1 Kona kkhaan kho kthaai jah kho mdek kthaai kah jah hmuh. I lüni ti ta kho mdek kphyüm jah kkhaan kho kphyüm khyük kti xooi. Mpang lai phi am ve ti. 2 Ngsiim ngsaih kti mlüh-a thoon kti Jeirüh Shalem kthaai sun kkhaan khoa kkhyüh Pangsiima veeia ka kyum lok kti kah hmuh. Ah nih sun sa ngla-a kba ngpiit ngpyaang lü ah kpa mia phäh shui shak akkyäp kkyäp jah shui shak kti. 3 Booi ngoh naaka kkhyüh lok kti akthai kdäm kah ngjaak. “Tuh-a kkhyüh Pangsiima ve naak vai im kkhyaanga veei velok kti. Pangsiim kkhyaangea dä ayüma vek kkhai. Ah nih nih-e sun ah kkhyaangea thoon kkhaie. Pangsiim ah pät kuung ah nih hlonga velü ah nih nih-ea Pangsiima thoon kkhai. 4 Pangsiim noh ah nih mik tui naküt jah xuh peet kkhai. Kkhyaange am thi ti u. Puk sheet naak, mboih kyah naak, mshou mhleei ei naak phi am ve ti. Kho kphyüma ngkho abäng khyük pääng kti” tilü ah pyen. 5 Booi ngoh naak üng ngshut kti noh “Kei noh abäng naküt akthaaia kah piit pyaang kkhai ni” tilü ah pyen. Kona “Ahin yuka. Ahina kkhyü nglunge sang lü üm naak vaia looi ngkäih kti ni” tilü phi ah pyen. 6 Ah nih noh khuut ngpääng kti ni. “Kei hin Alapha jah Omeka, aksük jah akpäih naaka phi kah thoon kti ni. Tui noh ah khyoot ei naküt üng xün naak tui ksaai sun aphu käh lalü kah jah tu kkhai ni. 7 Ngnääng ktia kkhyaang noh ahin abäng naküt khoh bik kkhai ni. Kei hin ah nih-a Pangsiima kah thoon kkhai. Ah nih phi kah sa-a thoon kkhai. 8 Lüphi kyüh ei ktie, am jum ei ktie, mtuih shek ktie, kkhyaang hnim ktie, boh bah ktie, kho yaaia phun kam shum ei kti, mhnama lup hjok khah kti, hleei hlak kti abänga ve naak vai ta kaat üng dääi kti mei li däk ni ave. Ahin hin anghngih naak thih naak ni.” 9 Pangsiima mkhuh mhlih naak üng be ktia phäih bi khoi kti kkhaan kho ngshä kkhyüh-a kshuung üng ka mat kah veeia lolü “Loa, To Sa-a nghnu mi sa ngla kah ning mhnüh kkhai ni” ah ti. 10 Mhnüh mdan üng msuung k'hlüng ngbaü nua ah nah seh püi. Ngsiim ngsaih kti mlüh Pangsiima veeia ka kkhaan khoa kkhyüh kyum lok kti Jeirüh Shalem ah nah mhnüh. 11 Asuna mlüh sun Pangsiima jou taai üng vaai kti. Mlüh sun lung phu kküüia kba lik lik ei kti. Ah nih sun lung taaü üng täng kti. Lung yeena kba ngsiim kti. 12 Asuna mlüh sun daai kyong nu ak'hlüng vek kti. Daai kyong sun mkot xalei nghngih velü kkhaan kho ngshä xalei nghngih noh mkot sun jah mtät ktie. Isare koon shaang xalei nghngih-a ngming sun mkot mat üng mat siima ngming ah nih yuk u. 13 Mlüh-a nghngi lo da mkot kthum vek kti. Ashiip da kthum vek kti, asum da kthum, kho kyaak da kthum vek kti. 14 Asuna mlüh daai kyong sun lung nu xalei nghngih-a kkhaana ah nih shak u. Asuna lung xalei nghngih-a kkhaana To Sa-a ngshä xalei nghngih-a ngming ah