1 Phäih kkhyüh jah bik kti kkhaan kho ngshä kkhyüh üng ka mat lolü “Loa, mlik tui nuea peia ngshut kti boh bah naak üng nglou ngthang kti nghnu mi sun Pangsiim noh i hok kba mtaam ah peet ati sun kah ning mhnüh kkhai ni. 2 Asuna boh bah kti nghnu mi noh kho mdek shang phuhlange jah ih püi kti. Kho mdek kkhyaangea phäh ah nih-a boh bah naak ju tuia kba thoon lolü o-ulü mpyüi ktie ni” tilü ah nah mtheh. 3 Kona kkhaan kho ngshä noh Mkhyangsiim üng mkyaanga ah nah seh püi. Asun üng nghnu mi mat kkhyüng kshei kshou shen kkhaana ngshut kti kah hmuh. Asuna kkhyüng kshei kshou shen üng Pangsiim thang msheet ktia ngminge sun ah puum sha luum üng ng'yuk kti. Kkhyüng kshei kshou sun noh kkhyüh jah lu nalü xa jah kki nak kti. 4 Asuna nghnu mi noh shen hnou jah ngkyoh paai shen shui shak jah shui shalü xüi ni, aphu küüi lung jah ksüüm üng ah nih pyaan lu keh, ngmou, nghnga kkaai, kut süp, kho hah pa jah ooi hnak kti. Ah kut üng xüi phäih bi kti. Xüi phäih sun ah boh bah jah mtuih mleh naak üng be kti. 5 Ah msa yüa ah ngming ng'yuk kti. Ngthup ktia ti hlü ta “Papu Lung mlüh nu ni. Boh bah kti nghnu mie naküt jah kho mdek abäng üng ngla kshuie mtuih kshe mleh kkhyua vek ktiea nu” ti hlü ni. 6 Asuna nghnu mi noh Pangsiima ngsiim ngsaih kti kkhyaangea thi o-lü mpyüi lolü kah hmuh. Asun hin Booi Jeishüh-a kkhaana kkhyü shing üng ah nih vea phäh ah jah hnim kkhyaangea thi ni. Kei noh nghnu mi sun hmu-ngüshe kah mün tong kti. 7 Asun üng kkhaan kho ngshä noh “A i a nah mün tong kti ni. Ahina nghnu mi jah ah ngsum naak kkhyüh lu nalü xa kki nak kti kkhyüng kshei kshoua ngthup ktia mong sun nang üng kah ning mtheh kkhai ni. 8 Nah hmuh-a kkhyüng kshei kshou hin xüng khoi lü tuh hi ta am ve ti. Lüphi mlooi kkhyook nua kkhyüh lut lobe tü kkhai. Ah sim pyak naak vaia sit kkhai. Ahina kho mdek am ah mhnün ham üng xün naak sa up üng kkhyaangea ngming ng'yuk kti. Asuna xün naak sa up üng ah ngming am ng'yuk kti kho mdek kkhyaange noh kkhyüng kshei kshou sun bük ulü mün sam tong kkhaie. I a thoon lüni ti ta kkhyüng kshei kshou sun ve khoi lü tuh hi ta am ve ti. Nilüphi lobe tü kkhai. 9 Ahin ngjaak kya naak vaia theem ngvaai naak hlü kti. Ah lu kkhyüh ti sun nghnu mia ngshut naak kho msuung kkhyüh ti hlü ni. Shang phuhlang kkhyüh phi pyen hlü ni. 10 Shang phuhlang mhma ta ah nih jah mkhyüh pääng u ni. Mat ta tuh-a ksüün üng vek kti. Mat be tü ta am lo ham. Ah lo üng noong vei sa up kkhai ni. 11 Ahun ve khoi lü tuh hi käh vek kti kkhyüng kshei kshou ta shang phuhlang akkhyet naak ni. Ah nih hin shang phuhlang kkhyüh üng shääng ei lü ah nih phi sim pyak naaka sit kkhai ni. 12 Nah hmuh-a ah kki xa phi shang phuhlang xa ti hlü ni. Ah nih nih-e noh ah nih up vaia pe am yah ham u. Lüphi ah nih-e noh kkhyüng kshei kshou mah mah shang phuhlanga hiit noong veia phäh yah ei kkhaie. 13 Ah nih nih-e ah nih nüt yaan mat lü ah nih ngjung ktha jah ah nih hiit kkhyüng kshei kshou üng ap kkhaie. 14 Ah nih nih-e noh To Sa ngshun püi kkhaie. Lüphi To Sa noh jah nääng kkhai. I lüni ti ta To Sa sun booi paea Booi Pa, shang phuhlang naküta shang phuhlanga thoon kti. To Sa noh xü lü ah jah khü jah kkhyü shing üng vek kti akläke hin To Sa-a dä nääng kkhaie ni” tilü ah nah mtheh. 15 Kona kkhaan kho ngshä noh “Boh bah kti nghnu mi mlik tui nuea peia ngshut kti nah hmuh ni. Asun mlik tui nue sun ta kkhyaang mjü kküme, kkhyaang päe, pe naküt üng ka kkhyaange, läk mjü naküt pyen kti kkhyaange sun jah pyen hlü ni. 16 Kkhyüng kshei kshou jah ah kki xa nah hmuh kti. Asun noh boh bah kti nghnu mi thi nak kkhai. Ah nih-a nglou ngthang naak kpyak peet kkhai. Ah ngui, xüi hut ei lü, shui kpum shak kkoa ta-hüt kkhai. Ah nih-a sha sun ei lü mei üng shi kkhai. 17 Pangsiima nüt yaana kba poh mshah kkhaiea Pangsiim noh ah nih mlung ah jah pyaan. Pangsiima kkhyü küm seei lok kkhaia mlung mat üng ah nih up naaka hiit kkhyüng kshei kshou üng ap kkhaie. 18 Mhnüh mdan üng nah hmuh boh bah kti nghnu mi sun kho mdek üng shang phuhlange jah up kti mlüh kdäm ni” tilü ni.