6
Mpya naküt noh ah nih mah pa hin lei shong vai ngkäih kti ni tia ngngaai yah kkhaie ni. Asun üng va mpyaea phäh Pangsiima ngming jah Khritjaan msuh mtheh naak hin thang msheet naak am ve. Ah mah pa sun phi jum ei kti ani ta mpya jah mah pa sun Khritjaan be na atäng ni tilü mpya noh ah mah pa käh hmu mshit yah kkhai ni. Ah hmuh mshita kthaka ah mah pa-a phäh akdo boka khuut poh she. I lüni ti ta ah nih noh ah kphya naak Khritjaan be naea phäh khuut poh peet ktia thoon lü ni. Ahie hin kpyaü lü jah msuuk mtheh bä.
3-4 Msuh mtheh naak kse jah mthei ktie sun Booi Jeishüh Khritoa kkhyü ksang jah Pangsiima hlü eia kba ve soh naak üng am ngkäk. Ah nih nih-e sun noh ah nih pät “Kah theem kti ni” tilü ngngaai ei lü angshaaia ta i phi am kshing u. Asuna kkhyaanga ngkhoe noh i a phi am kyah ktia ngthäh ngkhyah ngsuh ngkaih vai ni ah nih yü u. Asu banga kkhyüh lü ngkeei ngku naak, ngvook ngshah, püi thang msheet püi mlung naake thoon lok ktie ni. Asun kba anghläia ngthäh ngkhyah vai yü ktie sun noh am su ngngaai thei ti u. Pangsiima kkhyü ksang ah nih nih-e üng am ve ti. Pangsiima khuut poh hin ah nih phäh-a ngui yah naak vaia ngngaai ei ktie.
Pangsiima hlü eia ve soh lü nih taak ei sa üng khäk hnaih shak lü ve hin nih nih-ea phäh däm duh kti do kya naak ni. Nih hmi lo üng kho mdeka i phi am nih lo püi. Nih thih lo üng phi kho mdeka kkhyüh i sa phi seh ei lü am ng'yah. Asuna thoon lü ei ook vai jah shui shak vai ave ta nih khäk hnaih shak vai u. Lüphi booi maang hlü ktie ta mkhye kkhaia hlo hleep naak khaam ei ktie ni. Ah nih nih-e sun Shatan yaai pa-a msut üng ng'ook ktie ni. Ah nih kpaam ei amjü kküme hin alape ni. Ah nih päta shum pak naake ni. Akpäih naaka ta asuna ah nih kpaam ei naake noh jah sim pyak shak kkhaie ni. 10 I a thoon lüni ti ta ngui xüi kpaam ei naak hin mkhye naküta aphung nu ni. Asuna kpaam ei naak üng akhäk noh jum ei naak lam hmü ktie ni. Ah nih nih-e sun puk sheet ktha sheet naak amjü kküm shoong ei pääng ktie ni.
11 Pangsiim üng shääng ei kti nang noh ta asu bange jah mphen bä. Nang ta pyuun naak, Pangsiima hlü eia, jum ei naak, mhlä kphya naak, mlung mshaaü naak, hnip hnooi naak üng ve vaia mtun ei bä. 12 Jum ei naaka ngtuk mtun ei lü akdoa ngshun poh bä. Angshääia xün naak ksüng ei kyet bä. Nah jum ei naak kkhyaang kho hah-a veeia angtea nah shak shi sun üng Pangsiim noh angshääia xün naak nah yah vaia ning msoon kti ni. 13 Kkhyüng kshei abäng üng shak jah pek kti Pangsiima ma-a phi nishe Pilat booia veei aksanga shak shi kti Booi Jeishüh Khrito ma-a phi nishe kah ning mkhyah peet kti ni. 14 Nih Booi Jeishüh Khrito ah lo be veia kei noh kah ning süke hin kbäü ei naak käh ve laang kkhaia angseeia läk lam bä. 15 Pangsiima tüüma ksüün üng Booi Jeishüh Khrito pou lo be kkhai ni. Pangsiim hin do kya naak üng be baang kti apät däk noh va kho mdek up kti. Shang phuhlang naküta shang phuhlang, booi khong naküta booi khong ni. 16 Booi Pa apät däk ni am thi khoh kti ave. U phi käh theih vaai khoh ktia akvaai üng vek kti. Kkhyaang mat noh phi am hmukhoi u. U noh phi am hmukhoh. Xüng naküt kti noh ah nih sun mküüi mtou u-she. Aksüün tä lü ah nih noh up lä she. Amen.
17 Kho mdek kkhaana booi maang khoh kkhyam mah ktie käh ah nih sam sah vaia jah mtheh bä. Khyük leih sim pyak khoh ktia kho mdek khoh kkhyam käh jah üm na-shak bä. Nih nih-e üng akve naküt nih je naak vaia be bang ktia jah pe khoh kti Pangsiim ääp ei u she. 18 Ah nih nih-e noh kkhyaange jah ku ei lü do ktia khuut ah nih poh vaia ni. Ah nih khoh kkhyam käh kpaam ei lü kkhyaange üng ah nih jah yet mshem vaia jah msuuk mtheh bä. 19 Asuna ning üng ah nih nih-e noh kkhaan khoa xün naak shaka phäh ah nih khoh kkhyam mshep ei ktia thoon kkhaie ni. Asun üng va shak ksanga thoon kti angshääi xün naak ksüng ei khoh kkhaie. 20 Kah sa Timotih-o, nang üng kah ning ap Khritjaan msuh mtheh naak sän akdoa shääm kyet bä. Ah nih nih-e noh theem naaka ah nih ngngaih Pangsiima am ah hlü eia ngthäh ngkhyah naak jah alapa ngsuh ngkaih naak mphen bä. 21 I lüni ti ta kkhyaang akhäk noh ah nih pät theem ktia ngngaai ei ulü jum ei naak lam hmü päih ktie ni.
Pangsiima bä naak nang nih üng veshe.