3
Satih mlüh-a vek kti shaanga ngshä üng hin kba sa kbia. ‘Pangsiima mkhya kkhyüh ah nih üng ve lü aai shi kkhyüh bik kti noh ah ning jah mtheh-a kkhyü ni. Nah nih ve soh poh mshah hin kah kshing ni. Xüng ktia shaanga ning jah shui kyo u lüphi nang nih akthie ni. Xak lo ua. Nah nih veeia veham kti thi khyäü hnüh kti kkhyaange üng ktha jah pe ua. Nah nih khuut poh hin kah Pangsiima hmuh-a am küm seei atia kah kshing ni. Ngjalü nah nih dou daan khoia msuh mtheh naak shüüm be lü läk lam ua. Nah nih mkhye naaka kkhyüh mai be ua. Am nah nih xak lo be u ta mpyuk eia kba kah lok kkhai ni. I tüh-a kah lo vai am kshing u kti. Lüphi nah nih Satih shaanga ah nih pät am mtuih mleh shak kti akhäk veham ktie. Asune hin shui shak book shui sha ulü keia hlonga sit hü kkhaie ni. I lüni ti ta ah nih nih-e hin asun kba looi ngkäih ktie. Ngnääng kti naküt noh asun kba shui shak book shui sha kkhaie. Ah nih-ea ngming xün naak sa upa kkhyüh am kphyaih be ngü. Ah nih-e hin kei üng shääng ei ktie ni tilü kah Pa Pangsiim jah ah kkhaan kho ngshäea ma-a kah pyen kkhai ni. Ah nghnga khuui kti noh ta shaange üng Mkhyangsiim noh ah mtheh sun ngja-she.’
Phila Tephia shaanga ngshä üng hin kba sa kbia. ‘Ngsiim ngsaih kti Pangsiima sa kpa ksang noh ah ning jah mtheh-a kkhyü ni. Ah nih noh Davit shang phuhlanga kshoh shuk naak bi kti. Ah nih noh kshoh ah nghmon üng u noh phi am khaai be khoh ti. Kshoh ah khaih üng phi u noh am nghmong be khoh. Nang nih-ea ve soh poh mshah kah kshing ni. Bük ngngaai ua. U noh phi am ah khaih khoh-a kshoh nah nih phäh-a kah nghmon ni. Nah nih ktha ngseek kyo lüphi nang nih-e noh kah kkhyü nah nih ksang nak ktie. “Ah nih üng am shääng ei u ngü” am nah ti na-u kti. Bük ngngaaia, ah nih pät Jüdah mjüa ngshui ei ulü hleei hlak kti kkhyaange Shatan yaai pa-a ngthei naak kyonga kae vek ktie. Nah nih veeia lo-ulü nah nih kho kuunga kah jah ngbok lo shak kkhai ni. Kei noh kah ning jah kphya nak kti ati sun kah jah kshing shak kkhai. 10 Nang nih-e noh kah kkhyüa kba mlung mshaaü lü nah nih non ei ktiea thoon lü kho mdek kkhyaange jah saam naak vai kho mdek luuma khui kha naak kkhüt apha lo üng üp oom naak üng kah ning jah shääm kyet kkhai. 11 Kei hin i vei am lo kah lobe kkhai ni. Nah nih jum ei naak ngkhääng ktia man kyet u bä. Asun kba ani ta u noh phi nah nih lu ngbün am ning jah hut ei khoh. 12 Ngnääng ktia kkhyaang ta kah Pangsiima hjok khah im nua kkit tunga kah thoon shak kkhai. Ah nih sun Pangsiima hjok khah im nua kkhyüh i tüh-a phi am mshot khoh ti. Ah nih-a kkhaana kah Pangsiima ngming kah yuk kkhai. Kah Pangsiima mlüh-a ngming phi kah yuk kkhai. Asun hin kah Pangsiima kkhaan khoa kkhyüh lü kyum lok kkhai Jeirüh Shalem mlüh kthaai ni. Asuna kkhyaanga kkhaana kah ngming kthaai phi kah yuk kkhai. 13 Ah nghnga khuui kti noh ta shaang ngsiime üng Mkhyangsiim noh ah jah mtheh sun ngja-she.’
14 Lotih Ke shaanga ngshä üng hin kba sa kbia. ‘Amen ngming nak kti kkhyüng shing üng velü Pangsiima shak shi ksang noh ah ning jah mtheh-a kkhyü ni. Ah nih hin Pangsiima mhnün mseng sut ei naak ni. 15 Kei noh nah nih ve soh poh mshah kah kshing ni. Kei nah nih nah kpet mjak ktie ta am ni kyolü phi nah nih nah kphya nak ktie ta am ni. Kei nah nih nah kpet mjak, am ani üng phi nah nih nah kphya nak vai kah hlü ei bok kyo. 16 Käh nah kphya na-xa theng, käh nah kpet mjak xa theng, akkeh nglak üng nah nih vek ktiea thoon lü msi mshoh-a kba kah ning jah mshoh hlühnüh ktie ni. 17 Nang nih-e noh “Kei nih-e ta jum ei naak üng kah nih be bang kti, kah nih pung pyah lok ktie. I phi am hlü ti” tilü nah nih pyen ktie ni. Lüphi angshaaia ta nang nih-e hin ngya kyah mpyeen kshe-e ni. Nah nih veeia i phi am ve. Nah nih mik mü lü shui kpum sha kkoa nah nih vek ktie. 18 Asuna thoon lü nah nih booi maang vaia kah veeia mei üng ah nih msiim xüi ksang nah nih kkhyäih vaia kah ning jah msääi kti ni. Ngke ei phyak kti shui kpum sha kkoa nah nih ve khüm pha naak vai shui jih book kkhyäi lü shui sha ua. Nah nih mik avaai be vaia mik tuui phi kkhyäi ei ua. 19 Kah kphya naaka kkhyaange jah him lü kah jah te kti ni. Asuna thoon lü mtun ei lü vuuk be ua. 20 Bük ngngaai ua. Kei noh kshoh ma-a ngdüüi ngüshe kshoh kah kkhok kti. Mat mat noh kah kkhoka kthai ngjalü kshoh ah nah nghmon lo ta ah veeia kah lut kkhai. Ah nih-a dä kah nih ei yüm kkhai ni. 21 Ngnääng ktia kkhyaang ta kah hlonga kah Booi ngoh naak üng kah ngshut shak kkhai. Kah pät phi ngnääng lü kah Pa Pangsiima Booi ngoh naak üng kah ngshuta kba ni. 22 Ah nghnga khuui kti noh ta shaange üng Mkhyangsiim noh ah mtheh sun ngja-she.’