1 Pa kshe ta kshe naak üng käh jah him lü nah pa-a kba jah mtheh bä. Ah nih shak diik kti nah kke üng kae ta nah na ngshaaia jah ngngaaia. 2 Nghnu mi nue ta nah nua kba, nghnu mi sae ta nah na ngshaaia kba jah ngngaai lü u noh phi käh ah ning kbäü ei vaia jah shi hlo ve soh ei püia. 3 Jah tu mbei kkhai am vek kti hmeei nue ta jah mseei bä. 4 Asuna thoon lüphi hmeei nu sun ah tu sa nae ah nih ve ta ah nih nih-e noh bük teng mseei mshang u she. Päta kkyoong long nu pa pu pi büh ten mseei mshaang be hin Pangsiim noh jah mtaat lü Pangsiima hlü ei ni. 5 Mpyeen ei vaia ngkäih kti hmeei nu ta tu msah kkhai am velü Pangsiim noh ah ku ei vaia ääp ei lü amhnüüp mthan nghläia nghui nalü tä sham kti ni. 6 Boh bah bäü hma kti hmeei nu ta xüng kyo lüphi Pangsiim noh ta thi pääng ktia ah ngngaih ni. 7 Hmeei nu hin ah nih jah kbäü ei naak käh vek kkhaia hin kba hi jah msuuk mtheh bä. 8 Kkhyaang mat hin ah koon, aktunga ta ah kkyoong long am ah büh ten ta ah jum ei naak ah hoih üng atäng ni. Pangsiim am jum ei ktia kthaka phi sha lü ah ngnei shek kti ni. 9 Shaang noh ah tu mbei vaia sa laang üng ta kho kum kkhyuk kip be kti hmeei nu jah ngpüi yah kkhai. Ah kpa mi hoih ktia käh thoon yah kkhai. 10 Ah ve soh poh mshah do ktia kkhyaanga thoon yah kkhai ni. Ah sae kkhyaang kdoa thoon lok kkhaiea jah bük teng msuuk mtheh khoi lü kkhin nghleei kkhin na-thei khoi kti, mlung mhneem lü Pangsiima kkhyaange jah bük teng khoi kti, mpyeen she ktie jah ku ei khoi kti, amjü kküm üng akdo poh khoi ktia kkhyaanga thoon yah kkhai ni. 11 Ah shak diik ham kti hmeei nue ta shaanga msah vaia sa laang üng käh jah ta-a. I lüni ti ta Khritoa hnu läk vaia kthaka ah nih khong pa lou ei hlü be kkhaie ni. 12 Asun üng aksüka Khrito üng ah nih peeta kkhyü taam lüüm kkaan lü Pangsiima mtaam hloh ei kkhaie ni. 13 Asun däk am nilü im naküta ngxo hü ulü amdanga ve-ei hü kkhaie ni. Am ah nih shääng ei naak xa üng vaang lü jah mhlop mbaih hü kkhaie. Sok sek hü ulü am pyen vai pyen hü kkhaie ni. 14 Asuna thoon lü ah nih shak diik ham kti hmeei nue ta khong pa mah be ulü sa na mah be lü ah nih im lou ah nih mshü mseei vai kah hlü ei ni. Asun kba ani ta Khritjaanea ye noh nih nih-e ah nih jah thang mseh naak vai i am ve. 15 I lüni ti ta tuh-a phi hmeei nu akhäk noh jum ei naak lam hmü lü Shatan läk hnüh ktie ni. 16 Jum ei kti nghnu mi mat hin noh ah koon üng ka hmeei nu ah ve balaak ta tu msah she. Asun üng va shaang noh käh ngnü ngsheng lü ah püi am ve ngshaai kti hmeei nu jah ku ei khoh kkhai.

17 Shaang ngsiim akdoa jah shääm kti asange ta aktunga jah lei shong bok bok vai ngkäih kti ni. Aktunga ta Pangsiima kkhyü kpyaü lü msuh mtheh naak üng khuut poh kti asange jah lei shong vai ngkäih bok kti ni. 18 I lüni ti ta Sangsiim üng ng'yuk kti ta “Saang leh kti shea mpyong käh yai vai” tilü vek kti. Kona “Khuut poh kti noh ta ktha kheen yah ngkäih kti ni” tilü phi vek kti. 19 Mat mat noh shaang üng asang kbäü ei kkhaia ah nih lo üng shak shi nghngih, kthum am ave ta käh pyen shak ngtu bä. 20 Anghläia mkhye ktia kkhyaang ta shaanga ma-a him bä. Asun üng va akse noh mkhye vai kyüh ei kkhaie ni. 21 Ahina msuh mtheh nah jah läk vaia Pangsiim jah Booi Jeishüh Khrito jah ngsiim ngsaih kti kkhaan kho ngshäea ma-a kei noh kah ning xüh ni. Kkhyaanga mik hmaai läk lü jah khoi khya lü käh thoon bä. 22 Kkhyaang mat mat noh Pangsiima khuut ah poh vai ngshing ngte naaka ah nih-a kkhaana kut mtaan vai käh jaang na-bä. I lüni ti ta kut nah mtaana phäh üng kkhyaanga mkhye üng nah ngpüi yot khoh kti ni. Nah pät kuung phi ngsiim ngsaih ktia xün shak üng nah ve soh vaia mseei ei bä. 23 Nang hin am nah khyaih thak thak ktia thoon lü tui däk käh o-lü nah kkhon angsim vaia ngbom tui api pi o-bä. 24 Akhäke ta ah nih mkhye ngshing ngte lü Pangsiim noh mtaam jah pek kkhai atia nih kshing khoh ktie ni. Akhäkea mkhye naak ta ngthup lü hnua pou lok kkhai ni. 25 Asun kba akhäke noh do ktia khuut ah nih poh hin ngseei kti. Am ngseei lüphi mhnüüp mat üng ta am ngthup khoh pou lok kkhai ni.