9
Kah pyen hin aksang ni. Khrito noh nah shääng van nalü am hleei ngü. Mkhyangsiim noh kah mlung kkyoong up lü kah mlung noh am nah kbäü ei lü kah pyen hin aksang ni tia shak shi kti ni. I ni ti ta kah sääi naak kkhüt jah anghläia kah pyang ma naak pyei vek kti. Kah koon shaang, kah Jüdah mjüe noh kuum kyan naak ah nih yah vaia athoon ta kah pät kuung hin Pangsiima yün she khaam lü Khrito üng ngkya vai phi kah yü naak ni. Ah nih nih-e hin Isare mjüe ni. Pangsiim noh ah sa-a jah thoon shak lü ah jou taai üng phi ah jah ngpüi shak ni. Pangsiim noh ah ng'aan eie jah thuume ah jah peet. Pangsiim sun i hok kba ah nih hjok khah yah vai u sun jah kshing shak lü kkhyü taame phi ah jah peet ni. Ah nih nih-e sun kah nih pu paea kkhyüh kyum kya lo-ulü ah nih jah tu sae ni. Khrito nghngi siima ah thoon lo üng phi ah nih nih-ea mjü ni. Akve naküt jah up kti Pangsiim hin aksüün vaai tä lü mküüi mtou u-she. Amen.
Pangsiima kkhyüa kba am thoon velo kah ti hlü am ni. I lüni ti ta Isare mjüa kkhyüh kyum kya lok kti naküt hin Isare mjü üng shääng ei kti am ni. Apyahama kkhyüh tui kyum lok kti abäng hin Apyahama sa ksang am ni. Pangsiim noh Apyaham üng ah mtheh ta “Nah sa Isaka kkhyüh bä bä ni nah mjü, nah tu sa ah ve lo kom” ah ti. Kkhyaanga mti sha üng hmi lok kti hin Pangsiima sa am ni. Pangsiima kkhyü taama kba hmi lok kti Apyahama tu sa ksanga ngngaai ve ti hlüa kyak kti. Pangsiima kkhyü taam ta “Sheeng kum tuh-a ksüün kah lo be tü üng Sarah noh sa ngpyang sa na-pääng kkhai ni” ah ti.
10 Asun däk am ni. Repet Kha-a sa ngpyang xooi hin ah nih pa phi mat ni. Asun ta nih nih-ea mah pook Isak ni. 11-12 Ahina sa ngphi xooi am ah nih hmi lo ham üng akdo akshe i phi am ah nih kshing ham üng Pangsiim noh Repet Kha üng “Akdäm sa hin akdiika xüh shoh-a thoon kkhai ni” tilü ah napyen. I lüni ti ta Pangsiim noh kkhyaanga poh mshah-a kba ah jah xü am ni. Ah päta mkhüh-a kba jah xü lü ah jah khü ni. 13 Pangsiim noh Sangsiim üng ah jah yuk shak ta “Kei noh Jakop kphya na-ngüshe Esaau ta kah thi naak ni” ah ti.
14 Asun kba ani ta i ni nih ti kom u. “Pangsiim noh kkhyaanga hmaai läk kti ni” ti vaio. Asun kba am ni laang kuung. 15 Pangsiim noh Moshei üng ah mtheh ta “Kei noh kah hlü eia kkhyaang mat sun kah mseh msoon nak kkhai. Kah hlü eia kkhyaang sun kah mpyeen ei kkhai” ah ti. 16 Asun kba ani ta Pangsiim noh kkhyaanga mtun ei jah ah hlü eia phäh ah jah xü am ni. Ah jah mseh msoon naak üng ah jah xü ni. 17 Pangsiim noh Pharoh shang phuhlang üng “Kah hiita ngshing ngte naak vai nüt yaan ngüshe shang phuhlanga kah ning thoon shak ni. Nanga phäh-a keia ngming kho mdek naküta nglou ngthang kkhai ni” tilü Sangsiim üng ng'yuk kti. 18 Asun kba ani ta Pangsiim noh ah päta mlung ktüüma kkhyaang akhäk mseh nak kti. Ah mkhüh ktüüma kba kkhyaang akhäk sun nghnga hlih ktia thoon shak kti.
