2
Nang nih-e hin kkhyaang naküta phäh-a nghui naak ni, tä sham, tong peet, je naak ni, nah nih poh vaia aktunga kah ning jah sük hlük kti. Kei nih-e noh angngaih k'hnip diim deih-a Pangsiim hlü eia xüng sheei lü kkhyaange noh ah nih jah lei shonga kah nih ve soh khoh vaia shang phuhlang jah aso-yah booi khongea phäh nah nih jah tä sham peet vai u. Asun sun do kya lü jah thoong khyah kti Pangsiima mlung hlü ni. Kkhyaang naküt noh lolü kuum kyan naak yah ulü aksang ah nih kshing vaia Pangsiim noh mkhüh nak kti ni. I lüni ti ta Pangsiim mat däk velü Pangsiim jah kkhyaang jah kphye kti phi kkhyaanga thoon lok kti Booi Jeishüh Khrito apät däk ni ah ve. Booi Jeishüh Khrito hin kkhyaang ah abäng jah shuh be vaia ah shak ton kti ni. Asun hin Pangsiim noh kkhyaang naküt kuum kyan naak ah jah yah ei naak hlü shaka phäh ah tüüma ksüün üng shak kshia thoon kti. Asuna thoon lü Pangsiim noh kei hin ngshäa nah thoon shak lü kkhyaang mjü kse-e üng jum ei naaka mong thang ksang sun kpyaü lü jah msuuk mtheh kkhaia ah nah msoon ni. Kei noh aksanga kah pyen ni. Am hleei hlak ngü.
Ahoa phi kpa mie hin ah nih mlung kkyoonga thüi shei naak jah ngvook ngshah naak käh ngpüi ktia ngsiim ngsaih ktia mlung üng ah nih kut jah shäng lü ah nih tä sham vai kah hlü ei ni.
Nghnu mie noh phi looi ngkäih kti akhäm khih sa ah nih ngshui ngshak vai kah hlü ei ni. Lu ah nih ksuih üng phi xüi lu shun lu kata ngkho käh jah shum ei shak ubä. Xüi ni, aphu kküüi üng ah nih msom ngmou kthe, mutia ngkho phi käh jah shum ei shak ubä. Ah nih nu pa, ah nih kpa mi noh am ah nih kkhyäih ktuk khoh-a shui shak käh ah nih shui shak hlü vai. 10 Nghnu mi noh ta ah nih nih-e üng looi ngkäih ktia poh mshah lü kkhyaang mpyeen kshe ku ei naak üng ah nih jum ei naak ngdan shak u-she. 11 Nghnu mie noh akdiima ve ulü ah nih kpa mia pyen ksang nalü Pangsiima kkhyü ngthei u-she. 12 Nghnu mie noh ngkhong lü kpa mie jah msuuk mtheh lü ah nih jah up vai am hlü ei ngü. Ah nih nih-e akdiima ve u-she. 13 I lüni ti ta Pangsiim noh Atam mhnün ma lü va Eva ah mhnün lo. 14 Shatan yaai pa noh phi Atam ah mhleei mhlak am ni. Ah nghnu mi mhleei mhlak lü va nghnu mi noh Pangsiima kkhyü lüüm kkaan lok kti. 15 Nghnu mi noh ta sa sa na-ushe. Anghläia jum ei naak, mhlä kphya naak, ngsiim ngsaih naak, khäm khih naak üng ve u-she. Asun üng va Pangsiim noh kuum kyan naak jah pek kkhai.