TIMOTIH-A SA AKSÜK
Polüh noh Timotih üng ah kbia sa aksük
1
1 Jah kuum kyan kti Pa Pangsiim jah nih ääp ei naak Jeishüh Khritoa mkhüh-a kei Polüh hin Booi Jeishüh Khritoa ngshäa kah thoon kti ni.
2 Jum ei naak üng kah sa ksanga thoon kti nang Timotih üng sa kah ning yuk lok kti ni. Pa Pangsiim jah nih Booi Pa Jeishüh Khrito noh bä naak, mpyeen ei naak jah diim deih naak ning pe nishe.
3 Make Tonih hne da kah joon üng kah ning sük hüta kba Ephet mlüh-a nah ve ma vai kah mkhüh naak ni. Aksang am nik kti msuh mtheh naak kpyaü hü kti kkhyaang akhäka mpyong nah jah mbüüp vai ni.
4 Ah nih kkhui kkaam jah pa kkhui käh ah nih pyen ti vaia jah mtheh bä. I lüni ti ta asu bange sun noh jah ngsuh ngkaih shak lü Pangsiima mkhüh-a jum ei naak üng däm duh lo vai am jah kpüi kpak khoh.
5 Asun kah mkhyah-a nüt yaan ta Khritjaane naküt ngsiim ngsaih ktia mlung kkyoong, ngpyuun ktia ngnei shak, sang ktia jum ei naak üng mhlä kphya naak ah nih ve lo vai ua phäh ni.
6 Kkhyaang akhäke noh ta asu bang sun jah hoih lü nglat be lü alap ngthäh ngkhyah naak üng lam hmü ktie ni.
7 Ah nih nih-e sun noh Pangsiima thuum jah msuuk mtheh-in hlü ktie kyo. Lüphi ah nih päta pyen ksaak jah ah nih jah msuh mtheh-a mong hin ah nih pät noh phi am dang yah ngtu u.
8 Kkhyaang mat hin noh ngya ktia ah shum ei ta Pangsiima thuum hin do pi pi kti ni atia nih kshing u ni.
9-10 Pangsiim noh ah thuum hin pyuun ktia kkhyaangea phäh ah jah taam peet am ni atia nih kshing vai u hlü kti ni. Pangsiima thuum ta thuum lüüm kkaan ktie, thuum am ksang nak ktie, Pangsiim kpet mjak ktie, mkhye mshoh ktie, am ngsiim ngsaih ktie, Pangsiim am lei shong ktie, nu pa hnim ktie, kkhyaang hnim ktie, boh bah ktie, kpa mi khye khye nghüüi ngtäm ktie, ngxüng ngman poh ktie, hleei hlak ktie, aksang am nik ktia kkei ng'yün ktie, sang ktia msuh mtheh naak kpet mjak kti abängea phäh ve ni.
11 Ahin sang ktia msuh mtheh naak hin jou taai mah kti thang kdo kkya üng ngkäk kthüüp kti ni. Do kya naak üng be bang ktia Pangsiim noh ah nih-a jou taai mah kti thang kdo kkya kpyaü hü kkhaia ah nah mtaat ni.
12 Ah khuut kah poh khoh vaia ktha nah pek ktia thoon lü nih Booi Pa Jeishüh Khrito hin kah je ei ni. I a thoon lüni ti ta kei hin üm naak ngkäih vaia nah ngngaai lü ah khuut poh kkhaia ah nah msoon ni.
13 Angshaaia ta ahlaan üng Booi Jeishüh Khrito kah thang mseh, ah shaange kah jah mkhuh mhlih, akshe hleena kah jah ngnü ngsheng shak khoi kti ni. Lüphi Booi Jeishüh am kah jum ei ktia thoon lü ah kkhyü ksang am kah kshinga phäh üng kah poh-a thoon lü Booi Jeishüh noh ah nah mpyeen ei be ni.
14 Nih Booi Pa-a bä naak kei üng lüih be ktia thoon lü Booi Jeishüh Khrito üng jum ei naak jah mhlä kphya naak nah pek kti.
15 Booi Jeishüh Khrito mkhye mshoh ktie jah kuum kyan kkhaia hina kho mdeka kyum lok kti tia pyen ksaak hin sang kti ni. Kkhyaang naküt noh ksang naak vai phi looi ngkäih kti. Mkhye kti kkhyaangea kshuunga kei hin akshe hleen bok ni.
16 Lüphi Pangsiim noh kei nah mpyeen ei kti. I lüni ti ta kei üng Booi Jeishüh-a küm seei ktia mlung mshaaü sun ah jah mdan naak ma-a thoon kti ni. Angshääia xün naak ah nih yah vaia ah nih jum ei kkhai abäng noh keia thoon ve hin üng Khrito i hok kba onga ah mlung mshaaü kti atia ah nih kshing lo vaia phäh ni.
17 Pangsiim mat däk aksüün tä lü shang phuhlanga thoon kti. I tüh üng phi käh thi khoh laang kti. U noh phi am ah hmuh yah ni. Asuna Pangsiim sun aksüün vaai tä lü mküüi mtou lü mhlün mtaai u-she. Amen.
18 Kah sa Timotih-o, ahlaan üng nanga phäh shahma pyen avea kba kah ning mtaat ni. Asuna shahma-a pyen sun üng ktha lou ei lü jum ei naaka ngshun akdoa ngtuk kpoh bä.
19 Jum ei naak ngkhääng ktia ksüng kyet bä. Nah ngnei shak ve soh hin nah mlung kkyoonga käh nah kbäü ei vaia mtun ei lü ve-ei bä. Kkhyaang akhäk noh ah nih mlung kkyoonga kbäü ei sun i a am ngngaai ei u. Asuna thoon lü ah nih jum ei naak sim pyak kti ni.
20 Asuea kshuunga Hime Nüh jah Alek Santa phi ngpüi kti xooi ni. Ah nih xooi sun Pangsiim käh ah nih thang msheet ti vaia Shatan yaai pa-a kut üng kah jah ap ni.