19 Asun kba athoon ta nang noh “Pangsiim noh i hok kba jah kbäü ei khoh kkhai ja. U noh Pangsiima hlü ei kpet mjak khoh kkhai ja” tilü nah kthäh hlü kkhai ni. 20 Kah püio, nang hin nang nghngi siim sa ni. Pangsiim am ngthäh ngkhyah püi khoh kti. Mdek k'am noh k'am kvo üng “Ahina mäia ta nah nah vok kti ni” tibe khoh ktio. 21 K'am kvo noh k'am mdek sun ah hlü eia shum ei khoh kti ni. K'am mdek mthu mat sun üng ngtou ngtaai lü phu mah bok kkhai jah käh ngtou ngtaai bä ktia k'am nghngih-a phi poh khoh kti ni.
22 Pangsiima poh mshah phi asun kba ni. Pangsiim noh kkhyaange üng ah thüi shei jah ah hiit sun jah kshing hlüshak kti. Lüphi ah jah ksim kpyaka ngkäih ktie sun Pangsiim noh ah mlung mshaaü lü ah jah non ei kkhüt ni. 23 Pangsiim noh däm duh kti ah jou taai phi ngshing ngte hlüshak kti. Pangsiim noh mseh msoon naak üng ah jah napiit pyaang nih nih-e sun ah jou taai üng jah ngpüi ngpo shak kkhai ni. 24 I a thoon lüni ti ta nih nih-e hin Pangsiima jah khüa kkhyaange ni. Ah nih noh nih nih-e sun Jüdah mjü däk am nik ktia kkhyaang mjü kse üng kae phi jah xü kse kti ni. 25 Shahma ngsiim Hoshei üng Pangsiim noh ah pyen shak ta,
“Kah kkhyaangea am thoon khoi kyo ulüphi ‘Kah kkhyaange ni’ tilü kah jah shui kkhai ni. Kah kphya naaka am thoon khoi kyo ulüphi ‘Kah kphya naak’ tilü kah jah shui kkhai ni. 26 ‘Nang nih-e hin kah kkhyaange am ni’ tilü ah nih pyen naaka hnüna ‘Ah nih nih-e hin xüng shei kti Pangsiima sae ni’ tilü pyen kkhaie ni” ah ti.
27 Shahma ngsiim Hei Shajah noh Isare mjüea mong kpyaü hüt kti. “Isare mjüea sa nae hin mdih heena kba jah kkheh kdät vai am ni kyo lüphi asuea kshuunga alääm sa noh ni kuum kyan naak ah nih yah kom u. 28 I a thoon lüni ti ta Booi Pa noh kho mdek üng ve naküt kti abäng sun angseeia akjaanga mtaam jah pek kkhai ni” tilü ah pyen. 29 Shahma ngsiim Hei Shajah-a malam pyen ta “Kkhaan kho ngshäea ngtuk khonga thoon kti Booi Pa noh nih mjü mjoong alääm sa hngoh am ah jah khoi pa-a ta Sotom jah Komo Rah mlüh-a kba nih thoon kkhaie shü.”
30 Asun kba ani ta i ni nih ti kom u. Kkhyaang mjü kse-e ah nih ngpyuun naak vai am mtun ei ulüphi jum ei naak üng Pangsiim üng ng'ye be ktie. 31 Isare mjüe ta thuuma kba ngpyuun vaia mtun ei kkhüt kyo ktie. Lüphi thuum sun küm seei ktia am läk khoh ulü Pangsiim üng am ng'ye be khoh u. 32 Asun hin i lüni. Jüdah mjüe hin jum ei naak üng mtun ei ktie am ni. Ah nih poh mshah sun üm pa nak ktie. Asuna thoon lü ngshuk ei naak vaia taaka lung üng ngshuk ei ktie ni. 33 Sangsiim üng ang'yuka kba “Ngngaai ua. Kei noh Shion mlüh-a kkhyaangea ngshuk ei naak vai lung kah tak kkhai ni. Ah nih ngpä naak vai u lung nu kah mphään kkhai ni. Lüphi asuna lung nu üm nak kti ta ah nih ngke ei naaka am thoon” tilü vek kti.