sun akdoa shääm ei kyet bä.
15 Asha hnea ka Khritjaan abäng noh nah hoih ktie atia nah kshing ni. Asuea kshuunga Puke Lüh jah Hemong Keneh phi ngpüi kti xooi ni.
16 Booi Pa noh Oom Nesi Poa kkyoong long jah mpyeen ei she. I lüni ti ta ah nih noh alä kuunga ktha nah pek kti ni. Khupa kah ve hin am nah ngke ei na.
17 Romah mlüh-a ah pha lo üng angshenga nah hmulo onga nah shui lok kti ni.
18 Booi Jeishüh ah lo be üng Pangsiim noh ah nih mpyeen ei she. Ephet mlüh-a kah ve ham üng phi i hok kba onga nah ku ei kti ati sun nang nih noh angtea nah kshing kti ni.