1 Kona kkhaan khoa kkhyaang pä nua kthaia mäi kah ngjaak. “Halelüjah, Pangsiim nih mküüi mtou vai u. Kuum kyan naak, jou taai naak jah hiit hin nih Pangsiima ka ni. 2 Pangsiima mtaam jah peet hin sang lü looi ngkäih kti ni. Ah nih noh boh bah naak üng nglou ngthang kti nghnu mi üng mtaam pek kti. Nghnu mi sun noh ah boh bah üng kho mdek kkhyaang naküt bäü hma shak kti ni. Ah nih noh Pangsiima xüh shoh-e ah jah hnima phäh Pangsiim noh ah thung ei be ni” tilü ngpyaang ktie. 3 Kkhyaang pä nu ngpyaang be tü ktie. “Halelüjah! Ah nih uui kti mei anghläia khu ei lä kti ni” tilü ngpyaang ktie. 4 Asang mkulei kphyü jah kkhyüng kshei kphyü noh ngbok ulü Booi ngoh naak üng ngshut kti Pangsiim hjok khah ktie. Ah nih nih-e noh phi “Amen, Halelüjah” tilü ngpyaang ktie. 5 Booi ngoh naaka kkhyüh lok kti kthai noh “Pangsiima xüh shoh abängeo, akdiik akdäm noh ah nih kyüh ua, nih Pangsiim mküüi mtou ua” ah ti. 6 Kona kkhyaang pä nua kthaia mäi, tui nua loon kthaia mäi, khoa nghmüüm kthaia mäi kah ngjaak be tü. “Halelüjah, abäng khyaih khoh kti nih Booi Pa Pangsiim noh up kti ni. 7 Xe nalü nih je kyai vai u. Ah jou taai naak nih mküüi mtou vai u. I lüni ti ta To Sa-a sa laak pooi phalo hnüh ve. Sa ngla phi ngpiit ngpyaang pääng kti ni. 8 Pangsiim noh ngsiim ngsaih lü lik lik ktia shui shak book ah peet pääng ni” tilü pyen ktie. Ngsiim ngsaih kti shui shak book ta ngsiim ngsaih kti kkhyaangea ngpyuun ktia poh mshah sun ti hlü ni. 9 Kona kkhaan kho ngshä noh kei üng “Yuka, To Sa-a sa laak pooia ah nih jah khü eie ta do naak ve khü u” ah ti. “Ahin Pangsiima kkhyü nglung aksange ni” ah ti be tü. 10 Asun üng ta hjok kkhah kkhaia ah kho ma-a kah ngbok kti. Lüphi ah nih noh “Käh, käh, käh ngbok xa-a. Kei hin phi nanga khuut poh püi xüh shoh hnga ni. Booi Jeishüh-a mong shak shi kti nah be naea khuut poh püi xüh shoh-a phi kah thoon kti. Pangsiim däk hjok khah-a. Booi Jeishüh-a Mkhyangsiim hin shahma ngsiime üng shak shi kti ni” tilü ah mtheh.

11 Kkhaan kho nghmong ei lolü kah ma-a ngshe book kah hmuh. Asuna ngshe book ngsum kti noh kkhyü shing jah aksang ngming nak kti. Ah nih-a mtaam peet jah ngshun ah poh hin looi ngkäih kti. 12 Ah mik phi mei kdääia mäi ni. Ah lu kkhaana lu ngbün kho hah khuh kti. Ah päta thea u noh phi am ah kshing ah ngming ah pät üng ng'yuk ei kti. 13 Ah shui shak ah phyang phi thi noh asoih päih. Ah ngming ta Pangsiima kkhyü ni. 14 Kkhaan khoa ngtuk kpoh pä noh ah nih läk lo u. Ah nih nih-e noh ngshe book ngsum ulü ngsiim ngsaih lü lik lik ktia shui shak book jah shui shak ktie. 15 Ah mka khuuia kkhyüh ksim kshaaü akxaat nu lut lok kti. Asuna ksim kshaaü üng teng pe naküt täk lü nääng kkhai. Teng pe naküt sun mthi mtup üng jah up kkhai. Ah nih noh ngbom ktheih leh naak hnüna ngbom ktheih leh kti. Asun hin abäng khyaih khoh kti Pangsiim akdeena thüi shei kti ni ati sun pyen hlü ni. Thüi shei naak üng ah leh ni. 16 Ah shui shak jah ah phei üng “Shang phuhlangea Shang Phuhlang, booi paea Booi Pa ni” tilü ng'yuk kti. 17 Kho mika kkhaana kkhaan kho ngshä ngdüüi kti kah hmuh. Ah nih noh kthai kdäm nu üng kho liva-a joong hü kti kkha abänge üng “Lo ua, Pangsiima pooi kdäma ngkhääm lo ua. 18 Nah nih phäh-a shang phuhlange, ngtuk kpoh khonge jah booiea sha, ngshe, ngshe üng ngsum kti kkhyaangea sha, kkhyaang lät jah mpya, akdiik akdäm kkhyaang abängea sha nah nih ei vai vek kti ni” tilü ngpyaang kti. 19 Ngshe üng ngsum kti jah ah ngtuk kpoh päe sun jah ngshun püi kkhaia kkhyüng kshei kshou jah kho mdek üng shang phuhlange ah nih ngtuk kpoh pä naküt ngkhääm lok ktie sun kah jah hmuh. 20 Lüphi kkhyüng kshei kshou ah nih man u. Kkhyüng kshei kshoua phäh mün sam na-phyak kti ngshing ngte naak poh peet lü Pangsiima shahma ngsiima hana ngsom kti phi ah nih man peh u. Asuna shahma noh ngshing ngte naak ah poh üng kkhyaange jah mhleei mhlak kti. Asuna thoon lü kkhyaange noh kkhyüng kshei kshoua mshing mte naak dou ulü ah lup hjok khah ktie. Kkhyüng kshei kshou jah ah shahma sun kaat mei kdääi mei lia k'uma akkhyünga ah nih jah kkhyaak-in u. 21 Ah nih-a ngtuk kpoh pä abäng sun ngshe ngsum ktia mka khuuia kkhyüh lut lok kti ksim kshaaü üng ah nih jah hnim u. Kkha abäng noh asunea sha ei lü pooi poh ktie.