16
1 Kona hjok khah im nua ka kthai kdäm noh kkhaan kho ngshäe kkhyüh üng “Sit ua, Pangsiima thüi shei naak üng be kti phäih kkhyüh kho mdek kkhaana huk vaai ua” tilü ah pyen sun kah ngjaak.
2 Aksük kkhaan kho ngshä sit lü kho mdek kkhaana ah phäih ah huk. Asun üng kkhyüng kshei kshoua mshing naak dou kti jah ah lup hjok khah kti kkhyaange sun jah mshou ei lü mtuih shek kti ngtheet mneh lok ktie.
3 Anghngih naak kkhaan kho ngshä noh mpang lai tuia kkhaana ah phäih ah huk-in. Asun üng mpang lai tui sun yooka ngthung tuia kba thoon lok kti. Mpang laia k'uma vek kti nga jah xüng sheei kti naküt thipäih ktie.
4 Akthum naak kkhaan kho ngshä noh ah phäih sun mlik tui jah tui longea kkhaana ah huk. Asun üng tui abäng thia thoon lok kti.
5 Kona tui shääm kti kkhaan kho ngshä noh “Ahin kba nang Pangsiima mtaam peet hin looi ngkäih kti ni. Nang hin ngsiim ngsaih kti Pangsiima nah thoon kti. Tuh hia phi nah vek kti. Ahlaan üng phi nah vekhoi kti ni.
6 I a thoon lüni ti ta ah nih-e noh nang Booi Pa-a ngsiim ngsaih kti kkhyaange jah shahma ngsiime jah hnim lü ah nih thi jah mshooi ktie ni. Ah nih nih-e üng thi nah jah tu be hin looi ngkäih ve” tilü ah pyen kah ngjaak.
7 Khah naak lung päm üng ka lok ktia kthai noh “Abäng khyaih khoh kti Pangsiimo, nanga mtaam peet hin sang lü looi ngkäih kti ni” ah ti kah ngjaak.
8 Akphyü naak kkhaan kho ngshä noh ah phäih sun kho mika kkhaana ah huk be tü. Asun üng kho mik noh ah ngling üng kkhyaange ah jah uih naak vai ktha yah ei kti.
9 Kkhyaange sun kho mika ngling noh jah tek lü mneh mah lok ktie. Asuna kkhyaange noh khui kha naaka kkhaana hiit vek kti Pangsiima ngming sun phüih sheih ktie. Asun kba ah nih mkhye sun am vuuk na-hlü be laang u. Pangsiim phi am mküüi mtou hlü u.
10 Amhma naak kkhaan kho ngshä noh ah phäih kkhyüng kshei kshoua Booi ngoh naaka kkhaana huk lüta kkhyüng kshei kshoua pe abäng piik hüt lü mthan-in lok kti. Kkhyaange sun ah nih khaam eia mneh mnanga phäh ah nih mni suui ha kkyeet ktie.
11 Ah nih mneh jah ah nih ngtheeta phäh üng kkhaan khoa ka Pangsiim phüih sheih ktie. Lüphi ah nih mkhye am vuuk na-hlü be laang u.
12 Akkhyuk naak kkhaan kho ngshä noh ah phäih sun Uphyateh-a ah nih shui mlik tui nua ah huk. Asuna mlik tui nu kääi-in lolü nghngi lo da ka shang phuhlangea lo naak vai lam ngpyaang ei lok kti.
13 Kona k'ua mäi kho yaai kthum kah jah hmuh be tü. Ah nih-e hin kkhyü mshima mka, kkhyüng kshei kshoua mka, Pangsiima shahma-a hana ngsom ktia mka-a kkhyüh lut lok ktie ni.
14 Shatan yaai pa-a kho yaaia thoon ulü mün na-phya ktia ngshing ngte naak phi poh ktie ni. Kho mdek naküta shang phuhlangea veei sit hü ulü abäng naküt khyaih khoh kti Pangsiima kho mhnüüp nu üng thoon hlok lok kkhaia ngshuna phäh shang phuhlange jah mkhääm ktie.
15 “Ngngaai ua, kei mpyuk eia kba kah lok kkhai ni. Ah shui shak käh shuut lü käh ip lü nah mtät ktia kkhyaang üng do naak vek kkhai. Asun üng ahunata akpuma vek kkhai am ni. Kkhyaangea ma-a ngke ei yah kkhai phi am ni” ah ti.
16 Kona kho yaai kthum noh shang phuhlange abäng Hepye läka “Amaketon” ah nih tia hnüna jah ngkhääm shak ktie.
17 Akkhyüh naak kkhaan kho ngshä noh ah phäih sun kho li va-a ah kshaih. Hjok khah im nua Booi ngoh naaka kkhyüh kthai kdäm nu kah ngjaak. “Abäng ngpääng hnüh ve” tilü ah pyen.
18 Asun üng kho sun mlaih lok kti ni. Kthai ng'yün lolü kho nghmüüm lolü ngkhyü phi akshe hleena ngshüün lok kti. Nghngi siim ah mhnün msenga kkhyüh lü ahin kba ngkhyü am ngshüün khoi ham laang. Ngkhyüa ngshüün sun kyüh shek kkhüt kti.
19 Mlüh nu sun kthuma ngbou lolü pe ksea mlüh-e phi sim pyak ktie. Pangsiim noh Papu Lung mlüh kdäm shüüm lolü ngbom tui üng be ktia kba ah thüi shei naak üng be kti phäih sun Papu Lung mlüh üng ayüih-a ah tu ni.
20 Tui shong abäng khyük päih ktie. Kho msuung mat phi am ngdang ti.
21 Kkhaan khoa kkhyüh yeyoh nglung ngbaü nu sun kkhyaangea kkhaana kyalok kti. Yeyoh nglung mat sun khin kthum kip bang siim lok kti. Kkhyaange sun yeyoh-a phäh khui kha u lü Pangsiim phüih sheih ktie. Asuna yeyoh sun akshe hleena khui kha naaka thoon kti.