nih jah yuk u. 15 Kah ngsi ngjaang püi kkhaan kho ngshä noh mlüh jah mkote jah daai kyong ah jah msäp naak vai xüi sung keek bik kti. 16 Mlüh nu sun aktun jah akpheia ah msäp. Kkhaan kho ngshä noh ah xüi sung keek üng mlüh sun msäp lüta aktun jah akpheia määng thoong mat jah phya mhma siim lolü määng thoong mat phya mhma kuunga phi hlüng kti. 17 Ah nih noh mlüh daai kyong msäp lüta alama mhma kip jah kkhyuk shah kti. Ahin hin kkhyaanga msäp mshuui naaka kba ni. 18 Mlüh-a daai kyong sun lung taaü üng ah nih ngvoon. Mlüh sun xüi siim siim üng ah nih shak u ni. Asuna xüi sun hmana kba ngsiim kti. 19 Daai kyonga kho phung lung nue sun lung phu kküüi amjü mjü üng ngkäih kkhaia ah nih pyaan u. Lung nu ksük sun lung taaü üng ah nih pyaan. Anghngih naak lung nu sun lung phu kküüi angkyüng hnou üng ah nih pyaan u. Akthum naak lung nu sun abook ngkyüng amjü mjüa ngso kti lung phu kküüi üng ah nih pyaan. Akphyü naak lung nu sun lung phu kküüi asing üng ah nih pyaan. 20 Amhma naak lung nu sun lung phu kküüi ayeen üng ah nih pyaan. Akkhyuk naak lung nu sun ngkyoh kpaai shen lung phu kküüi üng ah nih pyaan. Akkhyüh naak lung nu sun xüia kba ng'aai kti lung phu kküüi üng ah nih pyaan. Akkhyet naak lung nu sun lung phu kküüi asing ngkyüng üng ah nih pyaan. Akko naak lung nu sun lung phu kküüi asing ng'aai üng ah nih pyaan. Axa naak lung nu sun lung phu kküüi asing hnou üng ah nih pyaan. Axalei mat naak lung nu sun lung phu kküüi ngshoot hnou üng ah nih pyaan. Axalei nghngih naak lung nu sun ngshoot mpou lung phu kküüi üng ah nih pyaan. 21 Asuna daai kyong mkot xalei nghngih sun pule ksüüm xalei nghngih ni. Mkot mat siim sun pule ksüüm mat däk siim üng ah nih pyaan. Mlüh k'uma lam ta xüi ksang ksang üng ah nih poh ni. Hmana mäia ngsiim kti. 22 Asuna mlüh-a hjok khah im nu am hmu-ngü. I lüni tita abäng khyaih khoh kti Booi Pa Pangsiim jah To Sa hin hjok khah im nu xooi ni. 23 Mlüh nu sua kho mik jah mah khya ah nih vaai vai am hlü ti. Pangsiima jou taai noh mlüh nu sun aksääi päih ni. Kona To Sa hin ah nih-a mei kvaai ni. 24 Kho mdek teng pe naküta kkhyaange asuna mei ktunga kvaai üng sit hü kkhaie ni. Kho mdeka shang phuhlange noh ah nih jou taai naak mlüh-a seh püi kkhaie ni. 25 Asua mlüh-a kshoh-e sun amhnüüp tä lü amhnüüp mü pita nghmong ei kkhaie ni. I tüh-a phi am ngkhaai ei ti u. I lüni ti ta mthan am ve ti laang. 26 Teng pe naküt üng kkhyaange noh ah nih jou taai jah ah nih khoh hat sun mlüh k'uma lo püi kkhaie. 27 Lüphi mtuih mleh ktia ngkho mlüh k'uma am vaang lo yah. Bäü hma kti jah hleei hlak ktia kkhyaang u phi mlüh k'uma am vaang lo yah. Ah nih ngming To Sa-a xün naak sa up üng ng'yuk kti däk ni ah nih vaan yah kom.