14
Ah jum ei naak ngseek kti sun dou daanga. Lüphi ah su ngngaih sun käh ngsu ngkaih püia. Kkhyaang mat noh ei ook abäng ei yah vai ni tilü jum ei kti. Ah jum ei naak ngseek kti noh ta kthuui an jah tooi ksaak ni ah ei. Abäng ei ok kti noh kthuui an däk ei ok kti sun am mdih mshuui yah. Kthuui an däk ei ok kti noh phi meh ei ok kti sun am si jaang yah. I lüni ti ta ah nih sun Pangsiim noh ah dou daan ni. Nang hin noh aksea xüh shoh-a thoon kti sun i hok kba nah si jaang khoh kkhai ni. Ah mah pa noh ni ah poh mshah sun do kti, am do kti atia ah mkhyah mtaang kom. Ah nih noh akdo poh kkhai ni. I lüni ti ta Booi Pa noh akdo ah poh vaia ktha pe-khoh kti ni.
Kkhyaang mat noh ta kho mhnüüp mat hin mhnüüp ksea kthaka ktung bok ktia ngngaai kti ni. Mat be tü noh phi kho mhnüüp mat jah mat hin alang langa ni ah ngngaih. Kkhyaang naküt noh ah nih su ngngaih-a kba k'üp ei lü ve u-she. Kkhyaang mat noh kho mhnüüp mat hin mhnüüp ksea kthaka ktung bok ktia ngngaai lü ah läk ta Pangsiim lei shong hlülü asun kba ngngaai kti ni. Ei ook abäng ei ok kti noh phi ei ooka phäh Pangsiim je ei lü Pangsiim ah lei shong naaka ah ei ni. Ei ook akhäk jah jeih kti noh phi Pangsiim ah lei shong naaka ah jah jeih ni. I lüni ti ta Pangsiim ah je eia phäh ni. Nih nih-e hin nih päta phäh-a xüng kti mat phi am ni ve u. Nih päta phäh-a thik kti mat phi am ni ve u. Nih nih-e nih xün u ta Booi Pa-a phäh nih xüng ktie ni. Nih thih u üng phi Booi Pa-a phäh nih thik ktie ni. Asun kba ani ta nih xüng lüphi nih thi-lüphi Booi Pa üng ni nih shääng ei u. I lüni ti ta akthie jah akkhyüngea Booi Pa-a ah thoon vaia phäh Booi Jeishüh hin thi-ma lü xüng be kti ni.
10 Asun kba ani ta nang noh nah püi sun i lü nah si jaang khom kti ja. Nang noh phi i lü nah püi sun nah mdih mshuui kti ja. Nih bänge hin Pangsiima si jaang naak Booi ngoh naaka ma-a nih ngdüüi yah kkhaie ni. 11 Sangsiim üng ng'yuk kti ta Booi Pa noh “Kei aksanga kah xün sheia phäh üng kah ma-a kkhyaang naküt nah nih mkhuuk üng nah nih ngdääng yah kkhaie. Kkhyaang abäng noh ah nih mpyong üng Pangsiim mküüi mtou yah kkhaie” tilü Pangsiim noh ah pyen vek kti. 12 Asun kba ani ta mat siim mat siim noh Pangsiima ma-a nih päta nih ve soh nih phyeh pyen yah kkhaie.
13 Asun kba ani ta mat jah mat nih püi käh nih si jaang ti vai u. Asuna ksah-a hin kba nih mkhyah vai u. “Kah be na ngshuk ei lü mkhye ah poh vaia i phi am poh ngü” tilü ni. 14 Khrito üng kah nglooiea phäh ei ook naküt hin i phi mtuih mleh kti am ve ati sun kshing lü kah k'üp ei ni. Lüphi kkhyaang mat noh ei ook mat mat hin am ngsiim ngsaih kti ni tilü ah jum ta ah nih-a phäh asun mtuih shelok kti. 15 Nah ei ooka phäh nah be na up lat shak kti lü ah mlung nah sheet shak ta mhlä kphya naak üng poh am ni. Nah be na-a phäh-a Khrito noh thih khaam ei kti ni. Asuna thoon lü nanga nah ei ooka phäh nah be na sun käh ksim kpyaka. 16 Nanga phäh do ktia ngkho sun nah püia phäh akshea käh thoon she. 17 I lüni ti ta Pangsiima pea ei ook hin aktung am ni. Mkhyangsiima jah peeta ngpyuun naak, diim deih naak, je kyai naak hin aktung bok ni. 18 Asun kba Khritoa khuut poh kti sun Pangsiim noh hlü ei lü kkhyaange noh phi lei shong kkhaie ni. 19 Mat jah mat diim deih naak jah ktha peet naak üng ve ei vaia nih mtun ei vai u. 20 Ei ooka phäh Pangsiima khuut käh ksim kpyak bä. Ei ook naküt hin ngsiim ngsaih lü ei vaia ngkäih kti ni. Lüphi nanga nah ei ooka phäh nah püi nah ngshuk ei shak ta asun hin khye khü. 21 Nah püi ngshuk ei lü mkhye käh ah poh vaia meh käh ei lü ngbom tui käh olü nah püia mlung up lat naak vai akse i phi am nah poh üng va do bok kti.
22 Ahina monge nang noh i hok kba nah jum ei kti ati sun nang jah Pangsiim üng ni ashääng. Do ktia ngngaai lü nah poh mshah noh nah mlunga am ah nih kbäü ei ta je kyai na-a. 23 Lüphi kkhyaang mat noh up lat naak üng ah ei ook ta Pangsiim noh mtaam pek kkhai. I lüni ti ta jum ei naak üng am ah poh ni. Jum ei naak käh ngpüi ktia poh mshah naküt hin mkhye naak ni.