11
Mat mat noh msäp naak vai sung keeka mäi ah nah peet. Asun noh “Sit lü Pangsiima hjok khah im nu jah khah naak lung päm msäp vaaia. Hjok khah ktie phi jah kkhea. Lüphi hjok khah im nua akho kpung ngvoong ta käh msäp xa bä. Asuna hnün ta Pangsiim noh kkhyaang mjü kse-e üng ah jah ap pääng ni. Ah nih-e noh ngsiim ngsaih kti mlüh sun kum kthum jah kum phe ah nih kho kkea leh kyet kkhaie ni. Kah shak shi xooi kphih jih shui lü kho mhnüüp thoong mat phya nghngih jah kkhyuk kip vei säpa shak shi kkhai xooia hiit kah jah pek kkhai ni” tilü ah pyen. Shak shi xooi ta kshi dung thinga mäi xooi. Ah nih nih sun kho mdek up kti Booi Pa-a ma-a vek kti mei ktung nghngih xooi ni. Mat mat noh ah jah mkhuh mhlih hlü üng ta ah nih mka khuuia kkhyüh mei kdääi lut lolü ah nih ye jah uui päih kkhai ni. Asun kba jah mkhuh mhlih hlü naküt kti thi yah kkhaie. Ah nih shahma ksüün üng kho käh ak kkhaia k'ang naak khoh hiit ah nih nih üng vek kti. Tui phi thia thoon shak khoh ktia ah nih hiit vek kti xooi. Mdeka kkhaana ah nih hlü hlü ei üng te määng amjü küm lo pha naak shak khoh-a ah nih hiit phi vek kti. Ah nih shak shi pääng üng ta athuuk naak bok Mulai pea kkhyüh lut lok kti kkhyüng kshei kshou noh jah ngshun püi lü jah nääng lü jah hnim kkhai ni. Ah nih yook sun mlüh kdäm mang kyong lama ngjaih-in kkhai xooi. Asuna mlüh sun Sotom mlüh jah Ekip pea kba mtuih mleh kti ni. Asuna mlüh-a ah nih Booi Pa phi baan lam ktung üng ah nih hnim pääng u ni. Ah nih yook sun kkhyaang mjü kküm, kkhyaang koon kküm, läk naküt pyen ktie, pe luum üng ka noh kho mhnüüp kthum jah mhnüüp msot jah bük ei ulü jah msüm vaia jah ngya kkhaie ni. 10 Kho mdek naküt üng ka kkhyaange noh shak shi ah nih jah hnim sun xe nalü je kyai kkhaie. Mat noh mat üng khoh phi yet kkhaie. I a thoon lüni ti ta shak shi xooi sun noh ah nih kkhyü pyen üng kho mdek kkhyaang naküt jah khui kha shak kti xooia thoon lüni. 11 Lüphi mhnüüp kthum jah mhnüüp msot kona Pangsiim noh jah pho be lüta xüng lo be lü ngdüüi lok kti xooi. Asun jah hmuk kti abäng sat ei lü kyüh ei tong kkhaie. 12 Kona kkhaan khoa kkhyüh kthai kdäm noh ah nih nih üng “Hia kaai lo nih-a” tilü ngpyaang kti ah nih ngjaak. Asun üng ta ah nih ye noh ah nih jah büh k'um üng kho ngmei üng kkhaan khoa kaai kti xooi. 13 Asuna ksüün üng ngkhyü akshe hleena ngshüün lok kti. Ngsiim ngsaih kti mlüh päm xa üng päm mat sim pyak kti. Kkhyaang phi thoong kkhyüh thik kti. Xüng hüt ham ktie ta kyüh ei tong ulü kkhaan khoa Booi Pa Pangsiim sun mküüi mtou ktie. 14 Kyüh shek kti jeih nghnah kshe anghngih naak aläät kona akthum naak kyüh shek kti jeih nghnah kshe phalo be tü kkhai ni.
15 Akkhyüh naak kkhaan kho ngshä noh ah kpuung tum lüta kkhaan khoa kthai kdäm nue ng'yüng lok ktie. “Ahin kho mdeka teng pe hin nih nih-ea Booi Pa Pangsiim jah ah Khritoa pea thoon lopääng kti ni. Ah nih noh aksüün tä lü ngshääi ei ktia up kkhai” tilü pyen ktie. 16 Kona Pangsiima ma-a ah nih Booi ngoh naak üng ngshut kti asang mkulei kphyü noh ngbok lü Pangsiim hjok khah ktie. 17 Ah nih nih-e noh “Booi Pa Pangsiimo, kah nih ning je naak u ni. Nang hin ahlaan üng ni, tuh-a ni, ngooi veia nah hiit mah bok kti ni. Booi Pao, däm duh kti nah hiit shum ei lü tuh-a kkhyüh nah up lo hnüh ni. 18 Kkhyaang mjü kse-e hin nang Pangsiima kkhaana ah nih mlung shou kti. Lüphi nang Pangsiima nah thüi shei naaka ksüün phalok kti ni. Nang noh thi pääng ktie nah jah si jaang lohnüh kkhai. Nah jah xüh shoh-a thoon kti shahma ngsiime, ngsiim ngsaih kti kkhyaange jah nah ngming lei shong kti akdiik akdämea ktha kheen nah jah peet vaia ksüün phalo hnüh kti ni. Ahina kho mdek sim pyak shak ktie phi nah jah sim pyak shak hnüh kkhai” tilü ah nih pyen u. 19 Kona kkhaan khoa vek kti Pangsiima hjok khah im nu nghmong lolü ak'uma vek kti be khüt shüüm naak teta ngdang lok kti. Asun üng kho mlaih lolü, kthai ng'yüng lolü, kho nghmüüm lok kti. Ngkhyü ngshüün lolü, yeyoh phi kyalo kkhüt kti.