1 Kona mhnüh mdan mat kah hmuh be tü. Kkhaan kho kshoh nghmong-in lü kah hmuh. Nah kkhyü püi khoi kti kpuung tum kthaia kba kthai nak kti noh “Hia kaai loa. Ngooia thoon hlok lok kkhaie sun kah ning mhnüh kkhai ni” tilü ah nah khü. 2 Ahunata Mkhyangsiim noh ah nah seh püi. Kkhaan khoa Booi ngoh naak kah hmuh ni. Asuna Booi ngoh naak üng mat ngshut kti. 3 Ah lup leei ta Ngseei Joom jah Lung Taaüa kba lik lik kti. Japi noh Booi ngoh naak sun ah leng suum ni. Japi sun muti sing üng täng kti. 4 Booi ngoh naak kdäm sun leng suum ktia Booi ngoh naak mkulei kphyü vek ktie. Asuna Booi ngoh naaka kkhaana shui shak book shui shak ktie asang mkulei kphyü ngshut ktie. Ah nih lu kkhaana xüi lu ngbün ngbüng ktie. 5 Booi ngoh naaka kkhyüh kho mlaih-a kba mlaih lolü kho nghmüüma kthai, siing vyeeng pyei kti kthai pou lok kti. Asun Booi ngoh naak kdäma ma su mei kshooi kkhyüh vaai ktie. Asune sun Pangsiima ngmüi mkhya ngsiim kkhyüh-e ni. 6 Booi ngoh naak kdäma ma-a mang tui lia mäi vek kti kah hmuh. Asun sun lung yeena kba ngsiim kti. Booi ngoh naak kdäm sun kkeh nalü kkhyüng kshei kphyü vek ktie. Asune noh ah nih hnu ma-a kho hah jah mik nak ktie. 7 Kkhyüng kshei ksük ta hleeng shih-a mäi ni. Anghngih naak ta she msea mäi ni. Akthum naaka hmaai ta kkhyaanga hmaaia mäia thoon kti. Akphyü naak ta joong mtuui kti laang tah-a mäi ni. 8 Asuna kkhyüng kshei mjü kphyüe üng ah nih ngphya kkhyuk siim lok kti. Ah nih puum sha üng phi ah nih ngphya k'um jah akho kpunga ah nih mik üng be ktie. Amhnüüp mthan nghläia käh ngkya bät ktia ng'äi msuuk ktie. “Ah hiit däm bok bok kti Booi Pa Pangsiim ngsiim ngsaih kti, ngsiim ngsaih kti, ngsiim ngsaih kti. Ah nih hin ahlaan üng velü tuh hi phi vek kti, ngooia phi vek kkhai” tilü msuuk ktie. 9 Asuna kkhyüng kshei kphyü sun noh Booi ngoh naak üng ngshut lü anghläia xüng sheei ktia ah jou taai sun mküüi mtou ulü je ei ktie. 10 Asun kba ah nih mküüi mtou ei üng asang mkulei kphyü noh Booi ngoh naak kdäm bok üng ngshut kti anghläia xüng shei ktia ma-a ngbok lü hjok khah ktie. Ah nih xüi lu ngbün phi Booi ngoh naak kdäma ma-a mphään ulü hin kba ah nih ti u. 11 “Kah nih Booi Pa Pangsiimo, nah jou taai naak, nah ngming kdäm jah nah hiit hin mküüi mtou vaia ngkäih kti ni. Akve luum hin mhnün mseng kti lü abänge hin nah mlung hlüa jah thoon shak kti lü nah jah xün shei shak ni” tilü ah nih mküüi mtou u.