1 Booi ngoh naak kdäma kkhaana ngshut kti noh ah kkheet kut üng sa ktoom ah bi kah hmuk kti. Sa ktooma hnu ma abäng üng sa ng'yuk kti. Asuna sa ktoom sun mshing naak kkhyüh üng ngshuk ei kyet kti.

2 Hiit mah kti kkhaan kho ngshä noh akthai kdäma ah kpyaü kah ngjaak. “Ahina mshing naak jah phyelü sa ktoom kphyang kkhaia u looi ngkäih kti ni” ah ti. 3 Kkhaan kho, kho mdek jah kho mdeka kkea ka abäng noh asuna sa ktoom kphyang lü bük kkhai looi ngkäih kti mat phi am ve. 4 Asuna sa ktoom kphyang lü bük khoh kkhai mat phi am velaang lü kah kyap kkhüt kti. 5 Asun üng asange üng ka mat noh “Käh kyapa. Büka, Jüdah mjü, Davita mshuui üng ka hleeng shih kdäm noh nääng naak yah kti. Ah nih noh mshing naak kkhyüh jah phyelü sa ktoom kphyang khoh kti ni” tilü ah nah mtheh lo. 6 Booi ngoh naak kdäma hlonga To Sa ngdüüi kti kah hmuh. Kkhyüng kshei kphyü jah asange noh To Sa sun ah nih ngvoon u. Asuna To Sa hin ah nih hnim naak khoi ah nghma vek kti. To Sa sun noh kkhyüh jah kki nalü kkhyüh jah mik nak kti. Asune hin Pangsiim noh kho mdek abänga ah jah tüih loa ah ngmüi mkhya ngsiim kkhyüh-e ni. 7 To Sa sun noh sit lü Booi ngoh naak kdäm üng ngshut ktia kkheet kut üng ka sa ktoom ah loh. 8 To Sa noh sa ktoom ah loh kona kkhyüng kshei kphyü jah asange mkulei kphyü sun ah ma-a ngbok lok ktie. Ah nih-e noh khing khonga mäi lok kti mat siim jah bik ktie. Ang'uui ah nih mkhih üng be kti xüi phäih phi mat siim jah bik ktie. Asun hin Pangsiima ngsiim ngsaih kti kkhyaangea tä sham naake ni. 9 Ah nih nih-e noh ng'äi kthaai msuuk ktie. “Nang noh mshing naak jah phyek kti lü sa ktoom kphyang kkhaia nah looi ngkäih kti ni. I lüni ti ta hnim khaam ei ma kti lü nah thi üng kkhyaang mjü naküt üng ka, läk mjü naküt üng ka, pe naküt üng ka kkhyaange Pangsiima phäh nah jah thoong khyah be kti ni. 10 Nang Booi Pa noh ah nih nih-e sun shang phuhlang jah kah nih Pa Pangsiima khuut poh kkhaia khotu ngsiima nah jah thoon shak kti ni. Ah nih-e noh kho mdek up kkhaie ni” tilü msuuk ktie. 11 Kona bük ngüshe ta kkhaan kho ngshä thoong kho hah pa-a kthai kah ngjak kti. Ah nih nih-e noh Booi ngoh naak kdäm jah kkhyüng kshei kphyü jah asang mkulei kphyü sun jah ksung ktie. 12 Ah nih nih-e noh akthai kdäma ng'äi msuuk ktie. “Hnim khaam ei kti To Sa-a hiit, khoh kkhyam, pum ngyam, ngjung ktha, ngming kdäm jah ah jou taai mküüi mtou vaia looi ngkäih kti” tilü ng'äi ktie. 13 Kkhaan kho jah kho mdek jah kho mdeka kkea vek kti jah mpang lai tui k'uma vek kti kkhyüng kshei naküt noh hin kba ah nih ti kah ngjaak. “Booi ngoh naak kdäm üng ngshut kti jah To Sa-a ngming kdäm, jou taai ah nih hiit ngshääi ei ktia nih jah mküüi mtou vai u” ah nih ti u. 14 Asun üng kkhyüng kshei kphyü noh “Amen” ah nih ti u. Asange noh phi ngbok lü hjok khah ktie.