12
Kah be naeo, Pangsiima däm duh kti ah jah mpyeen eia phäh ahin kba kah ning jah mhlo msook hlük ktie. Nah nih puum sha sun khah naak kkhyünga kba ap ua. Asuna thoon lü ngsiim ngsaih lü Pangsiima hlü eia xüng shei vesoh ua. Ahin hjok khah naak aksang ni. Kho mdek kkhyaangea ng'yüia käh ve ua. Pangsiim noh ah ning jah ngthu nghlai shak bok bok vaia nah nih mlung kthaai üng ve ua. Asun kba ani ta Pangsiima mkhüh, do ktia ngkho, Pangsiima hlü eia ngkho, küm seei ktia ngkho sun nah nih kshing lok kkhaie ni.
Pangsiim noh ah nah peet bä naaka phäh nah nih bäng ahin kba kah ning jah mtheh hlük kti ni. Pät noh pät kei akdäm ni tia ngngaai lü käh mküüi mkhyah ei ua. Pangsiim noh jum ei naak phäh phäh ah ning jah peeta kba nah nih päta mong aksang sun ngngaai ei ua. Nih puum sha mat üng nih puum yo kho hah vek ktie. Nih puum yo mat jah mata khuut mta am lang lang. Asun kba ni nih nih-e hin kkhyaang kho hah-a nih thoon kyo ulüphi Khrito üng puum sha mata nih thoon lok ktie. Khritoa puum sha üng puum yo phäh phäh-a nih thoon lok ktie ni. Pangsiim noh ah bä naak üng khyaih naak khoh amjü kküm aphäh phäh-a jah peet kti. Pangsiim noh khyaih naak khoh ah jah peeta kba khuut nih poh vai u. Shahma pyen kti noh ah jum eia kba pyen she. Kkhyaang ku ei vai khyaih naak khoh yah kti noh asun kba ku ei she. Msuh mtheh naak khoh yah kti noh asun kba jah msuuk mtheh she. Ktha jah pe-khoh kti noh ktha jah peshe. Jah yet mshem khoh kti noh käh khyoh ei lü jah yet she. Jah pä khong kti noh mtun ei kuung lü jah pä khong she. Kkhyaang mpyeen ei lü ku ei naak khoh yah kti noh je kyai naak üng jah ku ei she.
Kphya nak ktia hana käh som lü kkhyaang naküt sun aksanga jah kphya na-ua. Khye kaih naküt kti sun mtuih ei ua. Do kti naküt sun ksüng ei kyet ua. 10 Khritjaan be na mat jah mat mseh naak üng angshing ngtea nah nih püi kphya na-ua. Mat noh mat lei shong lü “Keia kthaka do bok kti” tilü nah nih püi ngngaai ua. 11 Käh dam lü khüüi khoom ua. Mkhyangsiima kpüi kpak naak üng mtun ei kkhüt lü Pangsiima khuut poh ua. 12 Ääp ei vai avea phäh je ua. Khui kha khaam ei üng nah nih mlung mshaaü ua. Aksüün tä lü tä sham ua. 13 Jum ei ktiea hlü naak üng jah ku ei ua. Kkhin dou daang ua.
14 Ning jah mkhuh mhlih ktie Pangsiim noh do kya naak ah jah peet vaia jah tä sham peet ua. Käh jah yün she lü ah nih phäh-a tä sham ua. 15 Je kyai ktie jah je kyai püi ua. Puk shelü mbooi kyap ktie jah puk sheet mboih kyah püi ua. 16 Mlung mata ve ua. Käh sam sah ua. Ah nih jah mdih mshuui phi jah püi na-ua. “Kei angvaai ni” tilü käh mkhyah ei ua.
17 Nah kkhaana mkhye kti ave ta käh thung ei be bä. Kkhyaang naküt noh ngbüh ve tia ah nih ngngaih vaia mtun ei lü poh ua. 18 Kkhyaang naküt üng nah nih nglooi thei vaia nah nih khyaih khoh kkhüta mtun ei ua. 19 Kah püieo, nah nih päte noh käh thung ei be laang u bä. Pangsiim noh thüi shei nalü mtaam jah peshe. Sangsiim üng ang'yuka kba “Thung kphyo ei be vai hin keia khuut ni. Kei noh mkhyea kheen kah jah pek kkhai ni” tilü Pangsiim noh ah pyen vek kti. 20 Sangsiim üng ng'yuk be tü kti ta “Nah ye sun ei noh ah kkhyoot ei ta ei mbeia. Tui noh ah kkhyoot ei ta tui tua. Asun kba nah poh ta käh vesoh thei ti lü ngke ei lok kkhai ni.” 21 Akshe noh käh ah ning nääng vai mseei ei bä. Akshe sun akdo üng näänga.