6
1 Asun kba ani ta i hok kba ja nih pyen kom u. Pangsiima bä naak adäm duh bok vaia mkhye nih poh ei lä kkhaie mä.
2 Am ni laang. Nih nih-e hin Khrito üng nih thipääng ktiea thoon lü mkhye üng am nih shääng ei ti u. Asun kba ani ta i lü mkhye nih poh ti kkhaie ni.
3 Khrito üng nglooi ei lü patiso khaam ei naküt kti nih nih-e hin Khritoa thih naak üng nih ngpüi kti atia am nah nih kshing ktie mä.
4 Patiso nih khaam ei naak üng Khritoa thih naak üng nih ngpüi ulü ah nih üng ayüma nih ng'ut ei pääng ktie. I lüni ti ta Pangsiim noh jou taai mah kti ah hiit üng Khrito ah thoh shak bea kba nih nih-e phi shak kthaai üng nih xün shei vaia phäh ni.
5 Asun kba ah thih naak üng amata nih thoon ta ah thoh naak be üng phi amata nih thoon kkhaie.
6 Nih kkhyaang kphyüm hin Khrito üng ayüma baan lam ktung üng thih khaam pääng kti ati sun nih kshing ktie ni. Asun hin jah mkhye shak kti nih mlung loa hiit sun ah sim pyak vaia phäh ni. Asun üng nih nih-e hin mkhye mshoh-a mpya-a am nih thoon ti u.
7 Kkhyaang mat hin thik kti ani ta mkhyea hiit üng lät hnüh kti.
8 Khrito üng ayüma nih thih pääng ta nih nih-e phi Khrito üng ayüma nih thou be kkhaie ati sun nih jum ei kti.
9 Khrito hin thih naaka kkhyüh ah thoh be kona i tüh-a phi am thi-be ti ati sun nih kshing ktie ni. Thih naak noh ah nih sun am up khoh ti.
10 Ah nih ah thih hin mkhye naaka hiit ksim kpyak kkhaia ahun thak ni ah thih. Tuh ah nih-a xün naak hin Pangsiima hlün taaia nglou ngthang naak vaia phäh xüng be kti.
11 Asun kba kuunga nang nih-e phi “Kei akthi ni. Mkhye am poh khoh ti ngü” tilü ngngaai ei ua. Kona Booi Jeishüh Khrito üng nglooi ei lü Pangsiima jou taai angshing ngte naak vaia xün shei yah vai ni.
12 Asuna thoon lü mkhye noh nah puum sha käh ning up ti she. Nah mlung loa kpaam ei käh läka.
13 Nah nih puum yo noh mkhye ah poh vaia Shatan yaai pa noh käh ah shum ei vaia mseei eia. Asuna ksah-a thih naaka kkhyüh thou be kti kkhyaanga kba Pangsiim üng ng'ap eia. Nah puum sha jah nah mlung kkyoong sun Pangsiim noh ngpyuun ktia ah mkhüh ktüüma kba shum ei she.
14 Mkhye noh am ning up laang yah ti u. I lüni ti ta thuuma kkea am ve ti u kti. Pangsiima bä naaka kkea nah nih ve hnüh ktie ni.
15 Asun kba ani ta i hok kba vai ni. Nih nih-e hin thuuma kkea käh nih ve ti ulü Pangsiima bä naaka kkea nih vek ktie noh mkhye nih poh yah kkhaie mä. Asun kba ta am ni laang yah ti.
16 Nah päta tääng üng mpya-a ng'ap ei kti lü nah mah pa-a ti pyen nah ksang naak ta ah nih-a mpya ksanga nah thoon kti ati sun am nah kshing ktie bä. Ahina ng'yüia mkhye naaka mpya-a nah nih thoon ta akpäih naaka thih naak nah nih khaam ei yah kkhaie ni. Pangsiima ti pyen ksang nak kti mpya-a nah nih thoon ta Pangsiim üng nah nih ng'ye be kkhai.
17 Pangsiim nih mküüi mtou vai u. I lüni ti ta ahlaan üng mkhye naaka mpya-a nah nih thoon khoi ktie kyo. Tuh ta Pangsiima mong msuh mtheh dou daang u kti lü nah nih mlung kkyoong üng kkhyü ksang sun nah nih ksang nak ktie ni.
18 Pangsiim noh nang nih-e hin mkhyea hiita kkhyüh ning jah mhlät lü ngpyuun lü nah nih ve vaia Pangsiima mpya-a nah nih thoon lok ktie ni.
19 Kah pyen kshak sun am nah nih nah hmu su ngja-kya msooi ktiea thoon lü kkhyü hmüün ni kah shum ei ta. Ahlaan üng boh bah mkhye mshoh-a mpya-a thoon lü nah nih puum sha-a puum yo üng akshe hleena nah nih mkhye mshoh lobok bok ktie. Tuh hi ta Pangsiim noh ah ning jah ngsiim ngsaih shak vaia phäh nah puum yo sun ngpyuun ktia khuut kdo nah poh naak vai aksanga ng'ap eia.
20 Mkhyea mpya-a nah nih thoon ham u üng Pangsiima ngpyuun naak üng am shääng ei u kti.
21 Ahlaan üng nah nih bäü hma naaka phäh tuh hi nah nih ngke ei be ktie. Asun kba nah nih ve soh-a phäh i a kheen ni nah nih yah ei u. Ahinea kheen ta thih naak ni.
22 Tuh ta Pangsiim noh mkhyea hiita kkhyüh ning jah mhlät lü Pangsiima mpya-a nah nih thoon lok ktie ni. Asuna do naak ta ngsiim ngsaih ktia ve soh thei u kti lü akpäih naaka kheen ta angshääia xün naak ni.
23 Mkhye naaka kheen ta thih naak ni. Pangsiim noh ah jah yeta bä naak ta nih Booi Pa Khrito üng nglooi ei lü angshääia xün naak ni.