7
Kona kho mdeka kit kphyüa kkhaan kho ngshä kphyü ngdüüi ktie, kah jah hmuh. Kkhaan kho ngshäe sun noh kho mdeka kho khi kphyü sun kkong kho, mpang lai, thing dungea kkhaana käh khi lolaang kkhaia ah nih k'ang kyet u. Kona kkhaan kho ngshä mat nghngi lo da kkhyüh lok kti kah hmuh be tü. Ah nih noh xüng kti Pangsiima mshing bik kti. Kho mdek jah mpang lai jah ksim kpyak naak kkhüt vai hiit yah ktia kkhaan kho ngshä kphyü phi akthai kdäm üng jah khü kti. “Nih Pangsiima xüh shoh-e ah nih msa yü üng mshing naak nih jah poh hlaana kho mdek jah mpang lai, thing dung käh jah kpyak ubä” tilü ah pyen. Ah nih msa yü üng mshing naak ah jah poh peet i kän lok ktie ati sun kah ngjaak. Isare mjüe abäng naküt üng ka (144,000) ting mat toong kphyü jah thoong kphyü lok ktie. Mshing naak khaam kkhai Jüdah mjü üng ka toong mat thoong nghngih (12,000), Rupen mjü üng ka toong mat thoong nghngih, Kaat mjü üng ka toong mat thoong nghngih lok ktie. Ashe mjü üng ka toong mat thoong nghngih, Natalih mjü üng ka toong mat thoong nghngih, Mana Sheh mjü üng ka toong mat thoong nghngih lok ktie. Shimung mjü üng ka toong mat thoong nghngih, Levih mjü üng ka toong mat thoong nghngih, Isakah mjü üng ka toong mat thoong nghngih lok ktie. Sheipu Lung mjü üng ka toong mat thoong nghngih, Joshep mjü üng ka toong mat thoong nghngih, Ben Jaming mjü üng ka toong mat thoong nghngih lok ktie.
Kona bük be tü ngüshe käh jah kkheh kdät laang vai kkhyaang pä nu kah jah hmuh be tü. Asune hin kkhyaang mjü naküt üng ka, läk mjü naküt pyen kti üng ka, pe naküt üng kae ni. Asune noh shui shak book shui sha lü nghleeng hnah bi ulü Booi ngoh naak kdäm jah To Sa-a ma-a ngdüüi ktie. 10 Ah nih nih-e noh akthai kdäm üng “Booi ngoh naak kdäm üng ngshut kti nih Pangsiim jah To Sa noh jah thoong khyah kti xooi” tilü ngpyaang ktie. 11 Kkhaan kho ngshä abäng noh asang mkulei kphyü, kkhyüng kshei kphyüe jah Booi ngoh naak ngvai lü ngdüüi ktie. Booi ngoh naaka ma-a ngbok ulü Pangsiim hjok khah ktie. 12 Ah nih nih-e noh “Amen! Nih Pangsiima jou taai, pum ngyam, hiit jah ngjung ktha sun nih mküüi mtou vai u. Ah nih sun lei shong lü ngshääi ei ktia nih je ei vai u. Amen!” tilü ah nih pyen u. 13 Asange üng ka mat noh “Shui shak book shui shak ktie ta ue ni. Hoa kkhyüh lok ktie ni” tilü ah nah kthäh. 14 Kei noh ta “Angvaaio, nang noh ni nah kshing” tilü kah mshak be. Asang noh “Ahina kkhyaange hin khui kha mkhuh mhlih nu khaam ei ulü ah nih shui shake To Sa-a thi üng mshop lü book shak ktie ni. 15 Asuna thoon lü Pangsiima Booi ngoh naaka ma-a ngdüüi lü amhnüüp mthan nghläia Pangsiima hjok khah im nua khuut poh ktie ni. Booi ngoh naak kkhaana ngshut kti Pangsiim hin ah nih-ea ngjiin ei naak ni. 16 Ah nih nih-e sun i tüh-a phi buh nghmüh lü tui noh am jah kkhyoot ei ti. Kho nghngi noh am jah hmu-yah. Kho k'hlok noh phi am jah uui ei ti. 17 I lüni ti ta Booi ngoh naaka nglunga ngshut kti To Sa hin ah nih-ea To Kshääma thoon kkhai. Ah nih nih-e sun tui ksaaia ve naaka jah seh püi kkhai. Pangsiim noh ah nih kphyü tui abänga jah xuh peet be kkhai ni” ah ti.