4
“Ngooia ta kkhyaang akhäk noh ah nih jum ei naak hoih kkhaie ni” tilü Mkhyangsiim noh angseeia ah pyen ni. Asue sun noh hleei khoi kti yaai jah kho yaaiea mtheh ksang nak kkhaie. Asuna msuh mtheh naak sun Pangsiima kkhyü jah mtheh ktia hana som ktiea, hleei hlak khoi ktiea veeia kkhyüh lok kti ni. Asuea mlung kkyoong sun mthi ngling üng mhlinga mäi mkouh-in lü akkhye ah nih poh üng phi ah nih mlung kkyoong noh am jah kbäü ei ti. Asuna kkhyaange sun noh “Am nih kkhyu ngla yah. Asuna ngkho am ei dat u kti. Hina ngkho am ei dat u kti” tilü ning jah msuuk mtheh kkhaie ni. Angshaaia ta Pangsiim noh ei ook vai abäng ah mhnün msenga thoon lü Pangsiima kkhyü ksang kshing lü jum ei ktia kkhyaange noh Pangsiim je kyai ei lü ei vai ni. Pangsiim noh ah mhnün mseng naküt do ktia thoon lü ei khoh naküt jeih vai am hlü. Pangsiim je kyai ei lü dou ei vai ni. I a thoon lüni ti ta Pangsiima kkhyü jah tä sham naak noh ei khoh naküt sun ngsiim ngsaih shak kti.
Ahina msuh mtheh hin Khritjaan be nae üng nah jah msuh mtheh be ta nang hin Booi Jeishüh Khritoa xüh shoh kdoa nah thoon kti ni. Kona nah pät kuung noh jum ei naaka kkhyü jah nah läk lam aksang msuh mtheh-a kkhyü hin nah päta sääng taai naaka thoon kti. Pangsiim üng am shääng ei kti, i a phi am kyah kti kkhui kkaam ta mphen bä. Pangsiima hlü eia ve soh üng nah ve khoh vaia ngsuuk ei bä. Puum sha üng shääng ei kti khyaih lo vaia ngsuh ei ta do kti ni. Lüphi Pangsiim hlü eia xüng sheei ta asuna kthaka sha lü do bok kti. I a thoon lüni ti ta kho mdeka xün naak jah angshääia xün naaka phäh-a Pangsiima kkhyü taam vek kti ni. Ahina pyen ksaak hin sang lü kkhyaange noh ah nih dou daan päih vaia phi ngkäih kti. 10 Nih nih-e hin noh xüng kti Pangsiim nih ääp ei ktie ni. Ah nih sun kkhyaang naküt jah yung mhlät kti Booi, aktunga ta jum ei kti jah kuum kyan ktia Booi ni. Asuna thoon lü nih nih-e noh boong kha lü khuut poh lü mkhuh mhlih phi nih khaam ei ktie ni.
11 Kkhyaange üng ahie hin ah nih läk lam vaia mkhyah lü jah msuuk mtheh bä. 12 Nah shak adiika phäh üng u noh phi käh ning mdih mshuui she. Nang hin jum ei ktiea phäh pyen kshak, ve soh, kphya naak, jum ei naak, jah ngsiim ngsaih naak üng ah nih ning hju tuih vaia thoon hlok bä. 13 Kah pha lo veia kkhyaangea ma-a Sangsiim kkhe lü Pangsiima kkhyü kpyaü lü msuh mtheh mtun ei bä. 14 Shaang ngsiima asange noh nah kkhaana ah nih kut mtaang lü ah nih shahma-a kba Mkhyangsiim noh ah ning peet khyaih naak khoh shum ei bä. 15 Jum ei kti abäng noh Pangsiima kkhyü mtun ei lü nah kpyaü kti ati sun ah nih hmuh vaia anghläia khuut poh-a. 16 Nah ve soh jah nah msuh mtheh üng mseei ei bä. Asun kba anghläia poh lä bä. Asun üng nah pät jah nah pyen su ngngaai ktie noh phi kuum kyan naak nah nih yah kkhaie ni.